Түркийидики һайван сөйәрләр җәмийәтлири хитайниң әнқәрә вә истанбулдики әлчиликлириниң алдида намайиш өткүзди


2007-02-14
Share

Әнқәрәдики хитай әлчилики алдида өткүзүлгән намайишта тәбиәтни вә муһитни қоғдаш җәмийитиниң мәсули мелиһа ханим мәтбуат баянатнамиси оқуди.

Түркийәдики һайван сөйәрләр җәмийәтлири хитайниң әнқәрә вә истанбулдики әлчиликлириниң алдида намайиш өткүзди. 2-Айниң 13-күни өткүзүлгән бу намайишқа тәбиәт вә муһитни қоғдаш вә яшнитиш җәмийити , мелиһа йилмаз вәхпи қатарлиқ 8 җәмийәтниң әзалири вә көп сандики һайван сөйәрләр аваз қошти. Хитайниң истанбул консулуси алдида өткүзүлгән намайишқа даңлиқ нахшичи леман сам вә сәргәрдан һайванларни қоғдаш җәмийитиниң башлиқи сүсән әрқуш әпәнди қатарлиқ кишиләр қатнашқан вә мәтбуат баяннамиси оқуған. Әнқәрәдики хитай әлчилики алдида өткүзүлгән намайишта тәбиәтни вә муһитни қоғдаш җәмийитиниң мәсули мелиһа ханим оқиди. Мәтбуат баяннамисида мундақ дейилгән:

"Хитай бүгүн дуняниң әң бүйүк норки чапан ишләп чиқиридиған вә пишшиқлайдиған дөлити. Бу дөләттә ишләп чиқирилған норкиларниң 30%кә йеқини явайи һайванлардин қалғини болса терә завутлириниң қәпәслиридә тутуливатқан һайванларниң терисидин ишлиниду. Униң үстигә хитайда һайванларниң һәқлири тоғрисида һечбир қануни мадда йоқ. Хитайда норки үчүн йетиштүрүлгән явайи һайванларниң арисида түлкә, ракун ити, тошқан қатарлиқлардин сирт, мүшүк вә итларниңму терисини ишлитидиған дөләт. Хәлқаралиқ терә тиҗарәтчилири вә мода лайиһилигүчиләр хитайдин терә елишни таллайду. Чүнки, әмгәк күчи әзан вә һайванларни қоғдаш үчүн һечбир қанун йоқ. Қийнап, тирик турғузуп терилири союлидиған бу һайванларниң терисини алмаслиқ үчүн пәқәт терә чапан алмаслиқ йәтмәйду. Ачқучтин тартип сапма кәшкичә, һайван магизинлирида сетилидиған уюнчуқларғичә хитай мели яки хитайдин импорт қилинған малларниң нурғунида ит вә мүшүкләрниң терилири қоллинилиду. Норки, мәйли қандақ шараитта ишләп чиқирилса чиқирилсун бу бир вәһшиликтур. Әмма хитай дөлити, әзан норки ишләп чиқириш үчүн башқа дөләтләр билән селиштурғили болмайдиған дәриҗидә бир вәһшиликкә көз юммақта. Әзан әмгәк күчи үчүн инсанлиққа ярашмайдиған шараитларда ишлитиливатқан инсанларға охшаш һайванларму вәһши капитализимниң қурбани болмақта . Биз тәбиәт вә муһитни қоғдаш яшитиш җәмийити болуш сүпитимиз билән, мода лаһийилигүчиләрни норки ишлитиштин ваз кечишкә, тиҗарәтчиләрни дуканлирида норки чапанларни яки норки ишлитилгән нәрсиләрни сатмаслиққа, истималчиларни болса норки билән ясалған нәрсиләрни алмаслиққа, пүтүн ахбарат вастилирини бу вәһшийлик һәққидә кишиләрни мәлуматландурушқа, хитай һөкүмитиниң болса норки үчүн өлтүрүливатқан һайванлар учраватқан вәһшиликни аяқлаштуруш үчүн дәрһал бир қанун чиқиришқа чақиримиз. Биз хитай һөкүмити қачан бу қанунни чиқарғучә намайишлиримизға вә тәнқидлиримизгә давам қилимиз".

Мәтбуат баяннамиси аяқлашқандин кейин, биз мелиһа ханимға суал соридуқ. У бизниң хитай һөкүмити инсан һәқ һоқуқлириға һөрмәт қилмастин кишиләргә өлүм җазаси бериватиду, инсан һәқ һоқуқиға һөрмәт қилмиған бир милләт һайванларниң һоқуқиға һөрмәт қиларму сизчә, дегән суалимизға җавап берип мундақ деди:

"Биз инсан вә һайван дәп айримаймиз. Биз үчүн муһим болған пүтүн җанлиқларниң һаятидур. Бу дуняға яритилған пүтүн җанлиқлар биз үчүн наһайити муһим. Биз һәмминиң һәқ һоқуқини қоғдаш үчүн бу йәрдә намайиш қилип туруптимиз".

Қолида "хитайни байқут қилимиз", "2008 - йиллиқ олимпик тәнһәрикәт йиғини хитайда өткүзүлмисун", "хитайдики һайванларға елип бериливатқан қирғинчилиқ тохтитилсун", дегәнгә охшаш лозункилар вә итлирини көтүрүшивалған намайишчилар хитай әлчиханисиниң алдиға қара гүлчәмбирәк қойғандин кейин наразилиқ чаваклири чалди. (Әркин тарим)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт