Insanlarning tunji anisi- hawa anining qebrisi se'udi erebistanda


2007-08-16
Share

Yehudiy, xristiyan we islam dinlirining muqeddes kitablirida, adem eleyhissalam bilen ayali hawaning sheytan'gha egiship allahqa asiyliq qilghanliqi seweblik jennettin chiqirilghanliqi birdek sözlinidu. Bezi samawi kitablarning riwayet qilishiche, insanlarning atisi adem eleyhissalam jennettin chiqirilip, yer yüzige ewetilgende, hindistan'gha chüshken, ayali hawa bilen erefat téghida uchrashqan iken. Bezi riwayetler hawani hazirqi se'udi erebistanning jidde shehirige chüshken we shu jayda depne qilin'ghan dep qaraydu. Shu sewebtin bu sheher jidde (esli nami jedde) yeni(chong ana)dep atalghan iken. Jidde shehiri qizil déngizning sherqiy qirghiqigha jaylashqan sheher bolup, 3000 yilliq tarixqa ige . Bu sheher se'udi erebistanning paytexti riyad shehiridin qalsa ikkinchi chong sheher hésablinidiken. Jidde shehiri uzun yilliq tarixtin béri port shehiri bolup kelmekte .

Miladiye 647- yili üchinchi xelipe osman ibni affanning zamanidin bashlap jidde shehiri hej qilish üchün mekkige kélidighan hajilarni kütüwalidighan portqa aylan'ghan bolup, shundin béri shu xususiyitini saqlap kelmekte. Hazirda hej yaki ömre hej üchün dunyaning herqaysi jayliridin paraxot we ayropilan bilen kelgüchilerning hemmisi, quruqluq bilen kelgüchilerning köpinchisi jidde shehiride kütüwélinip, andin mekkige élip kélinidu. Qaytqanda yene jidde shehiridin qaytidu.

Abdulhémit hajimning éytqanliri

Jidde shehiridiki Uyghurlarning péshqedemliridin abdulhémit hajim insanlarning tunji anisi hawaning qebrisi toghruluq mundaq dédi:" jidde shehirining bey'et meydani dégen jayda qedimqi zamanlardin béri " hawa animizning qebrisi" deydighan meshhur bir qebristanliq bolup, kishiler üzülmestin bu jayni ziyaret qilip kelmekte. Bir yili qeshqerdin selim axun xelpitim dégen kishining oghli abdul mejidxan mexsum dégen kishi hej qilghili kélip bizning öyge chüshken idi.

U kishi hawa animizning qebrisige élip bérishimni telep qilghanliqi üchün, biz qebristanliqqa barduq we shu qebristanliqqa qaraydighanlardin, qebristanliq etrapida olturaqlashqan péshqedemlerdin hawa animizning qebrisi heqqide sorighan iduq. Ular bizge jawab bérip: " hawa animizning qebrisi mushu qebristanliqning ichide bar. Emma uning nechche ming yillar bolghanliqi üchün biz shu qebrining qaysi qebre ikenlikini éniq bilmeymiz", dégen idi. Men eqlimge kelgendin béri her yili dunyaning herqaysi jayliridin hej yaki ömre hej üchün kelgenler bu qebristanliqni ziyaret qilidu. Bolupmu malayshiya, filippin we hindoniziyilerdin kelgenler mexsus aptobuslar bilen bu qebristanliqqa kélip , ziyaret qilip kétidu."

Hawa anining qebrisini ziyaret qilghuchilar köp

Hawa anining qebrisi bar jay jidde shehiridiki eng meshhur qebristanliq bolup, hemishe adem köp, bésiq bolidiken. Jidde shehirining bezi chong yollirida " hawa anining qebristanliqigha baridighan yol" dep qebristanliqqa isharet qilip qoyulghan isharet taxtiliri közge chéliqip turidu. Qebristanliqning aldigha chong xetlik qilip " hawa animizning qebrisi" dégen yéshil reng bilen yézilghan erebche xet bu qebristanliqqa kelgüchilerning eng awwal közige chéliqidu. Qebristanliqning kishilerge erebche we in'glizche chüshendürüsh béridighan mexsus xadimliri bolup, ular hemishe ziyaretchilerning xizmitide bolidu. (Toxti)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet