Gu'angshi bobeydiki déhqanlarning hökümetke qarshi naraziliqi metbu'atlarda mulahize qilinmaqta


2007-05-23
Share

Chet'el metbu'atliri bir qanche künlerdin béri, xitayning gu'angshi ölkisi bobey nahiyiside topilang yüz bergenlikini élan qilip keldi. Chet'el metbu'atliri yene gu'angshidin bu ehwalni biwaste igilep téximu éniq uchur bérishke tirishqan bolsimu, emma bu heqte jawab alalmighan bolup, 23 ‏- may küni xitay da'iriliri heqiqeten 28 ademning topilang sewebidin qolgha élin'ghanliqini bildürdi. Töwende bu heqte muxbirimiz eqide silerge melumat béridu.

Bu qétimqi topilang xitayda yéqindin béri yüz bergen eng chong topilangdin biri hésablinidu

Ötken heptining axiri, gu'angshidiki eng namrat bobey nahiyiside zor kölemde topilang yüz bérip, xelq ammisi bilen saqchilar otturisida toqunush meydan'gha kelgen shuningdek topilangda nechchiligen ademning ölgenliki , nechche onlighan kishilerning yarilan'ghanliqi heqqidiki xewerler taraldi.

Bir qisim metbu'atlarda yene, hökümet binasining köydürülgenliki, mashinilarning urup chiqip öriwitilgenliki, ishxanilarning bulang - talanggha uchrighanliqi élan qilin'ghan idi. Emma hökümet organliri adem ölgenlikini ret qildi.

Bu qétimqi topilang hökümetning pilanliq tughut siyasiti tüpeyli meydan'gha kelgen bolup, gu'angshi bobey nahiyiside yüz bergen toplushup naraziliq bildürüsh weqeside, xelq ammisi bilen saqchilar qattiq toqunushqan iken.

Xongkongdiki alma gézitide topilanggha qatnashqan adem sani 50 minggha yétidighanliqi xewer qilin'ghan , dungfang gézitide bolsa 10 ming adem déyilgen. Xongkong dungfang gézitide yene topinglangda 5 ademning ölgenliki, buning ichide 3 ining pilanliq tughut xadimliri ikenliki qeyt qilin'ghan.

Chet'ellerdiki metbu'atlarning bu toghriliq bergen xewerliride, bo bey nahiyisidiki 6 yéza we kentte qalaymiqanchiliq yüz bérip, shapo kentide déhqanlarning hökümet binasi aldida naraziliq namayishi uyushturup, hökümetning qopal siyaset yürgüzüsh qilmishi üstidin naraziliq bildürgenliki élan qilin'ghan.

Xelq ammisi hökümet da'irilirining siyasitini " üch xil tügitish siyasiti" dep isim qoyup, " qolgha élip tügitish" " jerimane qoyup tügitish" "axturup tügitish " dep atighan we bu üch xil siyaset bilen artuq perzent körgen ammigha taqabil turuwatqanliqini bildürgen.

Bu qétimqi naraziliq herikiti, zorawanliq toqunushi bilen ayaqlashqan bolup , kent hökümitining binasi aldidiki we qorasi ichidiki aptomobil , motoskilitlar köydürüwétilgen, nurghun ishxanilarmu weyranchiliqqa uchrighan. Nahiyilik hökümet ishxanisining xadimi chet'ellik muxbirlarning ziyaritini qobul qilghanda , heqiqeten hökümet binasining ot quyush hujumlirigha uchrighanliqini éytip bergen.

Metbu'atlarda topilangda az dégende 5 ademning ölgenliki xewer qilindi emma hökümet da'iriliri buni ret qilmaqta

Igiligen melumatlardin toqunushta az dégende 5 adem ölgenliki, nechche on kishi yarilan'ghanliqi ashkarilan'ghan hemde ölgenler namayishqa qatnashquchilar, saqchi we pilanliq tughut xadimliri ikenliki éniqlan'ghan . Biraq hökümet izchil türde topilangda ölüm weqesi yüz bermigenlikini bildürmekte.

Yuqirida tekitlep ötkendek bu qétim yüz bergen topilangning sewebi, pilanliq tughut siyasitining qopalliq bilen ijra qilinishidin kélip chiqqan bolup, xewerlerde bo bey nahiyisining bu yil 28 xil siyaset turghuzup, " tömürdek irade", " tömürdek waste", " tömürdek intizam" dégen chare - tedbirler bilen pilanliq tughut siyasiti yürgüzüwatqanliqi otturigha chiqmaqta.

Mezkür nahiyining pilanliq tughut tedbiride , 1980‏- yilidin kéyin artuq tughulghan bir bala üchün , 70 ming yüen jerimane qoyush békitilgen. Alma géziti, bobey nahiye na bu kent ahalisi lining sözini neqil keltürüp mundaq deydu":eger déhqanlar artuq tughulghan bala üchün jerimane töliyelmise, pilanliq tughut siyasitini ijra qilghuchi xizmet guruppisi axturush charisini qollinip, öy ichide pulgha yaraydighan éliktrik eswablar bolsun, déhqanchiliqta ishlitilidighan qorallar bolsun shuningdek choshqa, kala , qoy, toxularning hemmisini élip kétidu" .

Li sözide yene mundaq deydu": déhqanlar bir yilda aran nechche yüz yüen pul yighalaydu, hökümetning éghir jerimanisini héchkim tapshuralmaydu, démek bu, hökümetning xelqni tar yerde qistishi bolmay néme, nöwette pilanliq tughut xadimliridin 80 i bashlirigha tömür qalpaq , uchisigha mexsus form kiyip,qollirida tok kaltek, qol sirtmaqlirini kötürüp her küni dégüdek kentke kélip, ikki a'ilide axturush élip bérip, öy ichidiki nerse ‏- kéreklerni yötkep kétiwatidu" .

Hökümet da'iriliri heqiqetke köz yumush we ret qilish pozitsiyisi tutmaqta

Amérika awazi muxbiri bobey nahiyisi shabi yéziliq hökümetke téléfun urup, weqening jeryanini sürüshte qilghanda , ishxana xadimliri muxbirgha " bu ishlardin bizning xewirimiz yoq, rehmet sizge " depla téléfonni qoyuwetken.

Muxbir yene, bobey nahiyilik hökümetke téléfun urghan, xizmetchi xadim" xapa bolmaysiz, bu ishtin éniq xewirim yoqken, men bu yerde nöwetchilik qilimen, ehwaldin toluq xewerdar bolush üchün, bash shitab bilen alaqilishish kérek" dep, nahiyilik hökümet ishxanisining téléfun nomurini muxbirgha bergen, biraq uning bergen téléfun nomuri héch élinmighan.

Muxbir bobey nahiye pilanliq tughut idarisigha téléfun urup, pilanliq tughut qanunlirini ijra qilish tüpeyli kélip chiqqan topilanggha munasiwetlik weqelerni sorighan. Bir pilanliq tughut xadimi bundaq bir weqe yüz bergenlikini ret qilghan.

Muxbir héchqandaq bir jawabqa érishelmigendin kéyin, axiri bobey nahiyilik saqchi idarisigha téléfun urghan we saqchi mashinisining köydürwitilgenlik weqesini sorighan, qarshi terep " yuqirining ruxsitini élip andin sizge jawab bérishke bolidu. Ehwal heqqide méning toluq melumatim yoq , eng yaxshisi téléfonni nahiyilik hökümetke urung " dep téléfun turupkisini qoyuwetken. Muxbir herqandaq qilipmu nahiyilik hökümetning téléfonigha ulishalmighan.

En'giliye b b s radi'o téléwiziye shirkiti muxbirining ziyaritini qobul qilghan , gu'angshi pilanliq tughut komitétining xadimi, ötken yili bo bey nahiyiside artuq perzent élish ehwali ewj alghanliqini, gu'angshi pilanliq tughut komitéti teripidin agahlandurushqa uchrighanliqi sölep bergen, biraq zorawanliq bilen qanun yürgüzüsh ehwalini ret qilghan.

Bobey nahiyisidiki xelq ammisi, pilanliq tughut xadimlirining bobey nahiyisidiki ayallargha mejburiy halda tughut cheklesh opiratsiyisi élip barghanliqini ashkarilighandin sirt, hetta toy qilmighan bir yash qizning tughut iqtidaridin mehrum qaldurulghanliqini melum qilghan . Biraq bu weqening rast ‏- yalghanliqi ispatlanmighan.

Yene bezi kishiler, pilanliq tughut xadimlirining, artuq perzent körgüchilerning banka hisab nomurlirini tonglitiwetkenlikini inkas qilghan bolup, eger üch kün'giche jerimane tölimise nurghun kishilerning bankidiki pulliri köyidiken.

Xitay da'irilirining pilanliq tughut siyasiti yalghuz xitay milliti üchünla yolgha qoyulghan bolmastin, xitay bolmighan, xitay nopusidin alahide az dep qariliwatqan Uyghur milliti üstidinmu qattiq ijra qilinmaqta . Chet'ellerde pa'aliyet élip bériwatqan Uyghur teshkilatliri xitay da'irilirining pilanliq tughut siyasitige qarita naraziliqini izchil türde ipadileshtin sirt, bolupmu xitaylarning pilanliq tughut siyasiti yürgüzüsh bahanisida Uyghur ayallirining her xil ayallar késelliklirige giriptar bolushigha sewebchi boluwatqanliqini pash qilmaqta.(Eqide)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet