Xelq turmushi mesilisi béyjingdiki" ikki yighin" ning asasi küntertipini igilishi mumkin

• Muxbirimiz erkinning bu heqtiki melumati
• Download story audio

Kéler ayning bashliri ötküzülidighan xelq qurultiyi we siyasi meslihet kéngishining memliketlik yighini shundaqla bu yil küzde ötküzülidighan kompartiye 17 - qurultiyi, xitayda bu yil ichide ötküzidighan muhim yighinlar bolup hésablinidu. Xitay dölet re'isi xu jintaw jang zémindin hoquqni tapshuruwalghanda duch kelgen eng jiddiy mesile partiye ichidiki öktichilirining qarshiliqini yéngish, partiye we dölettiki aliy rehberlik ornini mustehkemlesh, armiyidiki imtiyazini turghuzush idi. Közetküchiler, bu yil küzde ötküzülidighan kompartiyining 17- qurultiyida xu jintawning partiye we dölettiki aliy rehberlik orni resmiy tiklinidighanliqini bildürmekte.

Xitaydiki kelgüsidiki rehberlik yadrosi

"Asiya waqti gézi'iti" ning xewer qilishiche, béyjingdiki weziyettin xewerdar erbaplar 17 - qurultayning teyyarliq xizmitige yétekchilik qilidighan ikki xizmet guruppisi qurulghanliqini we bu guruppilar xu jintaw teripidin resmiy testiqlan'ghanliqini bildürgen. Xewerlerge qarighanda xizmet guruppisining qurultay siyasiy doklatini tüzüsh guruppisigha wén jyabaw yétekchilik qilghan.

Xitayning mu'awin dölet re'isi zéng chingxung bolsa kadirlarni orunlashturush shundaqla qurultayning saylam guruppisigha yétekchilik qilishni üstige alghan. Közetküchiler, xu jintaw, wén jyabaw we zéng chingxunglarni kelgüside xitayni soraydighan 3 kishilik rehberlik yadrosi bolup qélishi mumkin, dep qarimaqta. Weziyettin xewerdar erbaplarning eskertishiche, xitay kompartiyisining en'enisi boyiche, xu jintaw özining shexsi idiyisini partiye idé'ologiyisige aylanduralighandila, andin uning partiye we dölettiki aliy rehberlik orni tiklen'gen bolidu.

Analizchilar, xu jintawning wén jyabawni qurultay siyasiy doklatini tüzüshke yétekchi qilip belgilishining ehmiyiti bu yerde bolushi mumkin, dep qarimaqta. Zéng chingxungning wezipisi bolsa 38 saylam rayoni ichidin partiye qurultiyining 2200 neper wekilini saylap chiqishtur. Közetküchiler, bu ehwallar jang zémin guruhining adimi, dep qariliwatqan zéng chingxung xu jintawning ishenchisige érshkenlikini körsitemdu ? dep analiz qilishmaqta.

Mutexesislerning qarashliri

Xongkongdiki obzorchi li guchingning radi'omizgha eskertishiche, 17 - qurultay xu jintawning partiye ichide öz ornini tiklishi üchün zor ehmiyetke ige. Obzorchi li guching " xu jintaw choqum 17 - qurultayda özining 4 - ewlat rehberlik ornini tiklishi kérek. Eger u buni qilalmisa, 18 - qurultayda texttin chüshüshi mumkin. Uning yéqinda chaghan munasiwiti bilen héytlighanda kiyiwalghan kiyimining renggi siyasiy byurodiki bashqa ezalarning kiyimidin perqlinetti. Mangghandimu bashqilarning aldida méngip, özining hoquqini namayen qilishqa urun'ghan" deydu. Lékin xongkongdiki metbu'atlar bu ehwalni xu jintaw - wén jyabaw guruhi bilen jang zémin guruhi arisidiki küreshning netijisi, dep analiz qilishmaqta we 17 - qurultayda zéng chingxungning orni küchiyidighanliqini ilgiri sürmekte.

Asiya heptilik zhornili" ning eskertishiche, zéng chingxung 2008 - yili jya chinglinning ornigha siyasiy meslihet kéngishining re'isi bolup yötkilishi mumkin. Lékin roytérs axbarat agéntliqi, bu yil 1 - ayning otturilirida bergen bir xewiride, zéng chingxung xu jintawning dölet re'islik wezipisini ötküzüwélish éhtimali barliqini ilgiri sürgen. "Asiya heptilik zhornili" bu xil éhtimalliqni chetke qaqqan bolsimu, lékin béyjingdiki weziyettin xewer erbaplar zéng chingxungning 17 - qurultayda merkizi herbiy ishlar komitétining mu'awin re'islikige saylinish éhtimali barliqini bildürgen. Bu qarashni ilgiri sürgüchiler, zéng chingxungning 22 - yanwar küni xelq sariyida taylandning bash herbiy idare qilghuchi emeldari général sontini qobul qilghanliqini we zéng chingxungning wezipisi bilen munasiwetsiz bu qobulni herbiy ishlar komitétigha mu'awin re'isi bolush teyyarliqini qiliwatqanliqining bisharitimidu ? dep qaraydighanliqini bildürmekte. (Erkin)