Héytgah jamesi ghezepte


2007.07.12

bayawandiki-bulaq -150.jpg
"Bayawandiki bulaq" ning korupkisi.

Héytgah jamesi körünüshining bir xitay haraq shirkiti ishligen bayawandiki bulaq namliq aq haraqning botulka hemde korupkilirigha chaplan'ghanliqi Uyghur tilidiki mulahize tor betliride yéqindin buyan ghulghula qozghighan bir mesile bolupla qalmay ,Uyghur élide éghizdin ‏- éghizgha köchüp Uyghurlarda küchlük naraziliq hemde ghezep qozghawatqan nazuk hem köp tereplime mesile bolup qaldi. Islam dinida haram dep cheklen'gen haraqning botulkilirida Uyghur musulmanlirining ulugh tawab gahi , muqeddes héytgah meschitining chaplan'ghanliqidin ibaret bu haqaret we bimeniliktin, héytgah jamesi ölimalirining xewiri barmu ‏- yoq ? mezkur weqege ular qandaq inkas qayturmaqta ?

At aylixan'gha , yol sarixan'gha ...

Biz héytgah jamesi körünüshining "bayawandiki bulaq " markiliq ili jinggu haraq cheklik shirkiti teripidin ishlen'gen aq haraqning botulka hemde korupkilirigha ishlitilgenliki mesilisi heqqide aldinqi programmimizda mezkur haraq zawutining hemde bayawandiki bulaq namliq haraqning ikki yil ilgirila ishlepchiqirishtin toxtighanliqi heqqide ige bolghan melumatlirimizni anglatqandin bashqa yene , bu haraqning butulka karupkilirini layihiligen shibéy fuley élan shirkiti dériktorining " musulmanche belge qoyghandila milliylar bu haraqni sétiwalidu " dégendek ziddiyetlik hemde bimene jawablirini anglattuq.

Gerche ularning jawabliridin Uyghur élide haraq we bashqa mehsulatlarni ishlepchiqiriwatqan xitay shirketliri hemde ishlepchiqarghuchilarning hetta , soda sana'et bashqurush tarmaqliriningmu bu mesilige sel qarighanliqi, xelqning étiqad , örp ‏- aditige hörmet qilmasliqi qatarliq sewenlikler kishide so'al peyda qilipla qalmay ,buninggha qarita biwaste hörmet abroyi biwaste ziyan'gha uchrighuchi bolghan héytgah jamesi mes'ullirining shundaqla Uyghur élidiki islam diniy jem'iyiti we milliy ishlar da'irilirining hazirgha qeder inkas qayturmighanliqi kishini te'ejjüplendüridighan bir mesile .

Ejiba , Uyghur élidiki pütün musulmanlarning diligha azar bérip naraziliq peyda qilghan ularning diniy hem milliy héssiyati hem ghururigha zerbe bergen, naraziliq hetta ghezep qozghawatqan bu mesilidin héytgah meschiti ölimalirining xewiri yoqmu ? qéni héytgah meschitige téléfon qilip köreyli.

Ular kéchiktimu?

Gerche héytgah jamesi körünüshi chüshürülgen bayawandiki bulaq markiliq haraq besh yildin buyan Uyghur haraq sorunlirida aylinip yürgen bolsimu , bu mesile axiri Uyghurlar teripidin bayqilip otturigha chiqti , mezkur mesile heqqide Uyghurlar köp tereplerdin mulahize yürgüzmekte , beziler buni musulmanlarning , az sanliq milletlerning hoquq menpe'etining qaysi derijide töwen turidighanliqining , hörmet qilinmaydighanliqining ispati dése , yene beziler munasiwetlik shirket hem orunlarning mes'uliyetsizlikidin bashqa , özimizdiki bixotluqtinmu körüsh kérek deydu shundaqla bu munasiwet bilen beziler Uyghurlarni, musulmanlarni haraqqa bérilmeslikke tewsiye qilmaqta.

Her halda héytgah jamesi mezkur mesilidin yeni Uyghur musulmanlarning menpe'etila emes , islam dinigha étiqad qilidighan barliq xelqning tawab qilidighan ulugh jayiningmu qoghdalmaywatqanliqidin, tapawetchilerning xalighanche étibarsizliq bilen paydiliniwatqanliqidin xewer tapti ,shundaqla bu meschit mutiwellisi éytqandek ular qanuniy heq -hoquqlirini qoghdash üchün heriket qilmaqchi ?

Epsus , mezkur mesilide eng asasliq mes'uliyetni öz üstige alghuchi ili jinggu haraq cheklik shirkiti weyran bolghan ,zawut haraq ishlepchiqirishtin pütünley toxtighan bu waqitta , ishtin toxtighan hazirqi peytte kimning mes'uliyitini sürüshte qilish kérek ? mezkur mesilidin azar yigen héytgah jamesi, Uyghur xelqi , Uyghur élidiki musulmanlar bu heqliq dawasini aqquzalamdu ? bulargha yenila waqit hem emeliyet jawab bersun . Mezkur mesilining ilgirilesh jeryani heqqide anglighuchilrimizni xewerdar qilishqa tirishimiz. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.