Хитай рәиси ху җинтавниң уйғур елигә қаратқан зияритигә қарита инкаслар


2006-09-12
Share

Дүшәнбә күни, шинхуа агентлиқи һәмдә башқа мәтбуатлар, хитай дөләт рәиси ху җинтав башлиқ бир қисим алий дәриҗилик хитай әмәлдарлириниң 6 - авғусттин, 11 - авғустқичә уйғур елидә мәхсус зиярәттә болғанлиқини, униң зиярити ахирлашқанда хәвәр қилди.

Хитай һөкүмәт хәвәрлиридә көрситилишичә, ху җинтав башлиқ бу мәркәзниң зиярәт өмики уйғур елиниң қаримай, хотән, ғулҗа, үрүмчи қатарлиқ шәһәрлиридә һәмдә муһим завут, карханиларда һәмдә хитай ишләпчиқириш қурулуш армийиси девизийилиридә зиярәттә болған. Бу җәрянда у пүтүн күч билән ечишқа тегишлик байлиқ мәнбәлирини ечип вә униңдин үнүмлүк пайдилинип, уйғур елиниң иқтисади тәрәққиятини илгири сүрүшни оттуриға қойғандин башқа, аз санлиқ милләтләр хитайдин айрилалмайду, хитайлар аз санлиқ милләтләрдин айрилалмайду, аз санлиқ милләтләр өз ‏- ара айрилалмайду дегән идийә бойичә милләтләр иттипақлиқини күчәйтиш һәмдә муқимлиқни сақлашта чиң турушни қаттиқ тәкитлигән.

Шинхуа торида берилгән сөрәтлик хәвәргә қариғанда, хуҗинтав йәнә, хотәнниң бәзи йеза - кәнтлиридики уйғур деһқанларниму зиярәт қилған һәмдә уларниң кириминиң барғанчә юқири көтүрүлүп, бай болғанлиқидин хош болғанлиқини ипадилигән.

Деһқанлар "ху җинтав кәпту, көрүшмидуқ, байларниңкигә тәшвиқат үчүн апирипту"

Бирақ биз дәл ху җинтав йоқлап өткән хотәнниң мәлум кәнтигә телефон қилғинимизда, әмәлийәттә ху җинтав зияритиниң йәнила қуруқ тәшвиқат үчүн ясалмилиқ билән орунлаштурулғанлиқи, униң зияритиниң деһқанларға һечқандақ әһмийити йоқлиқи ашкариланди.

Ху җинтавниң зияритиниң һәқиқий мәқсити немә?

Гәрчә хитай мәтбуатлирида ху җинтавниң уйғур елигә қаратқан зиярити "уйғур аптоном райониниң иқтисадий вә җәмийәт тәрәққият әһвалини көздин кәчүрүш" дәп тәриплиниватқан болсиму, әмма шуниң билән бир пәйттә униң бу бәш күнлүк зияритиниң мәхпи тутулғанлиқи шундақла униң 11 - сентәбир террорлуқ вәқәси йүз бәргәнликиниң бәш йиллиқиға тоғра келиши чәтәлләрдики уйғур тәшкилатлирида ху җинтавниң зиярәт мәқситигә нисбәтән гуманларни қозғимақта. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт