Hindistan hökümiti xitay shirketlirining pa'aliyetlirini cheklimekte


2006-10-19
Share

Hindistan hökümiti uzundin béri xitayning hindisitandiki port, alaqe, renglik mital ishlepchiqirish sana'iti qatarliq sezgür sahelerde meblegh sélishigha ruxset bérishtin özini qachurup kelgen idi. Hindistandiki chet'el meblegh salghuchiliri heqqide chiqirilghan yéngi qanun'gha asasen, xitayning peqet yoqirida dep ötülgen sahelerdila emes, herqandaq sahede meblegh sélishi heqqide milliy bixterlik jehettin jiddiy tekshürüsh élip bérilidu.

Hindistan'gha meblegh salidighan shirketler bixeterlik tekshürüshidin ötküzülidu

Andrajit basuning asiya waqti gézitide élan qilghan maqalisde bildürüshiche, bu qanun arqiliq xitay hindistanda resmiy yosunda bixeterlik tehditi dep békitilidiken.

Maqalide éytilishiche, yéngi qanunning yolgha qoyulushi bilen, xitay shirketlirining hindistanda élip barmaqchi bolghan herqandaq tijaret pa'aliyiti yaki meblegh sélish herikiti hindistan da'irilirining qattiq bixeterlik tekshürüshidin ötküzülidiken.

Siyasiy mulahizichilerning éytishiche, chet'el shirketlirining hindistandiki pa'aliyetliri heqqide chiqirilidighan yéngi qanun alliqachan hindistanda bashqa chet dölet shirketlirige sélishturghanda nurghun tosalghulargha uchrawatqan xitay shirketlirining hindistan'gha meblegh sélishini we hindistanda soda pa'aliyetliri élip bérishini téximu qiyinlashturidu.

Yéqinda xitayning ikki chong téléfon shirkiti, hindistanning dölet igilikidiki eng chong téléfon shirkiti teripidin dunyaning eng chong yanfon baziri üchün ichilghan soda riqabitige qatnishalmidi. Hindistan hökümiti téxnikiliq seweblerni bahane qilip bu ikki xitay shirkitining mezkur bazargha kirishini cheklidi. Shundaqla hindistan milliy bixeterlik kéngishi 12 ayliq tekshürüshtin kéyin, merkizi hongkongdiki hotchinson port yasash we ishlitish shirkitining, hindistanning mombay we chimnay portlirida kontéynér iskilati qurush teklipini milliy bixeterlik sewebidin ret qilighan.

Hindistanning tedbirliri xitay hökümitini bi'aram qilmaqta

1962‏- Yilidin béri yeni ikki dölet otturisida yüz bergen urushtin kéyin, bir-birige guman bilen qarap kelgen xitay we hindistan yéqinqi yillarda ikki dölet arisida mewjut ixtilaplarni bir terep qilghan bolsimu, lékin andrajit basuning asiya waqti gézitide élan qilghan maqaliside bildürüshiche, hindistanda xitayning bir bixeterlik tehditi ikenliki toghrisidiki köz qarash künséri kücheymekte. Yéqinda élan qilin'ghan bir doklatta éytilishiche, hindistan peqet chong quruqluq shirketliri emes, hong kong we makaw shirketlirining pa'aliyetlirigimu, bixeterlik tekshürüshidin ötkendin kéyin andin ruxset bérish kérekliki otturigha qoyulghan.

Hindistan da'irilirining, xitay shirketlirining hindistandiki pa'aliyetlirge qarshi alghan tedbirliri xitay hökümitini bi'aram qilmaqta. Xewerlerge qarighanda, ötken ay hindistan sana'etchiliri teripidin béyjingda ötküzülgen bir sorunda, xitay xelq'ara sodini tereqqi qildurush kéngishining bash katipi wang jinjén hindistan wekillirige xitayning hindistan hökümitining xitay shirketlirige tutqan pozitisyisige bolghan naraziliqini bayan qilghan. U, nurghunlighan xitay shirketlirining her qaysi sahelerde hindistan'gha meblegh sélishni xalaydighanliqini, emma hindistan hökümitining heddidin ziyade éhtiyatchanliqi, xitay shirketlirining hindistanda soda pa'aliyiti élip bérishigha tosalghu boluwatqanliqini tekitligen. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet