Хәлқ турмуши мәсилиси бейҗиңдики" икки йиғин" ниң асаси күнтәртипини игилиши мумкин


2007-02-26
Share

Келәр айниң башлири өткүзүлидиған хәлқ қурултийи вә сияси мәслиһәт кеңишиниң мәмликәтлик йиғини шундақла бу йил күздә өткүзүлидиған компартийә 17 - қурултийи, хитайда бу йил ичидә өткүзидиған муһим йиғинлар болуп һесаблиниду. Хитай дөләт рәиси ху җинтав җаң земиндин һоқуқни тапшурувалғанда дуч кәлгән әң җиддий мәсилә партийә ичидики өктичилириниң қаршилиқини йеңиш, партийә вә дөләттики алий рәһбәрлик орнини мустәһкәмләш, армийидики имтиязини турғузуш иди. Көзәткүчиләр, бу йил күздә өткүзүлидиған компартийиниң 17- қурултийида ху җинтавниң партийә вә дөләттики алий рәһбәрлик орни рәсмий тиклинидиғанлиқини билдүрмәктә.

Хитайдики кәлгүсидики рәһбәрлик ядроси

"Асия вақти гезиити" ниң хәвәр қилишичә, бейҗиңдики вәзийәттин хәвәрдар әрбаплар 17 - қурултайниң тәйярлиқ хизмитигә йетәкчилик қилидиған икки хизмәт гурупписи қурулғанлиқини вә бу гуруппилар ху җинтав тәрипидин рәсмий тәстиқланғанлиқини билдүргән. Хәвәрләргә қариғанда хизмәт гурупписиниң қурултай сиясий доклатини түзүш гурупписиға вен җябав йетәкчилик қилған.

Хитайниң муавин дөләт рәиси зең чиңхуң болса кадирларни орунлаштуруш шундақла қурултайниң сайлам гурупписиға йетәкчилик қилишни үстигә алған. Көзәткүчиләр, ху җинтав, вен җябав вә зең чиңхуңларни кәлгүсидә хитайни сорайдиған 3 кишилик рәһбәрлик ядроси болуп қелиши мумкин, дәп қаримақта. Вәзийәттин хәвәрдар әрбапларниң әскәртишичә, хитай компартийисиниң әнәниси бойичә, ху җинтав өзиниң шәхси идийисини партийә идеологийисигә айландуралиғандила, андин униң партийә вә дөләттики алий рәһбәрлик орни тикләнгән болиду.

Анализчилар, ху җинтавниң вен җябавни қурултай сиясий доклатини түзүшкә йетәкчи қилип бәлгилишиниң әһмийити бу йәрдә болуши мумкин, дәп қаримақта. Зең чиңхуңниң вәзиписи болса 38 сайлам райони ичидин партийә қурултийиниң 2200 нәпәр вәкилини сайлап чиқиштур. Көзәткүчиләр, бу әһваллар җаң земин гуруһиниң адими, дәп қариливатқан зең чиңхуң ху җинтавниң ишәнчисигә ершкәнликини көрситәмду ? дәп анализ қилишмақта.

Мутәхәсисләрниң қарашлири

Хоңкоңдики обзорчи ли гучиңниң радиомизға әскәртишичә, 17 - қурултай ху җинтавниң партийә ичидә өз орнини тиклиши үчүн зор әһмийәткә игә. Обзорчи ли гучиң " ху җинтав чоқум 17 - қурултайда өзиниң 4 - әвлат рәһбәрлик орнини тиклиши керәк. Әгәр у буни қилалмиса, 18 - қурултайда тәхттин чүшүши мумкин. Униң йеқинда чаған мунасивити билән һейтлиғанда кийивалған кийиминиң рәңги сиясий бюродики башқа әзаларниң кийимидин пәрқлинәтти. Маңғандиму башқиларниң алдида меңип, өзиниң һоқуқини намайән қилишқа урунған" дәйду. Лекин хоңкоңдики мәтбуатлар бу әһвални ху җинтав - вен җябав гуруһи билән җаң земин гуруһи арисидики күрәшниң нәтиҗиси, дәп анализ қилишмақта вә 17 - қурултайда зең чиңхуңниң орни күчийидиғанлиқини илгири сүрмәктә.

Асия һәптилик жорнили" ниң әскәртишичә, зең чиңхуң 2008 - йили җя чиңлинниң орниға сиясий мәслиһәт кеңишиниң рәиси болуп йөткилиши мумкин. Лекин ройтерс ахбарат агентлиқи, бу йил 1 - айниң оттурилирида бәргән бир хәвиридә, зең чиңхуң ху җинтавниң дөләт рәислик вәзиписини өткүзүвелиш еһтимали барлиқини илгири сүргән. "Асия һәптилик жорнили" бу хил еһтималлиқни чәткә қаққан болсиму, лекин бейҗиңдики вәзийәттин хәвәр әрбаплар зең чиңхуңниң 17 - қурултайда мәркизи һәрбий ишлар комитетиниң муавин рәисликигә сайлиниш еһтимали барлиқини билдүргән. Бу қарашни илгири сүргүчиләр, зең чиңхуңниң 22 - январ күни хәлқ сарийида тайландниң баш һәрбий идарә қилғучи әмәлдари генерал сонтини қобул қилғанлиқини вә зең чиңхуңниң вәзиписи билән мунасивәтсиз бу қобулни һәрбий ишлар комитетиға муавин рәиси болуш тәйярлиқини қиливатқанлиқиниң бишаритимиду ? дәп қарайдиғанлиқини билдүрмәктә. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт