Jurj bush chet'ellerde yoshurun türmilirining barliqini étirap qildi

• Muxbirimiz qanatning bu heqtiki toluq melumati
• Download story audio

Bu resim 2002-yil 18-yanwar küni dölet mudapi'e ministirliqi teripidin élan qilin'ghan bolup, afghanistandin tutup kélin'genler gu'antanamogha tutup turulmaqta. AFP

Amérika prézidénti charshenbe künidiki bayanatida, amérika merkizi axbarat idarisining chet'ellerdiki yoshurun türmiliridin gu'entanamo türmisige élip kélin'gen elqa'ide teshkilati ezalirining sotqa tartilidighanliqini tekitlep, ularni herbiy sotta, sotlash üchün amérika dölet mejlisige bir qanun layihisi sun'ghanliqini bildürdi.

Köpchilikke melum bolghandek, amérika aliy soti, prézidént bush teripidin gu'entanamoda tutup turuluwatqan térror gumandarlirini sotlash üchün qurulghan alahide herbiy sotni qanunsiz dep jakarlap, prézidéntning bundaq sot qurush salahiyiti yoq ikenlikini bildürgen idi.

Amérika dölet mejlisidiki démokrat partiyisi wekilliri shundaqla bezi nopuzluq jumhuriyetchiler prézidént bush hökümiti teripidin térror gumandarlirini sotlash mesiliside sunulghan qanun layihisige qarshi chiqmaqta chünki mezkur qanun layihiside sotqa tartilidighan térror gumandarlirigha ularni eyiblesh üchün ishlitilgen pakit‏-deliller körsitilmeydiken.

Mutexessisler, prézidént bushning kishilik hoquq teshkilatliri we bolupmu amérikining yawropadiki ittipaqdashlirining qattiq tenqidige uchrighan amérika merkizi axbarat idarisining chet'ellerdiki yoshurun türmilirining barliqini étirap qilip, mezkur türmilerde tutup turulghan xald sheyx muhemmet, remzi bin elshéb we ebu zubeyde qatarliq elqa'ide teshkilati rehberlirining gu'entanamodiki herbiy türmige élip kélin'genlikini ashkarilishini, türlük tebirlimekte.

Bezi mutexessisiler, prézidént bush charshenbe küni amérika merkizi axbarat idarisining chet'ellerdiki yoshurun türmiliride tutup turulghan elqa'ide ezalirini sotqa tartish üchün gü'entanamo türmisige yütkigenlikini ashkarilash we térror gumandarlirini sotlash üchün amérika dölet mejlisige qanun layihisi sunush arqiliq, bir tereptin özining hökümitining térror gumandarlirining mesilisini bir terep qilishta yaratqan selbiy obrazini yaxshilashni hemde amérikida noyabir éyida dölet mejlisi üchün élip bérilidighan saylam harpisida hökümetning térrorchiliqqa qarshi küreshte ghelibe qilghanliqini körsitishni meqset qilghanliqini bildürmekte.

Bezi mutexessisiler bolsa, prézidént bushning 11‏- sintebir térrorluq weqesining pilanlinishida asasliq rol oynighan elqa'ide teshkilatining 14 aliy derijilik rehbirini amérika merkizi axbarat idarisining chet'ellerdiki yoshurun türmiliridin gu'entanamo türmisige yütkep kélish arqiliq, gu'entanamo türmisining taqilishi üchün élip bériliwatqan pa'aliyetlerni ajizlashturghanliqini bildürmekte.

Emma, amérikidiki Uyghur adwukati nuri türkel, xald sheyx muhemmet qatarliq elqa'ide teshkilatining 14 aliy derijilik rehbirining gu'entanamo türmisige élip kélin'genliki, xelq'ara jama'etning diqqitini téximu köp gu'entanamogha tartip, bu herbiy türmini taqash toghrisida mewjut bésimni téximu kücheytidu, deydu. (Qanat)