Gollandiyide hayajan

20-Yanwar gollandiye ayrodromida téxi quyash kötürülmestila qollirigha kök bayraq we deste-deste gül kötürüwalghan bir top Uyghurlar dunya Uyghur qurultiyining re'isi rabiye qadir xanimni qizghin kütüwaldi.
Ixtiyariy muxbirimiz pida'iy
2011-01-21
Share
rabiye-qadir-yawropa-ziyaret-305.jpg "Gollandiye diyanet ishliri wexpi" diki uchrishishtin qaldurulghan xatire. 2011-Yili 20-yanwar.
RFA/Pidaiy

Seher timtasliqtiki bir sheher musapirliqta weten-xelqining dewasini qiliwatqan bir top yürekning tiwishige qulaq séliwatqandek qilatti. Qarighanda Uyghurlar öz béshining qedrini bilidighan, hörmitini qilidighan sewiyige yetken chéghi...

Mana bu teswir dunya Uyghur qurultiyining yette dölette élip bérilidighan bir heptilik xizmitining tunji küni we tunji qedimi. Dunya Uyghur qurultiyining re'isi rabiye qadir xanim, mu'awin re'isi séyt tumtürk ependi, bash katip dolqun eysa ependi, mu'awin bash teptish nurmemet rozaxun ependi, teshwiqat merkizining mudiri perhat yorungqash ependi qatarliq ezalardin terkib tapqan hey'et, amérika, gérmaniye we türkiye qatarliq döletlerdin kélip, gollandiyining denhax shehiridiki parlaméntida jem boldi. Gollandiye parlamént ezasi xari fan bommil ependi xizmetdashliri bilen bille méhmanlarni qobul qildi we semimiy söhbetleshti.

Söhbet jeryanida parlamént ezasi xarriy fan ependi bashliq Uyghur mesilisige qiziqquchilar we qollighuchilar rabiye qadir xanim bilen zéch hemkarlishish, öz-ara qollash we yardem bérish heqqide kélishti. Bu söhbetke "Gollandiye Uyghur birliki teshkilati", "Dunya Uyghur qurultiyi yashlar ittipaqi" we "Yawropa sherqiy türkistan ma'arip jem'iyiti" qatarliq teshkilatlarning wekilliri we ezaliridin bashqa, wakaletsiz milletler teshkilatining gholluq ezalirimu qatnashti. Söhbet qizghin keypiyatta ikki sa'ettin artuq dawam qildi. Söhbet axirliship sirtqa chiqqanda, asmandiki yultuzlar bilen yerdiki chiraghlar beslishiwatqandek jimirlaytti...

rabiye-qadir-yawropa-ziyaret-385.jpg
Gollandiye parlamént ezasi xari fan bommil ependi xizmetdashliri bilen bille d u q wekillirini qobul qildi.
RFA/Arslan

"Dunya Uyghur qurultiyi" hey'iti gollandiyidiki Uyghurlarning hemrahliqida, bu qétimqi pa'aliyetlerning kün tertipini orunlashturghuchi "Gollandiye Uyghur birliki teshkilati" ning bashlishi bilen kechqurun sa'et 7 de, "Gollandiye diyanet wexpi" ning merkizi binasida kechlik ziyapetke qedem teshrip qildi. "Gollandiye diyanet ishliri wexpi"ning re'isi bülent shen'ay ependining sahibxaniliqida tüzülgen bu ziyapetke türkiyidiki aq partiyisining re'is yardemchisi, almaniye millet wekili aqil gülle ependi, gollandiye millet wekili weyis gün'gür we "Gollandiye noghay türkliri jem'iyiti"ning wekili beyxan ebey xanim qatarliq her sahe ehlilirimu teklip qilin'ghan bolup, öz-ara dostluq, qérindashliq, ittipaqliq we hemkarliq meqset qilin'ghan türlük sahelerde pikir almashturdi we ehdileshti.

Aqil gülle ependining hékimetlik nesihetliri, bulent shen'ay ependining qimmetlik pikir-teklipliri we medetliri, beyxan ebey xanimlarning aliy tilekliri, rabiye qadir xanimning tili bilen bayan qilin'ghan nutuqlar Uyghurlarning derdlik yüreklirige melhem boldi. Séyt tumtürk ependining terjimanliqida yigha bilen külkige almiship turuwatqan söhbetler bashtin axiri qizghin keypiyatta dawam qilip, ishtirakchilarni memnun qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet