Pakistanda görüdiki xitay injénirlarni qutquzush herkiti qanliq axirlashti

Pakistan qisimlirining jenubiy wazirisitandiki xitay tutqunlarni qutquzush herkiti qanliq axirlashti . Görüdiki xitay tutqunlarning biri pakistan qisimliri teripidin qurtulduruwélindi , tutqunlarning yene biri qutquzush herkiti jeriyanida öldi . Öltürülgen xitay injénirning ismi wang ping bolup , wang éndi ismidiki tutqunlarning yene biri qutulduruwélindi . Görediki xitay tutqunlar jenubiy waziristandiki gumal zam su ambiri qurulushigha qatnishiwatqan dölet igilikidiki xitay su we hidro énirgiye qurulush shirkitige tewe xadimlar bolup , ular 9 - öktebir küni özini jenubiy waziristandiki musliman pida'ilarning qomandani dep atiwalghan sabiq taliban kamandiri abdulla mes'udning qol astidiki musliman pida'ilar teripidin görüge élin'ghan .

Pakistan amanliq qisimliri peyshenbe küni görüge alghuchilarning chaqmalay rayunidiki turalghusigha hujum qozghidi . Pakistan uchur ministiri sheyx reshidi , alahide herket qisimlar görüdiki xitaylar tutup turiliwatqan öydin oq awazi anglan'ghandin kéyin musliman pida'ilar turalghusigha hujum bashlighanliqini bildürdi . Pakistan herbiy terep bayanatchisi , qutquzush jeriyanida ölgen xitay injénir pida'ilar teripidin öltürügenlikini ilgiri sürgen . Xitaylarni görüge éliwalghan besh neper musliman pida'i pakistan qisimliri teripidin öltürüldi . Pakistan herbiy terep bayanatchisi général shawket sultan , qutquzush tirishchanliqining netije qazinaymighanliqini tekitligen . U mundaq deydu : amanliq qisimliri pida'ilar turalghusigha hujum qildi . Görüge alghuchilarning beshilisi öltürüldi . Görüdiki xitay injénirlarning biri qutulduruwélindi .

Abdulla me'udning qol astidiki musliman pida'ilar görüdiki xitaylarni jenubiy waziristanning chaqmalay rayunidiki turalghusida tutup turiwatatti . Pakistan paytexti kabulning 330 k m gherbiy jenubigha toghra kélidighan bu jay pakistan amanliq qisimliri teripidin qorshiwélin'ghan . Pakistan da'iliri görüge éliwélish weqesi yüz bérip 6 kündin kéyin qutquzush herkiti élip bardi . Bu jeriyanda pakistan hökümiti jenubiy waziristandiki qebile aqsaqallirini abdulla mexsud bilen tutqunlar mesilisi boyiche söhbet élip bérishqa yollighan , biraq pida'ilarning turalghusi söhbet dawam qiliwatqanda hujumgha uchridi . Pida'ilar pakistan hökümitidin jenubiy waziristandiki herbiy herkitige xatime bérish , pakistan türmisidiki özbek mujahitlarni qoyup bérishni telep qilghan

Abdulla mes'ud 10 - öktebir küni jenubiy waziristandiki jandulayda muxbirlarni kütüwélip , pakistan hökümiti shertini qobul qilmighan ehwalda " tutqunlarning birini öltürüwétimen " dep agahlandurghan idi . U , her qandaq kishining görüdikilerni qoral küchi bilen qutquzush herkiti tutqunlarning öltürülüshige sewep bolidu dep tekitligen . Pakistan xitayning uzun mezgillik tiratigiyelik dosti , biraq bu weqe munasiwéti bilen pakistan xitayning diplomatiye jehettiki küchlik bésimigha duch kelgen . Pakistan tashqi ishlar ministiri qasuri , peyshenbe küni islam'abadtiki xitay elchixanisigha bérip , xitay injéniri wang pingni qutulduralmighanliqi munasiwéti bilen epu soridi .

U , pakistan da'iliri xitay tutqunlarning bixeterliki we salamet qutulushi üchün eng zor tirishchanliq körsetti dep tekitligen . U yene buningdin kéyin pakistandiki xitaylarning bixeterlikini qoghdash yolida qattiq tedbirler alidighanliqini wede qilghan . Pakistandiki xitay bash elchisi jang chünshyang aldinqi küni pakistan tashqi ilar ministirliki sékritari riyaz qahar bilen körüshüp , görüdiki xitaylarning hayatigha kapaletlik qilishni telep qilghan . Biraq bu qétimqi qutquzush herkiti tutqunlarning birining ölümi bilen axirlashti . Xitay bash elchisi jang chünshyang hal sorighini kelgen pakistan tashqi ishlar ministirige , islamabad da'ilirining tutqunlarni qutquzush yolida körsetken tirishchanliqi munasiwéti bilen rexmet éytti .

Xewerlerge qarighanda ölgen xitay injénirning jesiti shu küni pakistan paytextige élip kélin'gen . Xitay injénirlarni görüge éliwélish weqesi yéqinqi 5 ay ichide pakistan - afghanistan rayunidiki xitay grazdanlirigha alaqidar 3 - weqe bolup hisaplinidu . Bu yil 5 - ayda xitayning pakistandiki gwadar port qulurushigha yardemlishiwatqan xitay texniklarning uchi , mashinigha orunlashturulghan qerellik bombining partilishi bilen ölgen . Bu yil yene afghanistanda yol yasawatqan xitay ishchilar qoralliq hujumgha uchrap , 11 xitay ishchi ölgen idi . (Erkin)