Икки корийә оттурисида йерим әсрдин кейин пойиз қатниди


2007-12-13
Share

12- Айниң 11 ‏- күни, җәнубий корийәниң гүлдәстә билән безәлгән 12 вагонлуқ йүк пойизи шималий корийигә кирди. Бу 1950 ‏- йили икки корийә оттурисида уруш партлап алақә үзүлгәндин кейин пәйда болған тунҗи йеңилиқ болуп һесаблиниду.

Б б с ниң баян қилишичә, җәнубий корийидин шималий корийигә баридиған йүк пойизини һәрбийләр вә дөләт пуқралири йол бойида сәп тартип, гүлдәстә тутуп алқишлап узутуп қойди. Бу йүк пойизи шималий корийигә 25 километир ичкириләп кирип, шималий корийиниң санаәт райони үчүн керәклик қурулуш материяллирини йәткүзүп беридикән. У қайтип кәлгәндә шималий корийидики кайсоң санаәт районидин аяқ қатарлиқ мал елип келидикән.

Икки корийини уруш бөлүвәткән, тинчлиқ йеқинлаштурмақта

Америка авазиниң баян қилишичә, шималий корийә 1950 ‏- йили җәнубий корийигә һуҗум қилғандин кейин, икки тәрәп бир нәччә йилғичә уруш һалитидә турди. 1953 ‏- Йили уруш тохтитиш келишими имзаланғандин кейинму, уларни пүтүнләй охшимайдиған иҗтимаий түзүм иккигә айрип турди. 2000 ‏- Йили икки корийә рәһбәрлири тунҗи қетим сөһбәт өткүзди.

Бу йил 10 ‏- айниң 4 ‏- күни, җәнубий корийә президенти ромухюн билән шималий корийә рәиси ким йоңел сөһбәт арқилиқ 'икки тәрәп мунасивитини тинч тәрәққи қилдуруш хитабнамиси' елан қилди. Узун йиллиқ тиришчанлиқ арқилиқ һазир икки корийә оттурисида йүк пойизи қатниди. Буниңдин кейин йолучилар пойизи қатнайду. Бу арқилиқ икки корийиниң бирликкә келип ортақ тәрәққи қилишидин үмид көрүнмәктә. Җәнубий корийә тәрәп бу қетим башланған пойиз қатнишиниң себирийә арқилиқ явропаға туташтурулушини үмид қилиду.

Пойиз қатниғандин кейинла икки корийә оттурисида генерал дәриҗилик әмәлдарлар сөһбәт өткүзди

Франсийә агентлиқиниң 13 ‏- декабир күни панмунҗон шәһәрчисидин хәвәр қилишичә, йерим әсрдин буян икки корийиниң алдинқи сепи болуп келиватқан 38 ‏- параллел сизиқидики панмунҗон шәһәрчисидә бүгүн икки тәрәпниң генерал дәриҗиликләр сөһбити өткүзүлди.

Җәнубий корийә дөләт мудапиә министирлиқиниң ашкарилишичә, шималий корийә тәрәп бу сөһбәттә җәнубий корийә ишчилири вә саяһәтчилириниң чегридин өтүш рәсмийәтлирини аддийлаштурушқа; шималдики кайсоң санаәт районида вә сериқ деңиз қирғиқидики чәкләнгән районларда кишиләрниң интернеттин, симлиқ вә симсиз телефон мулазимитидин пайдилинишиға қошулди. Бу сөһбәттә йәнә, алдинқи сәптики шәһәрчиләрдә қоллинилидиған бихәтәрлик тәдбирлири мәсилисидә вә йерим әсрдин буян тәвәлик мәсилиси талаш-тартишта туруватқан, һәтта қанлиқ вәқә йүз бәргән деңиз йүзидә белиқ тутуш мәсилисидә җәнубий корийә хәлққә асанлиқ туғдуруш һәққидә йеңи келишим һасил қилинди.

Америка билән шималий корийә оттурисида омумйүзлүк алақә қилишниң тәйярлиқи техи пүтмиди

Б б с ниң бүгүн хәвәр қилишичә, гәрчә һазир америка билән шималий корийә мунасивитидә яхшилиниш пәйда болған болсиму, әмма америка ташқи ишлар министири кандилиза райс ханим бүгүн америка билән шималий корийә оттурисида омумйүзлүк алақә қилишниң тәйярлиқи техи пүтмигәнликини, буниң үчүн алди билән шималий корийә ядро қораллири пиланлирини әмәлдин қалдурғанлиқини тәпсилий ашкарилиши лазимлиқини әскәртти.

Шундақла йәнә, нюйорк филармоник оркистериниң шималий корийигә берип оюн қоюшиға рухсәт қилинғанлиқини алқишлайдиғанлиқини, бундақ алий дәриҗилик мәдәнийәт алмаштуруштин кәлгүсидә йеңи өзгиришләр пәйда болидиғанлиқиға ишинидиғанлиқини билдүрди.

Икки корийә мәсилисиниң тарихий арқа көрүнүши

Хәвәр архиплириға қариғанда, 1943 ‏- йили 12 ‏- айниң 1 ‏- күни хитай, америка, әнгилийә "қаһирә хитабнамиси" елан қилди. Униңда корийини японийидин мустәқил қилиш нишани бәлгиләнгән иди. Америка бу вақитта японийини тәслим қилдурушни совет иттипақи билән бирликтә ишқа ашурушни үмид қилған иди. 1945‏- Йил 2 ‏- айниң 4 ‏- күнидин 11 - күнигичә давамлашқан ялта йиғинида совет иттипақи, әнгилийә, америкидин ибарәт үч чоң дөләт башлиқлири моңғулийә, корийә, шәрқий түркистан мәсилиси қатарлиқ бир йүрүш мәсилиләрдә мәхпий келишкәндин кейин, совет иттипақи 1945 ‏- йили 8 ‏- айниң 8 ‏- күни японийигә уруш елан қилишни баһанә қилип корийиниң шимал тәрипигә әскәр киргүзди. Америка өзиниң корийә йерим арили вә тинч окян районидики мәнпәәтлирини қоғдаш үчүн икки корийә оттурисида 38‏- параллел сизиқи пәйда қилишни оттуриға қойғанда совет иттипақи буниңға қошулди.

японийә 1945 ‏- йили 9 ‏- айниң 2 ‏- күни тәслимнамиға имза қойғандин кейин, 1948 ‏- йили совет иттипақи шималдин, америка җәнубтин әскәр чекиндүрди. Шуниңдин кейин корийидики икки һөкүмәт бир-бирини етирап қилмиди. Шималий корийә 1950 ‏- йили 6 ‏- айниң 25 ‏- күни җәнубий корийигә қарши уруш қозғиди. Коммунист хитай армийиси шималий корийини қоллап урушқа арилашқандин кейин, 27 ‏- күни, америка башчилиқидики 16 дөләттин тәшкилләнгән бирләшкән дөләтләр армийиси сотсиялизмниң кеңийишини чәкләш үчүн урушиға арилашти.

1953 ‏- Йили 7 ‏- айниң 23 ‏- күни, коммунист хитай армийиси билән шималий корийә бир тәрәп, америка башчилиқидики бирләшкән дөләтләр армийиси билән җәнубий корийә йәнә биртәрәп болуп сөһбәт өткүзгәндин кейин уруш тохтиди. Икки корийә оттурисида узунлиқи 241 километир, кәңлики 4 километирлиқ уруштин хали район шәкилләнди. Шуниңдин кейин икки корийә бир-бирини чегридин өткүзмиди. 1991 ‏- Йилиға кәлгәндә, бу икки корийә айрим-айрим һалда бирләшкән дөләтләр тәшкилатиға әза болуп кирди. Бундақ һаләт он нәччә йил давамлашқандин кейин, һазир қаршилишиштин тинчлиққа вә бирлишишкә қарап қәдәм басти. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт