Gérmaniyide xitayghaning dölet bayrimi küni namayish élip bérildi

10 - Ayning 1 - küni, gérmaniyining myunxén shehiride xitayning dölet bayrimi munasiwiti bilen, xitay hökümitining Uyghur wetinige bolghan mustemlike we basturush siyasetlirige qarshi namayish élip bérildi.
Muxbirimiz ekrem
2010.10.04
Share on WhatsApp
Share on WhatsApp
Girmaniye-Myunxenda-Namayish-1-305 Süret, 10 - ayning 1 - küni, gérmaniyining myunxén shehiride xitayning dölet bayrimi munasiwiti bilen xitay hökümitining uyghur wetinige bolghan mustemlike we basturush siyasetlirige qarshi élip bérilghan namayishtin körünüsh.
RFA Photo / Ekerm

Bu qétimqi namayish myunxén shehiride ikki orun'gha orunlashturulghan bolup, sa'et 14:00 - 16:00 giche myunxén shehirining awat soda we sayahet merkizi bolghan meryem meydanida, sa'et 17:00 - 19:00 ghiche xitayning myunxéndiki konsulxanisi aldida élip bérildi. Namayishqa myunxén shehiridiki köpligen Uyghur jama'iti qatnashti.
 
Namayish meydanliri ay - yultuzluq kök bayraqlar bilen tolghan bolup, namayishchilar sépining aldi teripige "5 - iyul weqesi" de shéhit bolghan we "5 - iyul weqesi" din kéyin xitay hökümiti ölüm jazasi bergen Uyghurlarning süretliri chaplan'ghan taxtaylar retlik tizilghan.

Süretlerning ichide yene, xitay Uyghur élide élip barghan atom sinaqlirining tesiride radi'atsiyilik zeherlinishlerge uchrap, méyip tughulghan kishiler we atom sinaqlirigha munasiwetlik herxil süretlermu belgilik salmaqni igiligen idi.
Girmaniye-Myunxenda-Namayish-305
Süret, 10 - ayning 1 - küni, gérmaniyining myunxén shehiride élip bérilghan namayishtin körünüsh.
RFA Photo / Ekrem
 
Mezkur namayishni teshkilligen yawropa sherqiy türkistan birliki teshkilatining bash katipi, gérmaniye Uyghur ayalliri komitétining mu'awin re'isi méhriban xanim bu qétimqi namayish heqqide toxtilip, xitayning Uyghurlargha qarita kündin -kün'ge esheddiyliship bériwatqan basturush siyasiti hem ölüm jazalirigha qarshi Uyghur millitining sadalirini dunya jama'itige anglitishni meqset qilghanliqini tilgha aldi. U sözide, 2009 - yili 5 - iyul küni we uningdin kéyin xitay hökümitining nurghun Uyghurlarni bigunah öltürgenlikini, Uyghur millitining bu paji'elik qetli'amni menggü untumaydighanliqini tekitlidi.
 
Méhriban xanim sözini dawamlashturup, dunya jama'itining Uyghurlar mesilisige bolghan hésdashliqining barghanséri küchiyip bériwatqanliqini, Uyghurlarning nöwettiki dert - elemliridin xewer tépiwatqan gherbliklerning köpiyiwatqanliqini, d u q re'isi rabiye qadir xanim bashchiliqidiki chet'eldiki Uyghur siyasiy pa'aliyetchilirining térishchanliqi bilen, téximu köp kishilerning Uyghurlarning derdige köngül bölüwatqanliqini éytti.
 
Yawropa sherqiy türkistan birliki teshkilatining bash katipi, gérmaniye Uyghur ayalliri komitétining mu'awin re'isi méhriban xanim, bu qétimqi namayish myunxéndiki chong bir bayram mezgilige toghra kelgen bolghach, ziyaretchilerning sanining nahayiti köp bolghanliqini, her qaysi ellerdin kelgen kishilerge herxil tillarda Uyghurlarning derd-elemlirini bildürüsh, xitayning mustebit siyasitining mahiyitini échip tashlash pursitige érishkenlikini bildürdi.
 
Méhriban xanim sözining axirida, bu küreshning taki musteqil sherqiy türkistan jumhuriyiti dunyagha kelgüche dawamlishidighanliqini, özining wetenning istiqbalidin ümidwar ikenlikini eskertti.
 
D u q ning teshebbusigha bina'en, dunyaning bashqa jayliridiki Uyghurlargha oxshashla, gérmaniye Uyghurlirimu her yili 10 - ayning 1 - küni xitaygha qarshi namayishlirini dawamlashturup kelmekte. Her qétimqi namayishta türlük resim körgezmilirini uyushturupla qalmay, yene minglighan teshwiqat waraqchilirini tarqitip, Uyghurlarning échinishliq weziyitidin melumatlar bermekte.

Yuqiridiki awaz ulinishidin, bu heqtiki melumatimizning tepsilatini anglaysiler.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.