Афғанистан президенти һамид карзай қәсәм ичип вәзипә тапшурувалди

Һамид карзайниң афғанистан президентлик вәзиписини қәсәм ичип тапшуривелиш мурасими афғанистанниң әнәниви музикиси вә йәсли балилириниң нахшиси билән сәйшәнбә күни, пайтәхт кабулдики авалқи падишаһ сарийида башланди. Йиғинға һәрқайси дөләтләрниң башлиқлири вә муавинлиридин 150 нәччә киши болуп җәмий 600 гә йеқин меһман қатнашти.

Тунҗи қетимлиқ демократик усулда сайланған президент

Һамид карзай мурасимда оң қолини қуранға қоюп һәрқайси дөләт рәһбәрлири вә афғанистан алий сот мәһкимисиниң баш сотчиси алдида өзиниң садақәтмәнликини билдүрүп қәсәм қилди. Һәмдә арқидинла икки нәпәр муавин президентму айрим-айрим һалда қәсәм ичип вәзиписини тапшуруп алди.

Бу афғанистанда тунҗи қетим димократик сайлам арқилиқ шәкилләнгән йеңи рәһбәрлик қатлими һесаблиниду. Шундақла талибан һөкүмити гумран қилинип 3 йилдин кейин, димократик усулда хәлқ сайлап чиққан президентниң рәсимий тәхткә чиқиши, анализчилар тәрипидин афғанситанниң димократик дөләт қуруш мусаписидики муһим бир намайәндә дәп қаралмақта.

Террорчи күчләр йәнила мәвҗут

Һамид карзай вәзипә тапшуривелиш нутуғида, афғанистанда террорчи тәшкилатлар, зәһәрлик чекимлик өсүмлүклирини терийдиған вә әткәсчилик қилидиған тәшкилатларниң техи тәлтөкүс йоқутулмиғанлиқини етирап қилип, буниңда хәлқараниң ярдимигә давамлиқ еһтияҗлиқ икәнликини билдүрди.

Мәзкүр мурасимға йәнә, америкиға вакалитән муавин президент дик чейни вә дөләт мудапиә министири доналд рамзфелд қатнашти. Дик чейни, америка һөкүмити 3 йилниң алдида афғанистанға һуҗум қилип талибан һөкүмитини ағдуруп ташлиғандин буян афғанистанға зиярәткә кәлгән әң юқири дәриҗилик америка әмәлдари болуп һесаблиниду. У мурасимдин кейин, афғанистан президентлик вәзиписини тапшуруп алған һамид карза билән айрим сөһбәт өткүзди. Сөһбәттин кейинки мухбирларни күтивелиш йиғинида, һамид карзай сөз қилип, афғанистанда террорчилиқниң, асасий күч нуқтиинәзиридин қариғанда тармар қилинғанлиқини, әмма террорчи шәхисләр йәнила мәвҗут болуп, афғанистан һөкүмитиниң уларни издәш һәрикитини давамлиқ елип баридиғанлиқини билдүрди. У сөзидә йәнә америка һөкүмитигә рәһмәт ейтиш билән биргә, афғанистанниң террорчилиққа қарши көрәштә хәлқараниң ярдимидин айрилалмайдиғанлиқини тәкитлиди.

Талибан һөкүмити мәңгү қайтип кәлмәйду

Америкиниң муавин президенти дик чейни мухбирларни күтивелиш йиғинида, һамид карзайниң афғанистан президентликикә тәйинләнгәнликини тәбрикләп, афғанистан хәлқиниң буниңдин пәхирлиниши керәкликини билдүрди.

Дик чейни сөзидә, "пүтүн афған хәлқи, һөрмәткә сазавәр, дурус вә йирақни көрәләйдиған бу кишиниң уларниң йеңи димократийисигә йетәкчилик қилидиғанлиқидин пәхирлиниши керәк" деди.

Чейни йәнә, афғанистанлиқларниң тарихтин буян тунҗи қетим кәлгүсигә, әркинликкә вә тинчлиққа үмид билән йүзлиниш имканийитигә игә болғанлиқини, шундақла дунядики әң чоң террорлуқ торини қанат астиға елип кәлгән талибан һөкүмитиниң әмди мәңгү қайтип кәлмәйдиғанлиқини тәкитлиди.

Дик чейни билән доналд рамизфелд мурасим ахирлашқандин кейин сәйшәнбә күни кәчтә афғанистандин айрилди. Һамид карзайниң вәзипә тапшуривелиш мурасими баштин-ахир күчлүк бихәтәрлик чарилири астида елип берилған болуп, мурасим өткүзилидиған җайни мәркәз қилған кабул шәһәр мәркизидики 4 квадират километир район пүтүнләй қамал қилинған. Шундақла америка башчилиғидики бирләшмә армийә қисимлири вә афғанистан һөкүмити әскәрлири һәр бир кочиларни чарлап поста турған.

Талибанлар җим турмиди

Мурасимдин илгири талибан пидаийлири, уларниң мурасим өткүзилидиған җайға һуҗум қилишни пиланлаватқанлиқи һәққидә тәһдит қилған иди. Гәрчә қораллиқ пидаийлар афғанистанниң пакистанға йеқин җайидики чегра қоғдаш понкитиға һуҗум қилған болсиму, әмма қәсәм бериш мурасими йәнила пиландикидәк оңушлуқ елип берилди. Қораллиқ пидаийлар билән афған әскәрлири оттурисидики тоқунушта 8 нәпәр қораллиқ пидаий өлгән вә афған әскәрлиридин 4 и қаза тапқан. Буниңдин сирт йәнә, қораллиқ пидаийлар дүшәнбә күни кәчтә, кабулға йеқин җайға бир ракита қоюп бәргән. Әмма у кабулниң мәркизигә йирақрақ җайлашқан бағрами дигән җайдики бир чарвичилиқ мәйданиға чүшкән болуп, һечқандақ зәхмилиниш әһвали көрүлмигән. (Пәридә)