Xitay bu yil herbiy xirajitini ٪ 12.6 Ashurmaqchi


2005-03-04
Share

Xitay xelq qurultiyining bayanatchisi jyang énju jüme küni bu yil omumiy herbiy xirajetning 248 milyard yu'en yeni 30 milyard amérika dollirigha yetkenlikini melum qildi. U yene buning bashqa döletlerge sélishturghanda yenila köp hésablanmaydighanliqini bildürdi.

Xitay yene, bu yilidiki ashurghan xirajetni asasliqi xitay armiyisining zamaniwélishishini ilgiri sürüshke hemde künsayin éshiwatqan xitay eskerlirining parawanliq ishlirigha ishlitil &# xFBE9;dighanliqini eskertti.

12.6٪ Éshish köp hésablinamdu?

Amérikidiki montéréy xelq'ara ishlar tetqiqat merkizining dokturi yu'en jingdong xitayning herbiy xirajitini ashurushini toghra chüshinishke bolidighanliqini bildürüp, xitayda eskerler sanining köplikini, buninggha qoshulup xitay azatliq armiyisi ötken yili qisqartilghan 200 ming eskerlerning parawanliq we pénsiye pullirini hel qilishqa mejbur bolidighanliqini, yene bir tereptin bolsa xitaydiki herbiy esliheler yenila koniraq bolghanliqi üchün uni zamaniwilashturushqa toghra kelgenlikini sewep qildi. U yene, xitayning iqtisadiy tereqqiyatigha asaslan'ghanda, herbiy xirajetning 12.6٪ Éshishining yenila köp hésablanmaydighanliqini éytti.

"Xitayning hazirqi iqtisadiy iqtidari we tashqi oborot zapisigha qarighanda, ular armiyige buningdin köp pul ajritalaydu. Emma ular bundaq qilmidi. Xitaydiki yilliq omumiy ishleshchiqirish qimmiti bilen hökümetning herbiy xirajiti asasiy jehettin chong perqlendürülmidi".

Xitayning herbiy xirajiti némige ishlitilidu?

Amérika wéyk forést uniwérsitétining dokturi li wéychin, eger xitay hökümiti herbiy xirajetni dégendek eskerlerning parawanliqigha ishletse, buni toghra chüshinishke bolidighanliqini, emma xitay ezeldin bashqa herbiy xirajetlerning qeyerge ishlitilidighanliqini yoshuridighanliqi üchün, buning kishilerde guman peyda qilidighanliqini bildürdi.

"Belkim herbiy xirajetning 12.6٪ Éshishi emeliyetke uyghun kélidighandu. Emma biz ularning bu xirajetni némige ishlitidighanliqini bilmeymiz. Undaq bolghandin kéyin bu elbette bizde her xil qiyas we gumanlarni peyda qilidu-de".

Li wéychin sözide yene, xitayning bezi herbiy tereqqiyatlarni mexpiy tutsa bolidighanliqini, bundaq ehwalda buni tepsiliy démisimu, bolmidi dégende uni ‘yuqiri téxnika' yaki ‘dölet mudapi'e' dégen'ge oxshash katigoriyilerge ayrip, uninggha qanchilik xirajet ajratqanliqini éytsa bolidighanliqini eskertti. Shundaqla u yene, amérika we yaponiye qatarliq döletlerning herbiy xirajitidiki ochuqluq derijisining xitaydin köp yuqiri ikenlikini mi &# xFEB4;al qildi.

Xitay herbiy xirajitining ochuqluq derijisi yuqiri emes

"Ochuqluq derijisi xitaydin yaxshi bolupla qalmay, téxi amérika we yaponiyidiki qanun turghuzush orunlirining buni tekshürüp békitishi jeryanida, téximu köp uchurlar otturigha chiqidu. Elbette bezi yighinlar mexpiy échilidu. Emma bolmidi dégende buni nazaret qilip turidighan organlar bar. Xitayda bolsa bundaq emes. Chünki xitayda hökümet bilen partiye bir a'ile emesmu".

Li wéychin yene, xitay hökümitining esli herbiy xirajitining heqiqiy sani we uning némilerge ishlitilishini ochuq élan qilishi kéreklikini, shundaq bolghandila andin her xil qiyaslardin saqlan'ghanliqi bolidighanliqini éytti. Amérika birleshme axbarat agéntliqining xewirige qarighanda, nurghun küzetchiler xitay hökümiti emeliyette ajratqan herbiy xirajet ular élan qilghandin 2 hesse hetta 3 hesse yuqiri bolushi mumkin dep qaraydiken. Shundaqla xitayning ötkenki besh yildin buyanqi herbiy xirajitining éshishi 10٪ tin yuqiri bolghan.

Xitayning herbige ajratqan xirajiti, ma'arip we sehiye xirajitidinmu köp

Londondiki jéyns mudapi'e heptilik zhornilining analizchisi kiristan lémér, xitay herbiy xirajitining éshishi omumiyüzlük qilip éytqanda, teywen, hindistan, yaponiye we amérika qatarliqlarning diqqitini tartidighanliqini, bolupmu buning teywen'ge melum derijide tehdit élip kélidighanliqini bildürdi. U, gerche xitayning bu qétimliq herbiy xirajitining éshishi rayonning bixeterlikige waqtinche chong tesir körsetmisimu, emma uzun mezgilgiche mushu sür'ette éship méngiwerse, buning rayonning bixeterlikige tehdit bolidighanliqini körsetti.

Bu arida teywen prézidénti chén shüybyen xitayning bu doklatigha derhal inkas qayturup, xitay hökümitining herbiy xirajitini asasliqi teywen'ge qoral küchi ishlitish teyyarliqigha ishlitiwatqanliqini shundaqla xitayning hazirghiche teywen'ge 700 dane bashqurulidighan bomba toghrilap qoyghanliqini bildürdi. U yene, her qaysi döletlerning iqtisadiy hemkarliqni dep, xitayning rayonning bixeterlikige tehdit boliwatqanliqini nezerdin saqit qilmasliqini telep qildi.

En'gliyediki hökümetsiz teshkilat bolghan oksfem tetqiqat orginining statistikisigha qarighanda, xitay hökümitining herbiyge ajratqan xirajiti, ma'arip we sehiye xirajitidinmu yuqiri iken. (Peride)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet