Amérika hökümiti gu'entanamo mesilisini bir terep qilish pozitsiyi'isini özgertti


2006-07-12
Share
Bu resim 2002-yil 18-yanwar küni dölet mudapi'e ministirliqi teripidin élan qilin'ghan bolup, afghanistandin tutup kélin'genler gu'antanamogha tutup turulmaqta. AFP

Amérika aliy soti yéqinda, prézidént bush teripidin térror gumandarlirini sotlash üchün qurulghan herbiy sotni qanunsiz dep jakarlap, prézidént bushning bundaq sot qurush salahiyiti yoq ikenliki toghrisida höküm chiqirip, mezkur qararida yene, gu'entanamodiki mehbuslargha jenwe kélishimining ramkisi ichide mu'amile qilishi kéreklikini tekitligen idi.

Bu arida aq sarayning bayanatchisi toniy sino: "amérika aliy sotining yéqinda prézidént bushning gu'entanamodiki mehbuslarni sotlash üchün qurghan herbiy soti toghrisida chiqarghan qarari, amérika mudapi'e ministirliqining bu jehettiki siyasitini özgertip, yéngi bir siyaset belgilishige seweb boldi" dédi.

Xelq'ara kishilik hoquq teshkilatliri, gherb döletliri we amérikidiki démokratik partiye rehberliri, amérika aliy sotining bu qararini qizghin qarshi élip, aliy sotning bu qarari amérikining xelq'arada kishilik hoquq we démokratiye mesiliside xunuklishishke bashlighan obrazini qaytidin aqlidi dep körsetti.

Yuqiriqi qarashlardin kéyin, amérika mudapi'e ministirliqi bir uqturush chüshürüp, gu'entanamodiki mehbuslar we dunyaning her qaysi jaylirida amérika herbiy qisimliri teripidin tutup turiliwatqan mehbuslargha jenwe kélishimi boyiche mu'amile qilinidighanliqini bildürdi.

Amérika hökümiti hazirghiche, gu'entanamo we bashqa amérika herbiy türmiliride tutup turiliwatqan mehbuslarni urush esirliri dep étirap qilmighan idi. Mudapi'e ministirliqining bu yéngi uqturushi amérika hökümitining bu mesilidiki pozitsiyisining özgiridighanliqini körsetmekte.

Gu'entanamo herbiy türmiside tutup turiliwatqan Uyghur mehbusliridin 5 i düshmen küchliri hésablanmay, erkinlikke qoyup bérilgen idi. Emma, mezkur herbiy türmide dawamliq tutup turiliwatqan 17 neper Uyghur mehbusning teqdiri, yenila Uyghurlar nöwette eng muhim dep qarawatqan nazuk mesillerning biri hésablinidu.

Bu munasiwet bilen, muxbirimiz eqide amérika Uyghur birleshmisining sabiq re'isi, adwokat nuri türkel ependini ziyaret qilip, bu heqte melumat igilidi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet