Һиндистан ядро оқ беши елип йүрәләйдиған оттура мусапилик башқурулидиған бомба синиқи елип барди


2007-04-12
Share

hindistan-bomba.jpg
Һиндистан дөләт мудапиә министирлиқи тәрипидин тарқитилған көрүнүштин тартилған бу рәсимдә һиндистан тәрипидин синақ қилинған агни-3 типлиқ башқурулидиған бомба.AFP

Һиндистан 12 ‏- март күни бенгал қолтуқи вилер арили орисса қирғиқидин мувәппәқийәтлик һалда агни-3 типлиқ оттура мусапилиқ башқурулдиған бомба қоюп бәргән. Мәлум болушичә, һиндистан қоюп бәргән агни-3 йәни "ялқун-3" намлиқ бу бомба хитайниң шаңхәй вә бейҗиң шәһәрлиригә һуҗум қозғиялайдикән.

Қудрәтлик бомба

Хитай ташқи ишлар министирлиқи баянатчиси чингаң, хитайниң һиндистан елип барған мәзкур синаққа йеқиндин диққәт қилғанлиқини һәм һиндистанни район тинчлиқи вә муқимлиқини илгири сүрүшкә дәвәт қилидиғанлиқини ипадилигән.

Йәр йүзидин йәр йүзигә қоюп берилидиған агни-3 типлиқ бу бомбиниң етиш мусаписи 3000 километир, айланма узунлуқи 1. 8 Митер, узунлуқи 16 митер, еғирлиқи 48 тонна болуп, у 1. 5 Тонна еғирлиқтики ядро оқ бешини елип йүрүш иқтидариға игә. Һиндистан дөләт мудапиә тармақлириниң билдүрүшичә, 12 ‏- април чүштин бурун әтигән саәт 10 дин 52 минут өткәндә агни-3 намлиқ башқурулидиған бомба мувәппәқийәтлик һалда қоюп берилгән. Агни-3 бомба синиқи уда 3 нөвәт кечиктүрүлгәндин кийин 2006-йили 9- июлда биринчи қетим елип берилған болсиму, техникилиқ кашила түпәйли бәлгилигән нишанға тәгмигән иди.

Агни-3 ни қоюп бериштә, калайкунда базисиға җайлашқан авиатсийә контрол мәркизи, колкатадики һиндистан айропорт башқуруш идариси вә шәрқи деңиз армийиси баш қоманданлиқ штаби қатарлиқ органлар йеқиндин маслашқан.

Ббк ахбарат агентлиқиниң һиндистан ташқи ишлар министирлиқи бәргән учурдин нәқил кәлтүрүшичә, һиндистан тәрәп бомба қоюп берилиштин илгири пакистан һөкүмитини бу иштин алдинала хәвәрдар қилип қойған. 2005-Йили 10-айда бу икки дөләт башқурулидиған бомба қоюп бериштә қарши тәрәпни алдин хәвәрләндүрүп қоюш тоғрисида келишим һасил қилған иди.

Гәрчә хитай қитәләр ара учидиған йирақ мусапилиқ башқурулидиған бомбиларға игә болсиму, лекин һиндистан синақ қилған агни-3 пакистанниң һәрбий завутлиридики һәрқандақ бир башқурулидиған бомбидин күчлүк болуп, бу җәнубий асиядики әң узақ мусапилик вә әң күчлүк башқурулидиған бомбиға айлинип қалған.

Һиндистан дөләт мудапиә мутәхәссислири, агни-3 ниң учуш мусаписи 3000 километир икәнликини, лекин униң мусаписини 5000 километирға ашурғили болидиғанлиқини илгири сүргән.

Һиндистанниң һәрбий күчи

Һиндистан дөләт мудапиә министирлиқи баянатчисиниң билдүрүшичә, бу һиндиистан алимлириниң тунҗи нөвәт әң илғар ракета йетәкләш техникисини синақтин өткүзүши болуп, бомба һаваға 90 километир көтүрүлүп атмосферани тик һаләттә кесип өткәндин кейин, йәр йүзигә қайтип шәрқий һинди окянниң никобар арилидики алдин бәлгиләнгән нишанға барған.

Униңдин башқа йәнә, йәршари вақти гезитиниң мәлуматиға қариғанда, бу йил 30 ‏- март һиндистан дануш намлиқ ядро оқ беши елип йүрүш иқтидариға игә қисқа мусапилиқ башқурулидиған бомба синиқи елип барған. Бу бомба бенгал деңиз қолтуқида чнадипур синақ мәйданиға 60 километир келидиған җайдики бир деңиз армийә парахотидин қоюп берилгән. Бу бомбиниң етиш мусаписи 2500 километир болуп 750 килограм ядро оқ беши елип йүрүш иқтидариға игә иди.

Һиндистан 1998 - йили мувәппәқийәтлик һалда атом бомба синиқи елип барған вә бир йүрүш ядро вә башқурулидиған бомба йетәкләш системиси тәтқиқатини қанат яйдурған. Буниң ичидә 700 километир мусапилик агни-1 вә 2500 километир мусапилик агни-2 ләр бар.

Агни-3 2008- йили һиндистан қораллиқ қисимлириға рәсмий ишлитишкә тапшурулуштин илгири, италийә вә һиндистанлиқ алимлар бирликтә мәзкур бомбини йәнә 3 мәртә қоюп бириш синиқи илип баридикән. (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт