Kériye nahiyiside yash - ösmürlerning idiyisini tekshürüsh herikiti bashlandi

• Muxbirimiz eqidening bu heqtiki melumati
• Download story audio

Kishiler 2003-yili15-séntebir küni xotende élip bérilgen térorizim körgezmiside . AFP

Xoten wilayitining kériye nahiyiside "alte yashtin 40 yashqiche bolghan kishilerning idiyiwi ehwalini keng kölemde tekshürüsh herikiti qozghalghan bolup, kériye nahiyiside chiqidighan ammiwi uchur tor bétide eynen mundaq déyilgen:

"Biz nahiyimizning, yéngi bir dewir yash - ösmürlirining idiye ehwali bilen pütünley tonushup chiqish bilen birge, ularning idiyisini waqtida kontrol qilish üchün, bolupmu yash‏- ösmürlerning qanunsiz diniy pa'aliyetlerge qatnishish shuningdek jinayet shekillendürüsh ehwalliri üstide tekshürüsh élip bérishimiz kérek. Buning üchün aktipliq bilen yash - ösmürlerge idiyiwi exlaq terbiyisini kücheytishte yéngi usullarni qollinishimiz, buningda qolgha keltürgen tejribe - sawaq we netijilirimizni xulasilep, mewjut mesililerni choqum bir terep qilishimiz, bu arqiliq yenimu bir qedem ilgiriligen asasta yash - ösmürlerning qanunsiz pa'aliyetlerni sadir qilishining aldini élishimiz kérek".

Bu heqte bérilgen uchurda yene, tekshürüsh da'irisining nahiye boyiche 6 yashtin 40 yashqiche, yeni 13 yashtin töwenler bir guruppa, 14 ‏yashtin 16 yashqiche bolghanlar bir guruppa, 17 din 25 kiche, 26 din 35 kiche, 36 din 40 yashqiche bolghanlarning her biri bir guruppigha ayrilip élip bérilidighanliqi qeyt qilin'ghan.

Tekshürüsh élip baridighan asasliq orunlar, diniy telim bérilidighan yer asti öyliri, chambashchiliq merkizi, qanunsiz teblix pa'aliyet orunliri bolup, bolupmu yash - ösmürlerning milli bölgünchilik, diniy radikal we zorawan küchlerdin ibaret üch xil küchler bilen bolghan munasiwiti qatarliqlarni éniqlap, diniy radikalliq idiyisi küchlük yashlarni asas qilip, tekshürüsh, söhbet ötküzüsh we emeliy heriketke ötüsh shekilliri arqiliq élip bérilidiken.

Bu munasiwet bilen muxbirimiz eqide kériye nahisige téléfon urup ehwal igilidi.