Xu jintaw nyu yorkta qarshi élindimu?

• 
  2005-09-15

• Muxbirimiz welining bu heqtiki melumati
• Download story audio

Xitay re'isi xu jintaw 9 - ayning 13 - küni kech sa'et 2 de méksikidin nyu york shehirige yétip kelgende, nyu york shehiridiki woldof méhmanxanisi (xu jintaw chüshken mihmanxana) aldida, xu jintaw ni qarshi élish üchün yaki xu jintaw gha namayish qilish üchün turghan oxshimighan meqsettiki adem topini körgen. Uningdiki herxil awazlarni anglighan erkin asiya radi'osi muxbirining xewer qilishiche, nyu york shehiridiki woldof méhmanxanisining aldida, xu jintaw ni qarshi élish üchün bir nechche yüz adem (shinxu'a agéntliqi 5000 adem dep xewer qilghan, emeliyette 500 ge yetmeydu) 5 yultuzluq qizil bayraqlani pulanglitip, yuqiri awazliq kanaylarda naxsha - xor yangritip, wang - chung qilip, chong daghdugha ichide turghan.

Binormal qarshi élish

Kanektiket shtatidin kelgen amérikiliq er - xotun bu jaydin ötkende, bu körünüshke heyran qalghan. Bundaq chong heshemet qilip, tugh -elem kötürüp, bunchiwula daghdugha qilghudek néme ish bolghandu? bir ademni qarshi alimen dep shunchiwula telwileshken barmu? ... Dégen.

Démisimu amérikidek bundaq bir erkin dölette, xelq saylap chiqmighan, bashqa bir kim belgiliwalghan bundaq bir bashliqqa tentene qilishning özi haqaret qilghanliq bolatti. Yene bir retlik kiyin'gen amérikiliq ependi özining yardemchisi bilen bille méngip bu jaydin ötkende "bunchiwula yoruqi awazda qoyiwatqan bu néme naxsha" dep sorighan. Kishiler uninggha "bu xitayning wetenperwerlik naxshishi" dep chüshendürgende, u kishi "amérika néme dégen keng qosaq dölet-he. Öz yéride xelq rawa körmeydighan naxshini, gep qilmaydiken dep bu yerge ekilip qoyiwergenken -de" dégen.

Emelge ashmighan wede

Xu jintaw ni qarshi alghili saqlap turghan kishiler saqlap charchighanda , ularning aldigha xitayning tashqi ishlar ministiri li jawshing ependi chiqip "aldirash ishini tashlap qoyup bu yerge kelgen xizmetchiler we oqughuchilargha rexmet, re'is xu jintaw alliqachan mihmanxanigha kirip boldi" dégen. Kishiler bu gepni anglap xapa bolushqan. Bolupmu xitay muhajirliri bek xapa bolghan. Ularning ichidin bir si "men bu kishilerge xu jintaw bilen körüshüp, resimge chüshüp xatire qalduruwélishqa wede bérip, bu jaygha ekelgen idim, emdi men bu hésabni qandaq bérimen?" dégen we aghzini buzup tillighan.

Shénjin shehiride saqchi bolghan jang famililik bir kishi özi yalghuz bir pilakatni kötürüp namayishqa chiqqan iken. U kötüriwalghan pilakatqa "xitay hökümiti saqchilargha adem öltürüsh buyruqi chüshürgen" dep yézilghan. Bu kishi eslide mushu pilakatni xu jintaw gha körsetmekchi bolghan. Emma xu jintaw bu yerge kelmey, méhmanxanigha arqa ishiktin kirip ketkendin kéyin, jang ependi tene qilip "mana qachti, saqchi adem öltürmeydighan jaygha kelmeydu. Eger bu pilakatni körse, yüzini nede qoyidu, .. Wijdani azaplanmamdu..." Dégen.

Falun'gongchilar we tébetliklerning namayish qoshuni "xu jintaw gha lenet" , "kommunist partiyige lenet", dep shu'ar towlighanda, ulargha qarshi hujumgha ötüsh üchün téléfon arqiliq adem toplap herketlinishke bashlighan bir qisim kishilerni saqchilar tinjitqan. Mushu künde, b d t yighinigha 170 nechche döletning bashliqliri kelgen. Shunglashqa bu etrapta tertip saqlash üchün 4000 saqchi qoshulghan. Hazir bu jayda jem'iyet tertipi yaxshi. Éytishlargha qarighanda, falunggongchilar bu jayda namayishni kéchidimu dawamlashturidiken. (Weli)