Ikki chong yighinning sirtida dölet puqralirining herxil namayishliri dawamlashmaqta
2006.03.09
Erkin asiya radi'osining muxbiri fangyu'enning xewer qilishiche, hökümet saqchilirining béyjingda échiliwatqan ikki chong yighinni qoghdash tedbirliri intayin puxta bolsimu, emma memliketning her qaysi jayliridin béyjinggha derd éytqili kéliwatqan dölet puqraliri, yighin dawamlishiwatqan mushu künlerde saqchilarning tosup tutqun qilishi her qanche dehshetlik bolushigha qarimay, herxil yéngi shekillerni ijad qilip özlirining iradisini ipadilep turmaqta. Dölet puqraliri kichik guruppilargha bölünüp, oxshimighan yönülüshtin tyen'enmén meydanigha qarap ilgirilep, büyük xelq sariyigha kirish üchün qolida özlirining shikayetnamisini égiz kötürüp teng heriket qilidighan weqeler künde bir nechche qétim yüz bérip turmaqta. Béyjinggha derd éytqili kelgen dölet puqrasi du xanim muxbirgha özi körgen ehwalni sözlep bergen.
Erzdarlar tutulmaqta
Amérika birleshme agéntliqining xewer qilishiche, düshenbe küni 60 yash chamisidiki ikki kishi büyük xelq sariyigha 20 nechche métir qalghan jayghiche barghanda, ular derhal bir chong pilakatni chiqirip namayish qilghan. Saqchilar ularni qoghlap kélip, ularning qolidiki pilakatni we shikayetnamilarni tartiwélip tutup ketken. Yekshenbe künidimu mushuninggha oxshash weqe bir nechche qétim yüz bergen. Xewerde bayan qilinishiche yene, seyshenbe küni dölet kabinéti erziyet ishxanisining xizmetchiliri 'söhbet ötküzüsh' dégen nam bilen bir nechche yüz erziyetchini bir jaygha toplap saqchilargha tutup bergen. Erziyet ishxanisidin shangxeyge qayturup kélin'gen 60 nechche kishining ichidiki bir ependining muxbirgha éytip bérishiche, eger u shangxeyge qayturup kélinmigen bolsa, béyjingda küch ulap achliq élan qilishni uyushturiwatqan adwokat gaw jzhchéng ependi bilen kürüshmekchi iken. Bu ependining éytishiche, hazir béyjingda yene nurghun adem méhmanxanilarda solunup nezerbentke élinip turmaqta. Méhmanxanida nezerbentke élin'ghan bir xanim muxbirgha özining hazirqi ehwalini sözlep bergen. Muxbirimizning bayan qilishiche, hazir shangxeyde yene bir munche kishi öz öyliride nezerbent astida turmaqta.
Béyjingdiki küch ulap achliq élan qilish herikitini uyushturghan adwokat gawjzhchéng ependining muxbirimizgha éytip bérishiche, charshenbe künidiki küch ulap achliq élan qilishqa xongkongluq adwokat xojünrén ependi bashchiliq qilghan. Shu küni yene gu'angju, shenshi, sendung qatarliq 4 ölkidimu küch ulap achliq élan qilin'ghan. Xelq'aradin az dégende 30 teshkilat ularni qollap uchur yollighan. Sichu'ende peyshenbe küni yene bir nechche adem küch ulap achliq élan qilishqa qatnishidu.
Xongkongda naraziliq namayishi
Erkin asiya radi'osining muxbiri shinyüning xewer qilishiche, béyjingda iki chong yighin dawamlishiwatqanda, 8 -mart küni, xongkongluqlarning tyen'enmén aniliri teshkilati xongkongning béyjingdiki ish béjirish ornida 'etirgül namayishi' ötküzgen. Qolida etir gül turup, meydisige etirgül izniki taqap, derexlergimu mumkin qeder qeghez etirgül ésip namayish qilidighan bu heriketni uyushturghan kishining muxbirgha éytip bérishiche, qolida rehimdillikni we qizil qanni eslitidighan aq we qizil etir gül tutup namayish qilghan kishilerning meqsiti -buningdin 10 nechche yil burun tyen'enmén meydanida öltürülgen ewladlarning anilirigha bundaq shekil arqiliq sirtqi dunyada ulargha hésdashliq qilidighan adem barliqini hés qildurush, shundaqla yene, xitay hökümitini özining dölet puqralirini ölüp ketken ewladlirini eslesh huquqidinmu mehrum qalduridighan, hetta ewladlirini esligen xelqqe biwaste térroluq yürgüzidighan rehimsiz herikettin waz kéchishke, xelqqe insanperwerlik bilen mu'amile qilishqa ündeshtin ibaret bolghan.
Bu xanim sözide yene 'xongkongda kishiler héch bolmighanda özining pikrini ochuq bayan qilalaydu, emma tyen'enménde öltürülgen ewladlarning aniliri bolsa téxiche özining balilirigha bolghan qayghusinimu ochuq ipadiliyelmeydu. Hökümetning bundaq rehimsizlikini tügitish kérek' dégen.
Munasiwetlik maqalilar
- Ikki chong yighindiki gül-destiler jem'iyettiki weyranliqni yapalamdu?
- Wang léchüenning xelq qurultiyida qilghan doklatigha inkas
- Xitay bilen teywen, xongkong otturisidiki jiddiy riqabet
- Ikki chong yighin bilen xelqning otturisidiki chégra nahayiti éniq
- Xitayda ikki chong yighin échiliwatqanda jem'iyette néme boliwatidu?
- "Xelqning wekilliri" yighin achsila, hökümet saqchiliri xelqni basturamdu?
- Xitayda dewagerler zorluq we tehdit astida basturulmaqta