Gollandiyidiki Uyghurlar 5-iyul denhaxta ötküzülidighan namayish heqqide muzakirileshti

Gollandiyidiki “Yawropa sherqiy türkistan ma'arip jem'iyiti” ning bu ayliq pa'aliyiti ütréxt wilayitige qarashliq bir dalada ilip bérildi. Pa'aliyetke jem'iyet ezaliri we bashqa sherqiy türkistanliq wetendashlardin bolup 30 artuq Uyghur qatnashti.
Ixtiyariy muxbirimiz pida'iy
2012-07-03
Share
gollandiye-dala-paaliyiti-305.jpg Gollandiyidiki Uyghurlar 5-iyul denhaxta ötküzülidighan namayish heqqide muzakirileshti. 2012-Yili 30-iyun.
RFA/Pidaiy

Shu yer waqti chüsh sa'et 2 din kech sa'et 9 gha qeder dawam qilghan bu pa'aliyet qur'an kerim télawiti bilen bashlandi. Telim-terbiye programmisida, aldimizda kéliwatqan ramzan éyining peziliti we bu ay-künlerde gheniymet bilishke tégishlik bolghan muhim islami mesililer heqqide melumatlar bérildi we shu témini chöridigen halda, herkim duch kelgen mesililiridin so'al sorap ‏jawab aldi.

Erkin munazire témiliri taza qizip yuqiri pellige chiqqan minutlarda, weten ichi-sirtidiki bir qatar mesililer muhakime qilindi. Teshkilatlar we shexslerde saqliniwatqan artuqchiliq we kemchilikler heqqide teklip we terbiyiler élip bérilip, öz-ara ittipaqliq kücheytildi.

Oxshighan Uyghur kawapliri, Uyghurche sorunliri hemde ana tilidiki külke-chaqchaqliri bilen, bir septe yanmu-yan turup ada qilghan namazliri bilen, bir künini xushal bir keypiyatta ötküzgen pa'aliyet ehli, yene bir qétimliq uchrashquchilik bir-birige amanliq tilep tarqilishti.

“Yawropa sherqiy türkistan ma'arip jem'iyiti” gollandiyidiki Uyghurlarning diniy telim-terbiye we qa'ide-yosunlirigha a'it xizmetler bilen shughulliniwatqan teshkilat bolup, pa'aliyetliri izchil we salmaq dawam qilmaqta. Ularning bu qétimliq ayliq söhbet pa'aliyitige, “Gollandiye Uyghur birliki teshkilati” we “Gollandiye Uyghur yashlar partiyisi teshkilati” qatarliqlarning wekillirimu teklip bilen qatnashqan bolup, 5-iyul küni ilip bérilidighan namayishning tertipliri we pilan-layiheliri kéngesh qilindi. Pa'aliyet ishtirakchiliri, 5-iyul küni denhaxta ötküzülidighan namayish pa'aliyitige, gollandiyidiki barliq wetendashlarni seperwer qilish üchün tirishchanliq körsitidighanliqini bildürdi.

Melum bolushiche, bu yilliq 5-iyul namayishi bir qeder daghdughiliq ötküzüsh pilanlan'ghan bolup, gollandiyining denhax shehiridiki merkizi poyiz istansisidin, xitay bash elchixanisighiche piyade yürüsh qilinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet