Ху җинтавниң дөләтни идарә қилидиған йеңи нәзирийиси

• Мухбиримиз вәлиниң бу һәқтики мәлумати
• Download story audio

Хитай дөләт рәиси ху җинтав

Ху җинтав хитайниң рәисликигә бәлгиләнгәндин кейин, у 16 ‏- нөвәтлик коммунист партийә мәркизи комитетиниң 4 ‏- омумйиғинида "сотсиялистик инақ җәмийәт қуруш" дегән сөзни оттуриға қойған иди. Йеқинда ечилған 6 ‏- омумйиғинда "сотсиялистик инақ җәмийәт қурушқа даир чоң мәсилиләр тоғрисида қарар" мақулланди. Демәк, буниңдин икки йил бурун , ху җинтавниң дөләтни идарә қилиш нәзирийисиниң мавзуси оттуриға қоюлған болса, әмди бу мавзу партийиниң қарариға айланди. Ху җинтавниң бу нәзирийисиниң тәбири "гуаңмиң гезити" дә "көзәткүчи" дегән аптор нами билән елан қилинған башмақалидә сөзләнди. Он нәччә миң хәтлик бу баш мақалидә җаң зиминниң нами пәқәт бир қетимла тилға елип өтүлүп, ху җинтавниң нами болса алаһидә түс билән тилға елинип 14 қетим тәкрарланди. Униң "сотсиалистик инақ җәмийәт қуруш" дегән шуари 92 қетим тәкрарланди.

Бурун "иқтисадий қурулуш мәркәз" қилинған болса, әмди ху җинтав "иҗитмаи қурулуш"қа әһмийәт беридикән

"Көзәтчи" дегән әпәндим ху җинтавниң бу нәзийисини хәлққә "хитайниң юқирий қатлимида йүз бериватқан әң чоң өзгириш" дәп чүшәндүрүшкә тиришқан. Бурун "иқтисадий қурулуш мәркәз" қилинған болса, буниңдин кейин ху җинтавниң "иҗитмаи қурулуш"қа әһмийәт беридиғанлиқини җакарлиған. Әмма америкиниң принстон университетидики сиясәтшунас мутәхәссис чен куйде әпәндиниң қаришичә, ху җинтавниң "сотсиялистик инақ җәмийәт қуруш" дегән суари йеңи нәрсә әмәс. Коммунист партийиниң һәр қандақ рәһбири тәхткә чиқса, у өзини йеңи бир дәврни яратқан қилип көрситишкә тиришиду. Ундақ қилмиса, у йәнила адәттики бюрократ дәп қарилатти. Шуңлашқа ху җинтав бу қетим сәһнигә өзиниң йеңи ниқабини кийип чиққан.

Ху җинтав солға борулушни аз-аздин ишқа ашуруватиду

Чен куйде әпәндиниң тәһлил қилишичә, мәйли сотсиялизм болсун яки коммунизм болсун, һәммиси охшашла җәмийәткә аң -форма җәһәттин һөкүмранлиқ қилидиған шәкил. Уни немә дәп аташтин яки шәкилниң қандақ өзгәртилишидин қәтий нәзәр, әгәр аң -форма җәһәттин қаттиқ контрол қилииш өзгәртилмисә, униңда һечқандақ өзгириш болмиғанға тәң. Ху җинтав ағзида һәрхил пикирләр мәвҗут болған инақ җәмийәт, дәп қойған билән, әмәлийәттә пәқәт ху җинтавниң өзиниңла авази мәвҗут, башқа кишигә йол йоқ. Һазир пикир әркинликини искәнҗигә елиш җаң земин дәвридикидинму чиң. Инчикә көзәткәндә, ху җинтав һазир хитайда төвән қатламдики аҗиз тәбиқиләргә ярдәм бериш вә уларни йөләшни тәкитләш арқилиқ йеңи өзгириш пәйда қилип, бу шәкил билән солға борулушни аз-аздин ишқа ашуруватиду.

Ху җинтав буниңдин кейин хиянәтчиликкә , чирикликкә қарши турушни йәнә ағзидин чүшүрмәйду

Һазир америкида туруватқан җәмийәтшунас мутәхәссис лю шавҗу әпәндиниң тәһлил қилишичә, ху җинтав сотсиалистик инақ җәмийәт қуруш дегән нәзирийисидә "партийә рәһбәрликини күчәйтиш" дегини әмәлийәттә өзиниң рәһбәрликини күчәйтиш, "партийиниң дөләтни идар қилиш қабилийитини ашуруш" дегиниму, әмәлийәттә өзиниң дөләтни идарә қилиш қабилийитини ашуруш. Униң һазир дәватқан бу гәплиридә һечқандақ йеңилиқ йоқ. Дөләт пуқралирини сөзлигили қоймай, әһли-илмийләрни бастуридиған, пәқәт өзила сөзләйдиған инақ җәмийәт боламдикән? ху җинтавниң һазир дәватқини бир ялған "инақ җәмийәт".

Униң тәһлил қилишичә, ху җинтав буниңдин кейин "инақ җәмийәт" дегән бу шуарни хиянәтчиликкә , чирикликкә қарши туруш һәрикити елип бериш сияситигә тайинип давамлаштурмақчи.(Вәли)