Хитай даирлири қоюп бәргән әйдиз паалийәтчиси хуҗя радиомизниң зияритини қобул қилди


2006.03.31
hujia-200.jpg

Хитайдики даңлиқ әйдиз паалийәтчиси ху җя әпәнди 16 ‏- феврал күнидин башлап из дерәксиз йоқап кәткәндин буян, униң аяли сең җинйән уни издәп йәрлик сақчи идариси вә аманлиқни сақлаш орунлириға берип, тохтимай сүрүштә қилған. Сақчи орунлири болса хуҗяниң нәдә икәнликидин қилчә хәвәрсиз икәнликини билдүргән. Әмәлийәттә ху җя әпәнди хитай һөкүмити тәрипидин мәхпий қолға елинған болуп, 28 - март күни йәни у мәхпий қамақта 41 күн ятқандин кейин қоюп берилди.

Вәдисигә хилаплиқ қилған сақчи

Ху җя әпәнди қамақтин чиққан күниниң әтиси радиомизниң зияритини қобул қилип өзиниң 16 ‏- феврал күни хитай җамаәт хәвпсизлик қисимлириниң дөләтни қоғдаш әтрити тәрипидин қолған елинғанлиқини сөзләп бәрди :

"2 ‏- Айниң 16 - күни әттигәндә, мән әйдиз мәсилиси һәққидә ечилидиған бир йиғинға қатнишишим керәк иди. Мән мәзкур йиғинға қатнишиш үчүн бейҗиң шәһәрлик җамаәт хәвпсизлик идарисиниң рухситини алған вә сақчи машинисиниң мени апирип қоюшиға мақул болған идим. Чүнки мениң һәммә һәрикитим сақчиларниң назарити астида болуп кәлмәктә. Мән өйдин чиқишим билән, сақчи машинисиға чиқтим. Лекин машиниға чиқишим билән шуни байқидимки, машинида 4 нәпәр сақчи болуп, улар мән бурун билидиғанлар әмәс бәлки тонумайдиған сақчилардин иди. Машина маңа ‏- маңмай алдида олтурған сақчи кәйнидикиләргә "уни мән дегәндәк қил" дәп буйруқ чүшүрди. Улар мениң бешимға бир қара қапни кийгүзүп, бешимни күчиниң беричә йәргә қаритип басти.Улар машинини бәкму тез вә қопал һәйдигәнликтин, униң үстигә бешимға қара халта кийдүрүп қойғанлиқтин, мениң көңлүм елишип бәкму азабландим.

Машина йерим саәттин артуқ маңғандин кейин, улар мени бер йезидики қараңғу һәм соғақ өйгә қамап қойди. Һәр күни дегидәк 7 ‏- 8 нәпәр сақчи нөвәт билән мени көзәтти. Мән улардин немә үчүн мени бу йәргә әкәлгәнликини сориғинимда, улар җаваб бәрмиди.

Кәчқурун бейҗиң шәһәрлик җамаәт хәвпсизлик идарисиниң дөләтни қоғдаш әтритидин 3 нәпәр сақчи келип мени сорақ қилишқа башлиди. Улар мәндин бу қетимқи өктичиләрни қоллап ашлиқ елан қилиш һәрикитигә мунасивәтлик мәсилиләрни сориди. Мән уларға " билмәймән, тор бәтлиридин издәп биливелиңлар " дәп җаваб бәрдим. Улар һәрқандақ қилипму мәндин һечқандақ учурға егә болалмиди һәмдә мениң ирадәмни өзгәртәлмәйдиғиниға ишәнди. Түнүгүн чүштин кейин бейҗиң шәһәрлик дөләтни қоғдаш әтритидин йәнә 4 адәм келип, мениң язған күндилик тәсират вә хатирәмни тартивелип, бешимни қайтидин қара халта билән қаплап, машина билән далиға әкилип қоюп бәрди."

Қайта тәкрарланған йеңи иш

Хуҗя әпәндиниң мәлум қилишичә, бундин илгириму сақчилар уни нәччә қетим қолға алған вә қамап қойған икән. Лекин уни қоюп бериштә, һәр қетим у турған районға әкилип һәтта сақчилар уни ишик алдиғичә ялап кәлгән. Лекин бу қетим болса, ундақ қилмиған. Улар йол бойи униңға бундин кейин һечқандақ кишилик һоқуққа мунасивәтлик һәрикәтләргә қатнашмаслиқ һәққидә агаһландуруш бәргән. Һәмдә "әгәр бу хил һәрикәтләр йәнә тәкрарлинидикән, ундақта өйүңдикиләр, ата ‏- анаң вә дос‏- бурадәрлириңниң һәммиси қечип қутулалмайду" дәп тәһдит қилған. Ху җя әпәнди уларниң бу дегәнлирини сөзләп келип, "мән кейин шуни чүшинип йәттимки, уларниң маңа бундақ тәһдит қилиши шундақла бу қетим мени өйдин йирақ йәрдила чүшүрүп қоюши пүтүнләй барлиқ мунасивәтлик пакитларни йоқ қилиш икән. Әтраптикиләрниң уларни көрүп қалмаслиқини вә өзлириниң бу иш билән қилчилик мунасивити йоқ икәнликини испатлаш үчүн икән. Бу бәкму шәрмәндичилик" дәп көрсәтти.

Ху җя әпәнди өзини тутуп кәткән бейҗиң шәһәрлик җамаәт хәвпсизлик идарисиниң дөләтни қоғдаш әтрити һәққидә тохтилип, уни мундақ тәсвирлиди: "бейҗиң шәһәрлик җамаәт хәвпсизлик идарисиниң дөләтни қоғдаш әтрити җамаәт хәвпсизлик қошунидики қара җәмийәт характерлик қошун болуп һесаблиниду. Чүнки бу тәшкилат әзәлдин қанунни көзгә илип қоймайду. Улар өзлири қиливатқан һәрбир ишниң кишилик һоқуқни дәпсәндә қилидиған қилмишлар икәнликини билип туруп, йәнила қанунни дәпсәндә қилип өзлири халиғанчә иш беҗириду. Уларға қариғанда башқа саһәдики сақчилар йәнә бир қәдәр аз -тола болсиму пуқраларға көйиниду. Лекин дөләтни қоғдаш әтритиниң сақчилири хәлқниң мәнпәәтини көзгә илипму қоймайду. Улар болупму өктичиләргә тақабил туриду. 610 - Номурлуқ ишханиму шуларниң контроли астида. Фа луңгуңчиларни бастуридиғанларму шулар ".

Ху җя: алдамчи сақчиларни издәп сорақ қилғум келиду

Ху җя әпәнди сөһбәт җәрянида, өзиниң қамақтин чиқип 30 нәччә саәт өткәндин кейин андин сиртта йүз бәргән ишлардин хәвәрдар болғанлиқини сөзләп келип, мундақ деди : "мән қамақтин чиқип 30 нәччә саәт өткәндин кейин андин сиртта йүз бәргән ишлардин хәвәрдар болдум. Аялим, апам вә дост‏- бурадәрлирим шундақла силәргә охшаш мәтбуат хадимлири мениң из -дерәксиз йоқап кәткәнликимдин интайин әндишә қилип, мени тәрәп -тәрәптин сүрүштә қилипту. Буларни ойлиғинимда мән пәқәтла өзүмни басалмайватимән. Хитай қануни бойичә, җинайәтчи һәтта адәм өлтүргән қатил қолға елинса, алди билән униң өйидикиләргә хәвәр қилиниши керәк. Лекин мән йоқап кетип та 41 күн болғичә мениң из -дерикимни һечким билмигән. Аялим мени издәп бармиған йери қалмапту. Сақчилар болса күндә мән билән биллә болуп һәммини билип туруқлуқ йәнә тенивапту. Улар һәтта ғәлитә гәп -сөзләр билән уни алдапту. Уларниң қанун беҗиргүчи сүпити билән бундақ қилиши адәмни һәйран қалдуриду. Буларни ойлисам пәқәтла өзүмни басалмаймән. Әшу алдамчи сақчиларни издәп улар билән йүзму ‏- йүз туруп, уларни сорақ қилғум келиду ".

Из дерәксиз йоқап кетип мәхпий қамақта 41 күн йетип чиққан хуҗя әпәнди бу қетим йүз бәргән вәқәни йезип чиқип бейҗиңдики хәлқ қурултийи вәкиллиригә тапшуруп беридиғанлиқини һәмдә улар арқилиқ бейҗиң шәһәрлик җамаәт хәвпсизлик идариси үстидин әрз сунидиғанлиқини мәлум қилип мундақ деди : "мән чоқум бейҗиң шәһәрлик җамаәт хәвпсизлик идариси өстидин әрз қилимән. Чүнки улар давамлиқ қанунға хилаплиқ ишларни қилип, халиғанчә кишилик һоқуқни дәпсәндә қилиду. Улар пәқәт мениңла аиләмни әмәс, бәлки башқиларниң аилисигиму хатирҗәмсизлик елип кәлмәктә. Шуңа мән уларни чоқум әрз қилишим керәк. Гәрчә улар мениң күндилик хатирәм қатарлиқ барлиқ пакитларниң һәммисини тартивалған болсиму, мән йәнила қанунни қорал қилип, күчүмниң беричә улар билән елишимән". (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.