Saqchilar pakistanda Uyghur bowayning pulini bulighan kishini dawamliq izdimekte


2006-08-15
Share

Ayali bilen birge ömri hej qilish üchün se'udi erebistan'gha mangghan we pakistanning rawalpindi shehiride düshenbe küni 6 ming dollar pulini ikki bulangchigha tartquzup qoyghan Uyghur boway hesenjan ismayil sepirini dawamlashturushqa amalsiz qaldi.

Pulsiz qalghan boway bulangchilarning birini etraptiki kishilerning yardimi bilen shu chaghning özide tutuwélip saqchigha élip barghan bolsimu, lékin pulini qayturuwalalmighan. Chünki bulangchilarning yene biri pulni élip qéchip kétishke ülgürgen idi. Rawalpindiki saqchilar, muxbirimizgha tutulup qalghan bulangchi teminligen yip uchigha asasen qéchip ketken kishini tépishning amalini qiliwatimiz, dep tekitligen bolsimu, lékin rawalpindiki Uyghurlar pakistan saqchilirini sörelmilik qildi, dep eyiblimekte.

Hej yolidiki péshkellik

Buningdin 3 kün ilgiri Uyghur aptonom rayonining qaramay shehiridin rawalpindigha kelgen 81 yashlardiki hesenjan boway xanimi patigül ibrahim bilen birge se'udi erebistan'gha bérip, muqeddes zéminni tawap qilmaqchi we hej ibaditini bija keltürmekchi bolup yolgha chiqqan. Rawalpindining raja bazar rayonida yüz bergen bu bextsizlik bowaygha shunchilik éghir kelgenki, u muxbirimizning su'allirigha jawab bériwétip köz yashlirini tutalmidi.

Pakistan Uyghur hajilarning se'udi erebistan'gha bérish we kélish sepiride chüshüp ötüdighan muhim békiti. Analizchilarning eskertishiche, pakistan jem'iyitidiki bixeterlik mesilisi we xitay bilen pakistanning Uyghur musteqilchi küchlirige qarshi hemkarliqi yéqinqi yillardin béri, hejge bérish we kélish sepiridiki Uyghur hajilar üchün xatirjemsiz amili bolup qalghan.

Hesenjan bowayning eskertishiche, 4 künning aldida pakistan'gha kelgen bowayning béshigha kelgenler, düshenbe küni uning bir seperdishi bilen birge téléfon qilmaqchi bolup talagha chiqqanda yüz berdi. Hesenjan boway we uning hemrasi bulangchilarning birini etraptiki kishilerning yardimi bilen tutuwalghan we shu jaydiki saqchi idarisigha élip barghan bolsimu, lékin bulangchilarning yene biri qéchip kétishke ülgürgen idi. Hesenjan bowayning eskertishiche, qéchip ketken bulangchi bowayning kalte ishtinigha chigiwalghan 6 ming dollar pulini élip qachqan.

Pakistan saqchiliri: jinayetchi qolgha chüshüshke az qaldi

Rawalpindining raja baziri rayonidiki saqchi idarisining bir mes'uli seyshenbe küni muxbirimizgha diloning tekshürülüwatqanliqini bildürdi. Bu emeldarning eskertishiche, saqchilar pulni élip qachqan kishini qolgha chüshürüshke tirishmaqtiken. Saqchilarning qachqun'gha yéqinlishiwatqanliqini tekitligen bu emeldar, bulangchi pakistanning ku'ata shehiride olturidighanliqini we uning qolgha chüshüshke az qalghanliqini bildürdi.

U, " biz ademni tutush üchün pütün tirishchanliqimizni körsitiwatimiz. Ularning biri qolimizda, lékin ularning yene birige yéqinlishiwatimiz, bu ademning ku'atada olturidighanliqi éniqlandi. Uni aldimizdiki 2 - 3 kün ichide qolgha chüshüridighanliqimizgha ishenchimiz bar" deydu.

Uning eskertishiche, pulni élip qachqan kishi qolgha chüshkendin kéyin bowayning puli melum bolidiken. Saqchi "ikkinchi kishi ku'atada olturidu. Biz penjapta turimiz. Ku'asta penjaptin yiraq yerde, lékin shundaqtimu biz uni qolgha chüshürüshke tirishiwatimiz" dep körsetti. Uning ashkarilishiche, da'iriler diloni ku'atadiki saqchi organlirigha melum qilghan. Lékin dilogha munasiwetlik Uyghurlar pakistan saqchilirini weqege köngül bölmidi, dep eyiblimekte.

Uyghur muhajir: pakistan saqchilirini bulangchigha "mihman'gha" oxshash mu'amile qildi

Pakistanda yashaydighan weqedin xewerdar bir Uyghur muhajiri pakistan saqchilirini bulangchigha "mihman'gha" oxshash mu'amile qildi, dep narazi boldi. Uning eskertishiche, hesenjan bowayning pulini bulash weqesi pakistanda yüz bergen tunji weqe emes. Bu xil weqeler burun köp qétim yüz bergen. Ular hazirghiche bu weqeni pakistandiki junggo elchixanisigha melum qilip ulardin yardem sorimighan.

Pakistanda yashaydighan yuqiriqi Uyghur muhajirning eskertishiche, burun bu xil weqelerge duch kelgen Uyghurlar junggo elchixanisigha bérip ulardin yardem sorighan bolsimu, lékin elchixana bu kishilerge perwa qilip qoymighanliqtin, bu weqeni junggo elchixanisigha melum qilip yardem sorashning paydisi yoq, dep qarighan.

Pakistan junggoning qoral - yaraq, yadro téxnika jehettiki dunya boyiche eng ishenchilik ittipaqdishi bolupla qalmay, sherqiy türkistan musteqilchi küchlirige qarshi turush kürishidiki hemkarlashquchisi. Pakistan bu dölettiki Uyghur siyasiy öktichilirini xitaygha ötküzüp bérishte köp oylinip olturmaydighan dölet.

Pakistan da'iriliri yéqinqi 2 yildin béri muhemmed toxti, ismayil qari qatarliq Uyghur öktichilirini ötküzüp bergen we xitay da'iriliri bu kishilerni ölüm jazasi we muddetsiz qamaq jazalirigha höküm qilghan idi. Hüsenjan bowayning eskertishiche, uning yénida pul qalmighanliqtin ya yurtigha qaytishni yaki se'udi erebistan'gha bérishni bilelmey qalghan. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet