پاكىستاندا گۆرۈدىكى خىتاي ئىنجېنىرلارنى قۇتقۇزۇش ھەركىتى قانلىق ئاخىرلاشتى


2004-10-14
Share

پاكىستان قىسىملىرىنىڭ جەنۇبىي ۋازىرىسىتاندىكى خىتاي تۇتقۇنلارنى قۇتقۇزۇش ھەركىتى قانلىق ئاخىرلاشتى . گۆرۈدىكى خىتاي تۇتقۇنلارنىڭ بىرى پاكىستان قىسىملىرى تەرىپىدىن قۇرتۇلدۇرۇۋېلىندى , تۇتقۇنلارنىڭ يەنە بىرى قۇتقۇزۇش ھەركىتى جەرىيانىدا ئۆلدى . ئۆلتۈرۈلگەن خىتاي ئىنجېنىرنىڭ ئىسمى ۋاڭ پىڭ بولۇپ ، ۋاڭ ئېندى ئىسمىدىكى تۇتقۇنلارنىڭ يەنە بىرى قۇتۇلدۇرۇۋېلىندى . گۆرەدىكى خىتاي تۇتقۇنلار جەنۇبىي ۋازىرىستاندىكى گۇمال زام سۇ ئامبىرى قۇرۇلۇشىغا قاتنىشىۋاتقان دۆلەت ئىگىلىكىدىكى خىتاي سۇ ۋە ھىدرو ئېنىرگىيە قۇرۇلۇش شىركىتىگە تەۋە خادىملار بولۇپ ، ئۇلار 9 - ئۆكتەبىر كۈنى ئۆزىنى جەنۇبىي ۋازىرىستاندىكى مۇسلىمان پىدائىلارنىڭ قوماندانى دەپ ئاتىۋالغان سابىق تالىبان كاماندىرى ئابدۇللا مەسئۇدنىڭ قول ئاستىدىكى مۇسلىمان پىدائىلار تەرىپىدىن گۆرۈگە ئېلىنغان .

پاكىستان ئامانلىق قىسىملىرى پەيشەنبە كۈنى گۆرۈگە ئالغۇچىلارنىڭ چاقمالاي رايۇنىدىكى تۇرالغۇسىغا ھۇجۇم قوزغىدى . پاكىستان ئۇچۇر مىنىستىرى شەيخ رەشىدى ، ئالاھىدە ھەركەت قىسىملار گۆرۈدىكى خىتايلار تۇتۇپ تۇرىلىۋاتقان ئۆيدىن ئوق ئاۋازى ئاڭلانغاندىن كېيىن مۇسلىمان پىدائىلار تۇرالغۇسىغا ھۇجۇم باشلىغانلىقىنى بىلدۈردى . پاكىستان ھەربىي تەرەپ باياناتچىسى ، قۇتقۇزۇش جەرىيانىدا ئۆلگەن خىتاي ئىنجېنىر پىدائىلار تەرىپىدىن ئۆلتۈرۈگەنلىكىنى ئىلگىرى سۈرگەن . خىتايلارنى گۆرۈگە ئېلىۋالغان بەش نەپەر مۇسلىمان پىدائى پاكىستان قىسىملىرى تەرىپىدىن ئۆلتۈرۈلدى . پاكىستان ھەربىي تەرەپ باياناتچىسى گېنېرال شاۋكەت سۇلتان ، قۇتقۇزۇش تىرىشچانلىقىنىڭ نەتىجە قازىنايمىغانلىقىنى تەكىتلىگەن . ئۇ مۇنداق دەيدۇ : ئامانلىق قىسىملىرى پىدائىلار تۇرالغۇسىغا ھۇجۇم قىلدى . گۆرۈگە ئالغۇچىلارنىڭ بەشىلىسى ئۆلتۈرۈلدى . گۆرۈدىكى خىتاي ئىنجېنىرلارنىڭ بىرى قۇتۇلدۇرۇۋېلىندى .

ئابدۇللا مەئۇدنىڭ قول ئاستىدىكى مۇسلىمان پىدائىلار گۆرۈدىكى خىتايلارنى جەنۇبىي ۋازىرىستاننىڭ چاقمالاي رايۇنىدىكى تۇرالغۇسىدا تۇتۇپ تۇرىۋاتاتتى . پاكىستان پايتەختى كابۇلنىڭ 330 ك م غەربىي جەنۇبىغا توغرا كېلىدىغان بۇ جاي پاكىستان ئامانلىق قىسىملىرى تەرىپىدىن قورشىۋېلىنغان . پاكىستان دائىلىرى گۆرۈگە ئېلىۋېلىش ۋەقەسى يۈز بېرىپ 6 كۈندىن كېيىن قۇتقۇزۇش ھەركىتى ئېلىپ باردى . بۇ جەرىياندا پاكىستان ھۆكۈمىتى جەنۇبىي ۋازىرىستاندىكى قەبىلە ئاقساقاللىرىنى ئابدۇللا مەخسۇد بىلەن تۇتقۇنلار مەسىلىسى بويىچە سۆھبەت ئېلىپ بېرىشقا يوللىغان ، بىراق پىدائىلارنىڭ تۇرالغۇسى سۆھبەت داۋام قىلىۋاتقاندا ھۇجۇمغا ئۇچرىدى . پىدائىلار پاكىستان ھۆكۈمىتىدىن جەنۇبىي ۋازىرىستاندىكى ھەربىي ھەركىتىگە خاتىمە بېرىش ، پاكىستان تۈرمىسىدىكى ئۆزبەك مۇجاھىتلارنى قويۇپ بېرىشنى تەلەپ قىلغان

ئابدۇللا مەسئۇد 10 - ئۆكتەبىر كۈنى جەنۇبىي ۋازىرىستاندىكى جاندۇلايدا مۇخبىرلارنى كۈتۈۋېلىپ ، پاكىستان ھۆكۈمىتى شەرتىنى قوبۇل قىلمىغان ئەھۋالدا " تۇتقۇنلارنىڭ بىرىنى ئۆلتۈرۈۋېتىمەن " دەپ ئاگاھلاندۇرغان ئىدى . ئۇ ، ھەر قانداق كىشىنىڭ گۆرۈدىكىلەرنى قورال كۈچى بىلەن قۇتقۇزۇش ھەركىتى تۇتقۇنلارنىڭ ئۆلتۈرۈلۈشىگە سەۋەپ بولىدۇ دەپ تەكىتلىگەن . پاكىستان خىتاينىڭ ئۇزۇن مەزگىللىك تىراتىگىيەلىك دوستى ، بىراق بۇ ۋەقە مۇناسىۋېتى بىلەن پاكىستان خىتاينىڭ دىپلوماتىيە جەھەتتىكى كۈچلىك بېسىمىغا دۇچ كەلگەن . پاكىستان تاشقى ئىشلار مىنىستىرى قاسۇرى ، پەيشەنبە كۈنى ئىسلامئابادتىكى خىتاي ئەلچىخانىسىغا بېرىپ ، خىتاي ئىنجېنىرى ۋاڭ پىڭنى قۇتۇلدۇرالمىغانلىقى مۇناسىۋېتى بىلەن ئەپۇ سورىدى .

ئۇ ، پاكىستان دائىلىرى خىتاي تۇتقۇنلارنىڭ بىخەتەرلىكى ۋە سالامەت قۇتۇلۇشى ئۈچۈن ئەڭ زور تىرىشچانلىق كۆرسەتتى دەپ تەكىتلىگەن . ئۇ يەنە بۇنىڭدىن كېيىن پاكىستاندىكى خىتايلارنىڭ بىخەتەرلىكىنى قوغداش يولىدا قاتتىق تەدبىرلەر ئالىدىغانلىقىنى ۋەدە قىلغان . پاكىستاندىكى خىتاي باش ئەلچىسى جاڭ چۈنشياڭ ئالدىنقى كۈنى پاكىستان تاشقى ئىلار مىنىستىرلىكى سېكرىتارى رىياز قاھار بىلەن كۆرۈشۈپ ، گۆرۈدىكى خىتايلارنىڭ ھاياتىغا كاپالەتلىك قىلىشنى تەلەپ قىلغان . بىراق بۇ قېتىمقى قۇتقۇزۇش ھەركىتى تۇتقۇنلارنىڭ بىرىنىڭ ئۆلۈمى بىلەن ئاخىرلاشتى . خىتاي باش ئەلچىسى جاڭ چۈنشياڭ ھال سورىغىنى كەلگەن پاكىستان تاشقى ئىشلار مىنىستىرىگە ، ئىسلاماباد دائىلىرىنىڭ تۇتقۇنلارنى قۇتقۇزۇش يولىدا كۆرسەتكەن تىرىشچانلىقى مۇناسىۋېتى بىلەن رەخمەت ئېيتتى .

خەۋەرلەرگە قارىغاندا ئۆلگەن خىتاي ئىنجېنىرنىڭ جەسىتى شۇ كۈنى پاكىستان پايتەختىگە ئېلىپ كېلىنگەن . خىتاي ئىنجېنىرلارنى گۆرۈگە ئېلىۋېلىش ۋەقەسى يېقىنقى 5 ئاي ئىچىدە پاكىستان - ئافغانىستان رايۇنىدىكى خىتاي گرازدانلىرىغا ئالاقىدار 3 - ۋەقە بولۇپ ھىساپلىنىدۇ . بۇ يىل 5 - ئايدا خىتاينىڭ پاكىستاندىكى گۋادار پورت قۇلۇرۇشىغا ياردەملىشىۋاتقان خىتاي تەخنىكلارنىڭ ئۇچى ، ماشىنىغا ئورۇنلاشتۇرۇلغان قەرەللىك بومبىنىڭ پارتىلىشى بىلەن ئۆلگەن . بۇ يىل يەنە ئافغانىستاندا يول ياساۋاتقان خىتاي ئىشچىلار قوراللىق ھۇجۇمغا ئۇچراپ ، 11 خىتاي ئىشچى ئۆلگەن ئىدى . (ئەركىن)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت