Икки чоң йиғин билән хәлқниң оттурисидики чегра наһайити ениқ
2006.03.06

"Көзитиш җурнили" ниң 4 -март күнидики санида елан қилин ған "икки йиғин билән хәлқниң оттурисидики чегра наһайити ениқ" сәрләвһилик обзорда баян қилинишичә, мәмликәтлик хәлқ қурултийиниң чоң йиғиниға 3000 адәм хәлққә вәкил болуп , мәмликәтлик сиясий кеңәшниң чоң йиғиниға болса 2200 нәпәр әза кәлгән. Дөләтниң мушундақ "әтивалиқ кишилири" дин җәми 5200 нәпәр адәм һазир бейҗиңда икки чоң йиғинни ечиватиду. Бу икки чоң йиғинни 15 миң қораллиқ сақчини өз ичигә алған 620 миң адәм қоғдаватиду. Бейҗиңда бу икки чоң йиғинға даир муһим нуқтиларни 12 миң қораллиқ сақчи көзәт қилип сақлаватиду. Хәлқниң дәрд-әрзини тәкшүрүш билән шуғуллиниватқан адвукат гав җичең әпәндини бихәтәрлик хадимлиридин аз дегәндә 10 нәпәр кәспий хадим назарәт қиливатиду. Сиясий мулаһизичи лю шавбо әпәндиниң туралғусиниң әтрапидиму қатму-қат пост бар. "Вәкилләр" чүшкән меһманханиларға сирттин телефон маңмайду. Бундақ меһманханиларниң ичидики банкиларғиму сирттин бирким кирәлмәйду. Бундақ икки йиғинниң даирисидин йиғин мулазимити үчүн аҗритилған 800 дин артуқ чоң -кичик аптомобилдин башқа һәр қандақ аптомобил өтәлмәйду. Демәк, бейҗиңдики икки чоң йиғин билән мәмликәттики пүтүн хәлқ оттурисида һечқандақ бағлиниш яки мунасивәт йоқ, буларниң оттурисидики чегра наһайити ениқ айрилған.
Йиғиндин бурунқи тутқун қилиш
Бу икки чоң йиғин ечилиштин 20 күн бурун, хитай һөкүмити 1640 парчә дело паш қилип, 1352 нәпәр гумандар шәхсни тутуп, "әмди җәмийәт аманлиқи наһайити яхши болди" дәп елан қилған иди. Шуниңдин кейин йәнә һәр күни дело паш қиливатиду, адәм тутуватиду.
Шинхуа агентлиқиниң "йираққа нәзәр " дегән һәптилик гезитиниң 9 - санида ашкарилинишичә, хитай һөкүмити 2006 - йили киргәндин буян давамлиқ түрдә "қаттиқ зәрбә бериш" дегән қанунсиз сиясий һәрикәтни елип бериватиду. "Қаттиқ зәрбә бириш" дегәнни әйни вақитта дең шавпиң вәзийәтни контрол қилиш үчүн қолланған тәдбир иди. Шуниңдин кейин бу чарә 23 йил давамлашти. Әйни вақитта дең шавпиң оттуриға қойған "шавкаң җәмийәт" бир қисим кишиләр үчүн аллиқачан қурулуп болған болсиму, әмма бу сүйүмлүк җуңго йезилирида йәнә 40 милйон адәм намратлиқ ичидә турмақта.
Ахбарат җәһәттики контроллуқ
"Тәңритағ тор бети" ниң 4 - март күнидики хәвиридә баян қилинишичә, бейҗиңда ечиливатқан икки чоң йиғин җәрянида, шинхуа агентлиқи, мәркизи телевизийә стансиси, нефит гезити қатарлиқ көплигән учур вастә органлири шинҗаң вәкиллирини зиярәт қилиш үчүн өзини тизимға алдурған. Буниңдин башқа йәнә германийә авази, японийиниң н һ к агентлиқи қатарлиқ өзини тизимға алдуруп сорайдиған суаллириниму алдин йезип тапшурған чәтәл учур вастә органлириму һазирға қәдәр өчирәт күтүп турмақта. Әмма тәңритағ тор бети бүгүнгә қәдәр пәқәт ваң лечуәнниңла гуруппа йиғинида қилған сөзини елан қилди. У "пүтүн мәмликәттә деһқанчилиқ беҗи кәчүрүм қилинди, шинҗаңда мәҗбурий маарип йолға қоюлуп 2 милйон 280 миң оқуғучи оқуш пули төлимәй оқуйдиған болди, бу бизниң коммунист партийимизниң, бизниң һөкүмитимизниң хәлқни сөйидиған партийә вә хәлқни сүйидиған һөкүмәт икәнликиниң испати" дәп махтанған.
Әрз ейтқили кәлгәнләр тутулмақта
Әркин асия радиосиниң мухбири фаң юәнниң хәвәр қилишичә, икки чоң йиғинниң ахбарат ишханиси бу икки чоң йиғинни хәлқни нәзәрдә тутидиған йиғин дәп мәдһийилигән.
Әмма бу икки чоң йиғинға дәрд ейтиш үчүн бейҗиңға кәлгән дөләт пуқралири буни инкар қилиду. Уларниң ейтишичә, бейҗиңға дәрд ейтқили кәлгән кишиләр һөкүмәт сақчилириниң тутқун қилишиға, һақарәтлишигә учримақта. Икки чоң йиғинға қарита имза қоюп хәт йезип, дөләтниң әрзийәт түзүмини өзгәртиш, әмгәк билән өзгәртиш түзүмини бикар қилиш, дөләт пуқралириниң һуқуқини қоғдаш, асасий қанун бойичә сорайдиған сот мәһкимиси қуруш һәққидә тәклип сунған кишиләр тутқун қилмақта. Сақчиларниң адәм тутқанлиқини көргән йәнә бир ханим әркин асия мухбириға испатлиқ бәргән.
Йәнә мәлум бир киши бейҗиң шәһиридә алий сот мәһкимисиниң алдида наһайити көп адәм топлашқанлиқини, уларниң саниниң наһайити көплүкини, һөкүмәт сақчилириниң болса аптомобил билән бу җайға келип халиғанчә адәм тутуп кетиватқанлиқини баян қилған. (Вәли)
Мунасивәтлик мақалилар
- Хитайда икки чоң йиғин ечиливатқанда җәмийәттә немә боливатиду?
- "Хәлқниң вәкиллири" йиғин ачсила, һөкүмәт сақчилири хәлқни бастурамду?
- Хитайда дәвагәрләр зорлуқ вә тәһдит астида бастурулмақта
- Бейҗиңдики әрзийәт мәһәллиси чеқиветилди
- Хитай 4 нәпәр хәлқ қурултийи вәкилиниң вәзиписини елип ташлиди
- Хитай компартийисиниң 16 - нөвәтлик 5 - омумий йиғини һәққидә мулаһизиләр
- Кишилик һоқуқни басидиған өктәбир байрими