Сақчилар пакистанда уйғур бовайниң пулини булиған кишини давамлиқ издимәктә

• Мухбиримиз әркинниң бу һәқтики толуқ мәлумати
• Download story audio

Аяли билән биргә өмри һәҗ қилиш үчүн сәуди әрәбистанға маңған вә пакистанниң равалпинди шәһиридә дүшәнбә күни 6 миң доллар пулини икки булаңчиға тартқузуп қойған уйғур бовай һәсәнҗан исмайил сәпирини давамлаштурушқа амалсиз қалди.

Пулсиз қалған бовай булаңчиларниң бирини әтраптики кишиләрниң ярдими билән шу чағниң өзидә тутувелип сақчиға елип барған болсиму, лекин пулини қайтурувалалмиған. Чүнки булаңчиларниң йәнә бири пулни елип қечип кетишкә үлгүргән иди. Равалпиндики сақчилар, мухбиримизға тутулуп қалған булаңчи тәминлигән йип учиға асасән қечип кәткән кишини тепишниң амалини қиливатимиз, дәп тәкитлигән болсиму, лекин равалпиндики уйғурлар пакистан сақчилирини сөрәлмилик қилди, дәп әйиблимәктә.

Һәҗ йолидики пешкәллик

Буниңдин 3 күн илгири уйғур аптоном райониниң қарамай шәһиридин равалпиндиға кәлгән 81 яшлардики һәсәнҗан бовай ханими патигүл ибраһим билән биргә сәуди әрәбистанға берип, муқәддәс земинни тавап қилмақчи вә һәҗ ибадитини биҗа кәлтүрмәкчи болуп йолға чиққан. Равалпиндиниң раҗа базар районида йүз бәргән бу бәхтсизлик бовайға шунчилик еғир кәлгәнки, у мухбиримизниң суаллириға җаваб бериветип көз яшлирини туталмиди.

Пакистан уйғур һаҗиларниң сәуди әрәбистанға бериш вә келиш сәпиридә чүшүп өтүдиған муһим бекити. Анализчиларниң әскәртишичә, пакистан җәмийитидики бихәтәрлик мәсилиси вә хитай билән пакистанниң уйғур мустәқилчи күчлиригә қарши һәмкарлиқи йеқинқи йиллардин бери, һәҗгә бериш вә келиш сәпиридики уйғур һаҗилар үчүн хатирҗәмсиз амили болуп қалған.

Һәсәнҗан бовайниң әскәртишичә, 4 күнниң алдида пакистанға кәлгән бовайниң бешиға кәлгәнләр, дүшәнбә күни униң бир сәпәрдиши билән биргә телефон қилмақчи болуп талаға чиққанда йүз бәрди. Һәсәнҗан бовай вә униң һәмраси булаңчиларниң бирини әтраптики кишиләрниң ярдими билән тутувалған вә шу җайдики сақчи идарисиға елип барған болсиму, лекин булаңчиларниң йәнә бири қечип кетишкә үлгүргән иди. Һәсәнҗан бовайниң әскәртишичә, қечип кәткән булаңчи бовайниң калтә иштиниға чигивалған 6 миң доллар пулини елип қачқан.

Пакистан сақчилири: җинайәтчи қолға чүшүшкә аз қалди

Равалпиндиниң раҗа базири районидики сақчи идарисиниң бир мәсули сәйшәнбә күни мухбиримизға дилониң тәкшүрүлүватқанлиқини билдүрди. Бу әмәлдарниң әскәртишичә, сақчилар пулни елип қачқан кишини қолға чүшүрүшкә тиришмақтикән. Сақчиларниң қачқунға йеқинлишиватқанлиқини тәкитлигән бу әмәлдар, булаңчи пакистанниң куата шәһиридә олтуридиғанлиқини вә униң қолға чүшүшкә аз қалғанлиқини билдүрди.

У, " биз адәмни тутуш үчүн пүтүн тиришчанлиқимизни көрситиватимиз. Уларниң бири қолимизда, лекин уларниң йәнә биригә йеқинлишиватимиз, бу адәмниң куатада олтуридиғанлиқи ениқланди. Уни алдимиздики 2 - 3 күн ичидә қолға чүшүридиғанлиқимизға ишәнчимиз бар" дәйду.

Униң әскәртишичә, пулни елип қачқан киши қолға чүшкәндин кейин бовайниң пули мәлум болидикән. Сақчи "иккинчи киши куатада олтуриду. Биз пәнҗапта туримиз. Куаста пәнҗаптин йирақ йәрдә, лекин шундақтиму биз уни қолға чүшүрүшкә тиришиватимиз" дәп көрсәтти. Униң ашкарилишичә, даириләр дилони куатадики сақчи органлириға мәлум қилған. Лекин дилоға мунасивәтлик уйғурлар пакистан сақчилирини вәқәгә көңүл бөлмиди, дәп әйиблимәктә.

Уйғур муһаҗир: пакистан сақчилирини булаңчиға "миһманға" охшаш муамилә қилди

Пакистанда яшайдиған вәқәдин хәвәрдар бир уйғур муһаҗири пакистан сақчилирини булаңчиға "миһманға" охшаш муамилә қилди, дәп нарази болди. Униң әскәртишичә, һәсәнҗан бовайниң пулини булаш вәқәси пакистанда йүз бәргән тунҗи вәқә әмәс. Бу хил вәқәләр бурун көп қетим йүз бәргән. Улар һазирғичә бу вәқәни пакистандики җуңго әлчиханисиға мәлум қилип улардин ярдәм соримиған.

Пакистанда яшайдиған юқириқи уйғур муһаҗирниң әскәртишичә, бурун бу хил вәқәләргә дуч кәлгән уйғурлар җуңго әлчиханисиға берип улардин ярдәм сориған болсиму, лекин әлчихана бу кишиләргә пәрва қилип қоймиғанлиқтин, бу вәқәни җуңго әлчиханисиға мәлум қилип ярдәм сорашниң пайдиси йоқ, дәп қариған.

Пакистан җуңгониң қорал - ярақ, ядро техника җәһәттики дуня бойичә әң ишәнчилик иттипақдиши болупла қалмай, шәрқий түркистан мустәқилчи күчлиригә қарши туруш күришидики һәмкарлашқучиси. Пакистан бу дөләттики уйғур сиясий өктичилирини хитайға өткүзүп бериштә көп ойлинип олтурмайдиған дөләт.

Пакистан даирилири йеқинқи 2 йилдин бери муһәммәд тохти, исмайил қари қатарлиқ уйғур өктичилирини өткүзүп бәргән вә хитай даирилири бу кишиләрни өлүм җазаси вә муддәтсиз қамақ җазалириға һөкүм қилған иди. Һүсәнҗан бовайниң әскәртишичә, униң йенида пул қалмиғанлиқтин я юртиға қайтишни яки сәуди әрәбистанға беришни биләлмәй қалған. (Әркин)