Gu'entanamodiki yene bir türküm tutqunlarning tizimliki élan qilindi


2006-05-16
Share
Gu'entanamodin yéqinda albaniyige orunlashturulghan besh Uyghurning biri - adil ablikim. Resimni adilning adwokati sabin willet ependi teminligen.

Amérika dölet mudapi'e ministirliqi kubaning gu'entanamo arilidiki yene bir türküm tutqunlarning isimlikini élan qildi. Dölet mudapi'e ministirliqi düshenbe küni élan qilghan 201 neper tutqun, amérika da'iriliri bu yil 19 - april küni élan qilghan 558 neper tutqunning ichidiki kishiler emes. Isimliki yéngi élan qilin'ghan tutqunlar ilgiri amérika da'iriliri teripidin qoyup bérilgenler yaki bashqa döletlerge ötküzüp bérilgenlerni asas qilghan. Buning bilen gu'entanamoda tutup turulghan yaki hazirghiche tutup turuluwatqan tutqunlarning sani 758 ge köpeygen boldi.

Isimliki 19 - april küni élan qilin'ghan 558 neper tutqun 2004 - yili 6 - ayda qurulghan amérika alahide herbiy sot kolligiyiside soraqqa tartilghan kishilerni asas qilghan.

Tizimlikte 20 nechche neper Uyghurning ismi bar

Amérika dölet mudapi'e ministirliqining bayanatchisi briyan witman, "sani 200 etrapidiki bu kishiler alahide herbiy sot kolligiyiside soraqqa tartilmighanlarni asas qilidu. Chünki ular alahide herbiy sot kolligiyisi qurulushtin burun qoyup bérilgenler yaki bashqa döletlerge yötkep kétilgenler " dep körsetti.

Tizimliktiki 758 neper tutqunning ichide gu'entanamodin aldinqi hepte qoyup bérilgendin kéyin albaniyege orunlashturulghan we bu dölettin siyasiy panahliq tiligen besh neper Uyghur shundaqla hazirghiche gu'entanamoda tutup turuluwatqan 17 neper Uyghur tutqun bilen bille,az dégende 2 neper qazaqistan tewelikidiki Uyghur we bir se'udi tewelikidiki Uyghur bar. Uyghur tutqunlarning eng chongi 41 yashtiki erkin maxmud, eng kichiki 22 yashtiki haji muhemmet ayup. Haji muhemmet ayup albaniyige qoyup bérilgen 5 neper Uyghur tutqunning biri. Gerche amérika hökümiti 5 Uyghurni qoyup bergen bolsimu, lékin qalghan 17 neper Uyghur tutquni "düshmen jengchiliri" dégen salahiyet boyiche gu'entanamodiki lagirda dawamliq tutup turmaqta.

17 Neper Uyghur düshmen jengchisi dep tutup turulmaqta

Amérika dölet mudapi'e ministirliqining gherbiy yérim shar ishliri boyiche bayanatchisi komandir j. D gordonning eskertilishiche, gu'entanamodiki qépqalghan 17 neper Uyghur "düshmen jengchisi" süpitide tutup turuluwatqan bolsimu, lékin bu, ularning kelgüside 3 - bir döletke qoyup bérilmeydighanliqidin dérek bermeydiken.

Komandir gordon muxbirimizgha "bu yerde qépqalghan Uyghurlarning salahiyiti yéqinda düshmen jengchisi emes, dep qoyup bérilgen Uyghurlardin perqlinidu. Ular bu katigoriyidiki kishiler emes. Ular bu yerde dawamliq düshmen jengchisi, dégen salahiyet bilen tutup turulmaqta " dep körsetti. Lékin komandir gordonning eskertishiche, "bu dégenlik bu yerdiki Uyghurlarning 3 - bir döletke qoyup bérilmeydighanliqidin dérek bermeydu. Peqet dölet mudapi'e ministirliqi ularni qoyup bérish mesiliside bir qarargha kelmigen. U, " biz ishning tereqqiyati qandaq bolidighanliqini bilmeymiz. Buni kütüshimizge toghra kélidu " deydu.

Uyghurlarning adwokati ular düshmen jengchisi emes dep erz sundi

Nöwette gu'entanamodiki 9 neper Uyghur tutqunning dilosi amérika fédéral sot mehkimisi we herbiy sot kolligiyisining qayta körüp chiqishini kütüp turmaqta.

Amérika Uyghur jem'iyitining re'isi nuri türkelning ashkarilishiche, yuqiriqi 9 neper tutqunning adwokati herbiy sot kolligiyisining Uyghur tutqunlarni "döshmen jengchisi" dep békitkenlikige narazi bolup, fédéral sot mehkimisi we herbiy sot kolligiyisige erz sun'ghan.

Amérika qoshunliri 2001 - yili 10 - ayda afghanistan'gha herbiy hujum qozghighanda, hazir gu'entanamoda tutup turuluwatqan Uyghurlarning köp qisimi afghanistanning tora bora rayonidiki Uyghur herbiy telim - terbiye lagiridin ayrilip pakistan'gha barghan we shu jayda pakistan da'iririliri teripidin qolgha élinip amérikigha tapshurup bérilgen. Shu qétim amérikigha tutup bérilgen 18 neper Uyghur jengchining 5 nepiri albaniyige orunlashturulghan Uyghurlar idi.

Nuri türkel, amérika herbiy sot kolligiyisi teripidin "düshmen jengchisi emes" dep aqlan'ghandin kéyin yéqinda albaniyige bérip orunlashqan Uyghurlar bilen, "düshmen jengchisi" dep békitilgen gu'entanamodiki Uyghurlarning arqa körinishi pütünley oxshaydighanliqini bildürdi.

Esli amérika fédéral ottura sot mehkimisi 5 - ayning 8 - küni albaniyige orunlashturulghan 5 neper Uyghurning ichidiki adil ablikim we ababekri qasimlarning dilosini körüp chiqmaqchi idi. Lékin ular albaniyige élip kétilgenliki üchün soti bikar qilindi.

Yéqinda yene bir türküm Uyghurlar qoyup bérilishi mumkin

Nuri türkelning eskertishiche, nöwette gu'entanamodiki Uyghurlarning dilosi osama bin ladin'gha shopurluq qilghan salim exmed hamdanning dilosigha amérika aliy sot mehkimisining qandaq qarar bérishini kütüp turmaqta.

Nuri türkelning eskertishiche, gu'entanamoda qépqalghan 17 neper Uyghurning "düshmen jengchisi" dep békitilishide ularning lagirdiki ipadisi we terjime xataliqi qatarliq amillar rol oynighan bolushi mumkin. Lékin u, amérika da'irilirining yéqinda 141 neper tutqunni qoyup béridighanliqini we buning ichide bezi Uyghurlarning bolush éhtimali barliqini bildürdi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet