Ikki koriye otturisida yérim esrdin kéyin poyiz qatnidi


2007-12-13
Share

12- Ayning 11 ‏- küni, jenubiy koriyening güldeste bilen bézelgen 12 wagonluq yük poyizi shimaliy koriyige kirdi. Bu 1950 ‏- yili ikki koriye otturisida urush partlap alaqe üzülgendin kéyin peyda bolghan tunji yéngiliq bolup hésablinidu.

B b s ning bayan qilishiche, jenubiy koriyidin shimaliy koriyige baridighan yük poyizini herbiyler we dölet puqraliri yol boyida sep tartip, güldeste tutup alqishlap uzutup qoydi. Bu yük poyizi shimaliy koriyige 25 kilométir ichkirilep kirip, shimaliy koriyining sana'et rayoni üchün kéreklik qurulush matériyallirini yetküzüp béridiken. U qaytip kelgende shimaliy koriyidiki kaysong sana'et rayonidin ayaq qatarliq mal élip kélidiken.

Ikki koriyini urush bölüwetken, tinchliq yéqinlashturmaqta

Amérika awazining bayan qilishiche, shimaliy koriye 1950 ‏- yili jenubiy koriyige hujum qilghandin kéyin, ikki terep bir nechche yilghiche urush halitide turdi. 1953 ‏- Yili urush toxtitish kélishimi imzalan'ghandin kéyinmu, ularni pütünley oxshimaydighan ijtima'iy tüzüm ikkige ayrip turdi. 2000 ‏- Yili ikki koriye rehberliri tunji qétim söhbet ötküzdi.

Bu yil 10 ‏- ayning 4 ‏- küni, jenubiy koriye prézidénti romuxyun bilen shimaliy koriye re'isi kim yong'él söhbet arqiliq 'ikki terep munasiwitini tinch tereqqi qildurush xitabnamisi' élan qildi. Uzun yilliq tirishchanliq arqiliq hazir ikki koriye otturisida yük poyizi qatnidi. Buningdin kéyin yoluchilar poyizi qatnaydu. Bu arqiliq ikki koriyining birlikke kélip ortaq tereqqi qilishidin ümid körünmekte. Jenubiy koriye terep bu qétim bashlan'ghan poyiz qatnishining sébiriye arqiliq yawropagha tutashturulushini ümid qilidu.

Poyiz qatnighandin kéyinla ikki koriye otturisida général derijilik emeldarlar söhbet ötküzdi

Fransiye agéntliqining 13 ‏- dékabir küni panmunjon sheherchisidin xewer qilishiche, yérim esrdin buyan ikki koriyining aldinqi sépi bolup kéliwatqan 38 ‏- parallél siziqidiki panmunjon sheherchiside bügün ikki terepning général derijilikler söhbiti ötküzüldi.

Jenubiy koriye dölet mudapi'e ministirliqining ashkarilishiche, shimaliy koriye terep bu söhbette jenubiy koriye ishchiliri we sayahetchilirining chégridin ötüsh resmiyetlirini addiylashturushqa؛ shimaldiki kaysong sana'et rayonida we sériq déngiz qirghiqidiki cheklen'gen rayonlarda kishilerning intérnéttin, simliq we simsiz téléfon mulazimitidin paydilinishigha qoshuldi. Bu söhbette yene, aldinqi septiki sheherchilerde qollinilidighan bixeterlik tedbirliri mesiliside we yérim esrdin buyan tewelik mesilisi talash-tartishta turuwatqan, hetta qanliq weqe yüz bergen déngiz yüzide béliq tutush mesiliside jenubiy koriye xelqqe asanliq tughdurush heqqide yéngi kélishim hasil qilindi.

Amérika bilen shimaliy koriye otturisida omumyüzlük alaqe qilishning teyyarliqi téxi pütmidi

B b s ning bügün xewer qilishiche, gerche hazir amérika bilen shimaliy koriye munasiwitide yaxshilinish peyda bolghan bolsimu, emma amérika tashqi ishlar ministiri kandiliza rays xanim bügün amérika bilen shimaliy koriye otturisida omumyüzlük alaqe qilishning teyyarliqi téxi pütmigenlikini, buning üchün aldi bilen shimaliy koriye yadro qoralliri pilanlirini emeldin qaldurghanliqini tepsiliy ashkarilishi lazimliqini eskertti.

Shundaqla yene, nyuyork filarmonik orkistérining shimaliy koriyige bérip oyun qoyushigha ruxset qilin'ghanliqini alqishlaydighanliqini, bundaq aliy derijilik medeniyet almashturushtin kelgüside yéngi özgirishler peyda bolidighanliqigha ishinidighanliqini bildürdi.

Ikki koriye mesilisining tarixiy arqa körünüshi

Xewer arxiplirigha qarighanda, 1943 ‏- yili 12 ‏- ayning 1 ‏- küni xitay, amérika, en'giliye "qahire xitabnamisi" élan qildi. Uningda koriyini yaponiyidin musteqil qilish nishani belgilen'gen idi. Amérika bu waqitta yaponiyini teslim qildurushni sowét ittipaqi bilen birlikte ishqa ashurushni ümid qilghan idi. 1945‏- Yil 2 ‏- ayning 4 ‏- künidin 11 - künigiche dawamlashqan yalta yighinida sowét ittipaqi, en'giliye, amérikidin ibaret üch chong dölet bashliqliri mongghuliye, koriye, sherqiy türkistan mesilisi qatarliq bir yürüsh mesililerde mexpiy kélishkendin kéyin, sowét ittipaqi 1945 ‏- yili 8 ‏- ayning 8 ‏- küni yaponiyige urush élan qilishni bahane qilip koriyining shimal teripige esker kirgüzdi. Amérika özining koriye yérim arili we tinch okyan rayonidiki menpe'etlirini qoghdash üchün ikki koriye otturisida 38‏- parallél siziqi peyda qilishni otturigha qoyghanda sowét ittipaqi buninggha qoshuldi.

Yaponiye 1945 ‏- yili 9 ‏- ayning 2 ‏- küni teslimnamigha imza qoyghandin kéyin, 1948 ‏- yili sowét ittipaqi shimaldin, amérika jenubtin esker chékindürdi. Shuningdin kéyin koriyidiki ikki hökümet bir-birini étirap qilmidi. Shimaliy koriye 1950 ‏- yili 6 ‏- ayning 25 ‏- küni jenubiy koriyige qarshi urush qozghidi. Kommunist xitay armiyisi shimaliy koriyini qollap urushqa arilashqandin kéyin, 27 ‏- küni, amérika bashchiliqidiki 16 dölettin teshkillen'gen birleshken döletler armiyisi sotsiyalizmning kéngiyishini cheklesh üchün urushigha arilashti.

1953 ‏- Yili 7 ‏- ayning 23 ‏- küni, kommunist xitay armiyisi bilen shimaliy koriye bir terep, amérika bashchiliqidiki birleshken döletler armiyisi bilen jenubiy koriye yene birterep bolup söhbet ötküzgendin kéyin urush toxtidi. Ikki koriye otturisida uzunliqi 241 kilométir, kengliki 4 kilométirliq urushtin xali rayon shekillendi. Shuningdin kéyin ikki koriye bir-birini chégridin ötküzmidi. 1991 ‏- Yiligha kelgende, bu ikki koriye ayrim-ayrim halda birleshken döletler teshkilatigha eza bolup kirdi. Bundaq halet on nechche yil dawamlashqandin kéyin, hazir qarshilishishtin tinchliqqa we birlishishke qarap qedem basti. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet