Kaliforniye we gollandiyidiki Uyghurlar '5 - iyul ürümchi weqesi' heqqide teshwiqat pa'aliyiti élip barmaqta

2009-Yili 6‏-iyul küni seyshenbe küni ürümchi waqti sa'et 2 etrapida, 300 etrapidiki xitay, qollirida kaltek-chomaq we gürjek kötürgen halda, ürümchining xelq meydanida topliship yürüsh bashlighan. Süret, xitaylarning ürümchi kochiliridiki körünüshi.

25 - Iyul shenbe küni amérikining kaliforniye shtatidiki los - an'gilés shehiridiki Uyghurlar dangliq déngiz sahili santi monika dégen sayahet rayonida, dunyaning herqaysi jayliridin kelgen sayahetchilerge xitayning "5 - iyul ürümchi weqesi"de Uyghurlarni qanliq basturghanliqi, hem xitayning sherqiy türkistan zéminini bésiwalghan 60 yil jeryanida Uyghur xelqi ustidin élip barghan türlük basturush siyasitini sayahetchilerge tonushturush pa'aliyitini élip bardi.

Kaliforniye shtatida bu pa'aliyetni teshkilligüchiliridin erkin sidiq ependi we mérshat ependiler ziyaritimizni qobul qilip,bu qétimliq pa'aliyetni tonushturup ötti.Erkin sidiq ependi bu pa'aliyetni kaliforniyidiki Uyghur yashliri özlükidin teshkillep, "5 - iyul ürümchi weqesi"ni dunyagha anglitish uchun tirishiwatqanliqini bayan qildi.

Mérshat ependi pa'aliyetning meqsitini tonushturup, kaliforniye Uyghurlirining bu pa'aliyetni élip bérish arqiliq, dunyaning herqaysi jayliridin kelgen sayahetchilerge bolupmu xitaydin kelgen xitay sayahetchilirige "5 - iyul ürümchi weqesi"de xitay hökümitining Uyghurlar ustidin élip barghan qanliq basturushining heqiqiy ehwalini Uyghurlarning aghzi arqiliq biwasite yetküzüsh, shundaqla xitay hökümitining bu 60 yil jeryanida Uyghurlar ustidin yürgüzüwatqan basturush siyasitini ulargha anglitish ikenlikini bayan qildi.

Mérshat ependi sözining axirida,kaliforniyidiki Uyghurlarning bu pa'aliyitini bundin kéyinmu her shenbe küni üzlüksiz dawamlashturidighanliqini,chünki dunya xelqining hazir Uyghurlargha qiziqiwatqanliqini bu xil teshwiqat sayahetchilerge qarita élip bérilsa buning ünümi téximu yaxshi bolidighanliqini bayan qildi.

26 - Iyul küni " shawgüen oyunchuq zawuti qan tökülüsh weqesi"ningmu 1 ay bolghan xatire küni bolup, gollandiyining amistérdam shehiridiki Uyghur yashliri,"shawgüen weqesi"hem "5 - iyul ürümchi"weqeside ölgen shéhitlerning rohigha atap, amistérdam shehiridiki türk jameside du'a - tilawet élip barghan.

Ziyaritimizni qobul qilghan gollandiye yashliridin adil ependi bu pa'aliyetni tonushturup ötti.

Qisqisi "5 - iyul ürümchi weqesi" Uyghur xelqini dunyagha tonutti, xitayning bu yillarda Uyghurlar ustidin élip bériwatqan türlük basturush siyasitini dunya xelqige anglatti. Dunyaning herqaysi jayliridiki Uyghurlar türlük pa'aliyetler arqiliq, Uyghurlarning awazini we derdini dunyagha anglatmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.