Тәйвәндики гоминдаң партийисиниң рәиси хитай чоң қуруқлуқини зиярәт қилди


2005-04-26
Share
LienChan0426.jpg
26-Април күни, тәйвән гоминдаң рәһбири лйән җән аяли фаң йү билән нәнҗиң айродорумиға йетип кәлди. AFP

Тәйвәндики әң чоң өктичиләр гуруһи гоминдаң партийисиниң рәиси лйән җән, сәйшәнбә күни хитай чоң қуруқлуқидики зиярәт сәпириниң тунҗи бекити нәнҗиңгә йетип келип, 1949 - йилдин кейин хитай чоң қуруқлуқини зиярәт қилған гоминдаң партийисиниң тунҗи рәһбири болуп қалди.

Лйән җән, сәйшәнбә күни нәнҗиңдә хитай даирилириниң тәнтәнилик күтүвелишиға еришкән. Әмма у, нәнҗиңгә қарап йолға чиқиш алдида тәйбей айдурумида лйән җәнни қоллиғучилар билән униңға қарши турғучилар оттурисида тоқунуш йүз бәрди. Униңға қарши турғучилар лйән җәнни тәйвәнгә хиянәт қилиш билән әйиблигән.

Лйән җән: тәйбей билән нәнҗиңниң арилиқи йирақ әмәс

Лйән җән нәнҗиң айдурумида сөз қилип, гоминдаңниң икки қирғақ тинчлиқини вә муқимлиқини илгири сүрүш йолида " риштә бағлайдиғанлиқини" җакарлиди. У, зияритиниң мәқситини " тәйвән боғузи икки қирғиқиниң җидди мунасвитини юмшитиш," дәп чүшәндүргән. Тәйвән президенти чен шүйбйән дәсләпки чағларда лйән җәнниң хитай чоң қуруқлуқини зиярәт қилиш пиланиға қарши чиққан. Әмма у, йәкшәнбә күни позитсийисини юмшатти.

Лйән җән нәнҗиңдики баянатида, " тәйбей билән нәнҗиңниң арлиқи анчила йирақ әмәс дейишкә болиду, әмма баям мән айропилан қониватқанда бу йәргә келиш үчүн 60 йил күтүшкә тоғра кәлгәнликини ойлидим. Һәқиқәтән наһайити узун вақит кәтти", дәп тәкитлигән. Хитай компартийиси 1949 - йили һакимийәтни тартивалғандин кейин, гоминдаңниң хитай чоң қуруқлуқи билән болған мунасивити пүтүнләй үзүлгән.

Лйән җән: нәнҗиңни җоңхуа мингониң пайтәхти

LienProtesters0426.jpg

Лйән җән, гоминдаңниң нәнҗиң шәһири билән тарихий вә һессият бағлиниши барлиқини билдүрди. Лйән җән мундақ дәйду: " нәнҗиң гоминдаң үчүн алғанда тарихий вә һессият җәһәттин бағланған шәһәр. Тарихий нуқтидин алғанда нәнҗиң җоңхва минго һөкүмитиниң пайтәхти, шундақла партийә вә дөләт атиси сүн җоңсән әпәнди ятқан җай."

Бирләшмә ахбарат агентлиқи, лйән җәнниң зияритини бейҗиң даирилириниң тәйвәндики демократийә тәрәққият партийисигә қарши өктичиләрни өзигә тартиш һәрикити, дәп көрсәтти.

Лйән җән: чоң қуруқлуқтики сәпирим икки қирғақниң ортақ келәчикини яритиш

Лйән җән, мән чоң қуруқлуқтики зияритини " бир тарихи қәдәм," дәп тәриплигән. Лйән җәнни хитай дөләт кабинтиниң тәнвән ишлар ишханиси мудири чин йүнлин қатарлиқлар күтүвалди. Лйән җән мундақ деди: " бу қетимқи чоң қуруқлуқ сәпиримиз, мениңчә икки қирғақниң ортақ келәчикигә мунасивәтлик өз ара мәнпәәт йәткүзүш, һәмкарлишиш шундақла тинчлиқ асасидики келәчәкни қандақ яритиш көпчилик баш қатуриватқан мәсилә. Җоңго гоминдаңи буниңға охшаш тинчлиқ вә муқимлиқ асасидики икки қирғақ мунасвитини яритиш йолида риштә бағлашни халайду."

Америка, тәйвән боғузиниң һазирқи һалитини өзгәртишкә қарши

LienProtestersBanner0426.jpg

Лйән җәнниң чоң қуруқлуқтики зияритини тәнқид қилғучилар, лйән җәнни бейҗиң һөкүмитиниң униңдин пайдилинип тәйвәнликләрни икки бөлүшигә йол қоюш билән әйиплимәктә. Әмма тәйвәнликләр мустәқиллиқ елан қилиш яки тәйвәнниң һазирқи һалитини сақлаш мәсилисидә икки бөлүнгән.

Бейҗиң һөкүмитиниң тәйвәнгә қорал ишлитигә қарши турған америка, тәйвән боғузиниң һазирқи һалитини бир тәрәплимилик өзгәртиш йолидики һәр қандақ һәрикәткә қошулмайдиғанлиқини әскәртип кәлди. Америка ташқи ишлар министири кондилиза райис, бу йил 3 - айда хитайни зиярәт қилғанда, бейҗиң даирилиригә америкиниң юқириқи мәйданини йәнә тәкитлигән.

Гоминдаң рәиси лйән җәнниң чоң қуруқлуқтики сәпиригә униң ханими билән биргә гоминдаңниң муавин рәиси җаң биңкүн, ву бошйоң, лин диңҗилар һәмра болди. Җаңсу өлкисидики даириләр шу күни лйән җәнниң шәрипигә күтүвелиш зияпити бәргән. Лйән җән башчилиқидики гоминдаң өмики чоңқуруқлуқтики шаңхәй, бейҗиң, шиән қатарлиқ шәһәрләрни зиярәт қилиду.У, 29 - априлда хитай дөләт рәиси ху җиңтав билән учрушидикән. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт