Yemenler hakimiyetni tinchliq bilen yötkesh üchün tirishmaqta

Yemende re'is abdulla salih hakimiyitige qarshi namayish bashlan'ghan'gha bir qanche ay bolup qalghan bolsimu, yemendiki namayishchilarning telipi emelge éship bolalmighan.
Ixtiyariy muxbirimiz ömerjan
2011.06.23
yemen-namayish-salih-305.jpg Yemen namayishchiliri re'isi éli abdulla salihning se'udidin qaytip kélishige qarshiliq bildürüp namayish qilmaqta. 2011-Yili 6-iyun.
AFP

Bügünki künlerde yemenlikler hakimiyetni tinchliq bilen éli abdulla salihning qolidin élish ishini muzakire qilmaqta iken.

Tehlilchilerge köre, yemen xelqining köp sanliqi péqirliq ichide hayat kechüridiken, yemenning tebi'iy bayliqi we az tola pen-téxnikisi bar turup xelqning turmushining hazirghiche yaxshilinip kételmigenliki peqet 34 yildin biri hakimiyet üstide bolup kelgen éli abdulla salihning netije qazinalmighanliqi sewebidin iken.

Tunis bilen misirda namayish partlishi bilen tengla yemende omumyüzlük xelq namayishi kötürülgen bolsimu, yemendiki asasliq küchler yemen re'isi éli abdulla salihning tughqanlirining qol astida bolghanliqidin, ish bunchilik uzun'gha sozulup ketken iken. Chünki yemenning saqchi orgini, dölet mexpiyetlik idarisi we armiye qomandanliqining hemmisi yemen re'isning eng yéqin tughqanlirining qolida iken.

Se'udi erebistanida chiqidighan “El bilad” gézitining 2011-yili 23-iyun künidiki xewirige asaslan'ghanda, yemen re'isi hazir se'udi erebistanining paytexti riyad shehiridiki mexsus doxturxanida dawalinishini dawam qilduruwatqan bolup, u pat arida yemen'ge qaytmaydiken.

Yene bashqa xewerlerge köre, hazir éli abdulla salihning yemendiki ishlar bilen alaqisi üzülgen, hetta yemenning ishliri pütünley uning qolidin chiqip ketken, peqet oning yandashlirila hakimiyetni saqlap turmaqta iken.

Yemenler hakimiyetni tinchliq yoli bilen yötkesh yolida

Misirning “El éhram” gézitining 2011-yili 23-iyun künidiki xewirige köre, hazir yemendiki barliq siyasiy küchler bir arigha kélip, yemen hakimiyitini xelqning qoligha tinchliq yoli bilen ötküzüshning muzakirisini qilmaqta iken.

Yemen siyasiy küchliri hazirqi hakimiyetning ademlirinimu qatnashturghan halda chong yighin chaqirghan. Yighinda ular éli abdulla salihning mundin kéyin, hakimiyet tutushining mumkin emeslikini, shunga hazirdin bashlap uning ornigha olturidighan shexsni teyinlesh kéreklikini otturigha qoyghan.

Yemen re'isi qaytip kelmeydu

Yemen siyasiylardin abdureqib mensur misirning qahire shehiridin misir téléwiziyisige bergen bayanatida mundaq dédi: yemendiki asasliq küch yemen armiyisi bolup, armiye 1962-yilidin béri yemen'ge hökümranliq qilip kelmekte.

2011-Yili 11-féwral küni yemende yashlarning tinchliq namayishi bashlan'ghandin biri armiye sépidin namayishchilargha qoshulup kéliwatqanlarning sani az emes. Bolupmu 21-féwral küni namayishchilar teripige ötken herbiy qomandanlar köp.

Hazirghiche bu qoshulush dawam qilmaqta. Démek, armiye namayishchilarni choqum qollaydu, ular ilgiri ya kéyin bolup choqum namayishchilargha qoshulidu. Hazir éli abdulla salihning tughqanliri bilen yandashliridin bashqa hemmisi xelq terepke ötüp bolghan. Emdi éli abdulla salihning ehwaligha kelsek, epsuski, 3-iyun küni éli abdulla salih hujumgha uchrash seweblik yarilinip, yemendin chiqip ketkinidin béri uning ehwalini 25 milyon yemen xelqining héchqaysisi bilmeydu. Uni yashawatidu, yéqinda qaytip kélidu, dégen xewerlernila anglawatidu.

Hazirghiche yemen re'isining saqliq ehwali toghrisida birer bayanat élan qilinmighan. Hetta re'isning saqliqini ispatlap uning awazimu anglitilmighan. Buningdin melumki, yemen re'isi mundin kéyin yemen'ge kelgen teqdirdimu, uning hakimiyet tutqudek majali yoq. Shunga yemenler hakimiyetni tinchliq yoli bilen tapshurup élish üchün yemende muzakirisini dawam qildurmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.