Bu yil béyjingda ikki chong yighin'gha qatnishidighan 5000 dek wekil üchün 500 ming adem tertip saqlaydiken

• Muxbirimiz welining bu heqtiki melumati
• Download story audio

Béyjingda her yili bir qétim échilidighan ikki chong yighin )memliketlik xelq qorultéyi we memliketlik siyasiy kéngeshning yilliq yighini( gha her qaysi ölkilerdin qatnashturulidighan wekiller béyjinggha kéliwatidu. B b s ning bayan qilishiche, béyjingda her yili bir qétim échilidighan ikki chong yighin mezgili xitayda nahayiti sezgür mezgil. Xitay hökümiti bu yilqi ikki chong yighin échilishtin burun, béyjing shehiridila bélikige resmiy belge taqap tertip saqlash üchün 500 ming adem ajratqan. Yighin jeryanida erz éytish cheklen'gen.

Béyjing sheherlik sherqi sheher rayoni saqchi idarisila yighinni qoghdash üchün ikki chong qoshun teshkilligen

Béyjing yashliri gézitining bayan qilishiche, béyjing sheherlik sherqi sheher rayoni saqchi idarisila yighinni qoghdash üchün ikki chong qoshun teshkilligen. Uning biri, sheherde hökümettin turmush yardem puli éliwatqan kishilerdin teshkillen'gen ming kishilik charlash etriti. Yene biri, 2500 neper kommunist partiye ezasidin teshkillen'gen posta turup nöwetchilik qilish etriti. Bularning hemmisi bélikige resmiy qizil belge taqaydiken. Ularning wezipisi kochilarda charlash-tertip saqlash we su, éléktir, gaz qatarliq muhim tarmaqlarda, köwrük béshida, doqmushlarda posta turup, ishikke qarash, ademlerge qarash, guman qilghanliki adem yaki ehwalni saqchigha doklat qilishtin ibaret iken.

Texminen her yili ikki chong yighin üchünla 5000 wekil üchün 5 milyard yu'en chiqimni xelq tölewatidu

Bügün 'boshün tor béti'de, béyjingda her yili bir qétim échilidighan ikki chong yighin'gha qatnishidighan wekillerning chiqimi hésablap körülgen. Uningda mundaq dep bayan qilin'ghan: xunen ölkisidiki xu'arung nahiyilik maliye idarisining sanliq melumatigha qarighanda, 2003 ‏- yili ikki chong yighin üchün biwaste qilin'ghan chiqim 485 ming yu'en. Turmush yardem puli qatarliq herxil chiqimlarni qoshsa bir milyon yu'endin ashiqan. Mushu hésab buyiche bolsa, pütün memliket buyiche 2861 nahiye her yili ikki chong yighin üchünla 2 milyard 800 milyon yu'en chiqim qilghan bolidu. 4 Tin 10 ghiche nahiyini idare qilidighan wilayet derijilik 265 sheher öz aldigha yene 1 milyard 300 milyon yu'en chiqim qilishi kérek. 23 Ölke, 5 aptonom rayon, 4 biwaste qarashliq sheher, 2 alahide rayon öz aldigha yene 20 milyon yu'en chiqim qilishi kérek. Heryili ikki chong yighin'gha qatnishidighan 5000 wekilning her künlük tamaq puli 100 yu'endin, yataq puli 150 yu'endin 600 yu'en'giche, qatnash puli 1000 yu'endin hésablansa 5 milyon yu'en. Yighin aldi - keyni bolup 20 kün hésablansa, buninggha yighin jeryanida memliket buyiche tertip saqlaydighan 650 ming ademning her künlük turmush yardem pu li, uchur wastilirining chiqimi qatarliqlarni qoshqanda, yerliktin merkezgiche texminen her yili ikki chong yighin üchünla 5 milyard yu'en chiqim boluwatidu. Bu pulni qéri, késel, mejroh yaki nariside balilarni öz ichige alghan pütün nopus béshigha chachqanda, her bir kishi her yili ikki chong yighin üchün texminen 4 yu'endin bedel tölewatidu.

Ikki chong yighin'gha qatnishidighan wekiller emeliyette xitay kommunist partiyisining wekilliri

‏-‏- Xébéy ölkisidin yighin'gha kélishi belgilen'gen 120 neper wekilning kommunist partiye emeldari yaki partiye ezasi emesliri yoq, ‏-‏- dep bayan qilinidu 'yéngi esr zhurnili'da élan qilin'ghan bir mulahizide, ‏- 'xelq wekili' dégen sözning menisidin qarighanda, u xelq saylap chiqqan, xelqqe wekillik qilidighan kishi. Emma xitayda 'wekil' dep yighin'gha kélidighanlar asasen xitay kommunist partiyisi özi belgiliwalghan, xitay kommunist partiyisige wekillik qilidighan, xitay kommunist partiyining xeliqni basturidighan siyasetliri üchün xizmet qilidighan kishiler.

Bezi wekillerning inkasi

'Boshün tor béti'de bayan qilinishiche, her yili ikki chong yighin üchün nahayiti köp pul xejlinidu, ‏- deydu xébéy öksidin belgilen'gen siyasi kéngesh ezasi, démokratik partiyiler wekili wang fulin, ‏- yighinning daghdughisi, heywisi nahayiti chong, yighin üchün saqchi aptomobilliri yol achidu, yighinni saqchilar qoghdaydu. Emeliyette xelqni bi'aram qilidu. Her bir wekilning her künlük tamaq pulila 100 yu'endin ashidu. Yighin mezgilide qantash jiddiylikidin nurghun ademning shexsiy tapawiti yoq bolidu. Buni oylisam yighin'gha qilin'ghan bihude chi'iqmgha ichim aghriydu. ‏

- Siyasiy kéngesh ezasi déyilgen kishilerning xéli köp sandikiliri 'alahide étibar bérish' namida belgilen'gen kishiler, ‏- deydu ottura junggo maliye uniwérsitétining 68 yashliq proféssori, ‏-‏- emeliyette bundaq bir qisim kishilerning jem'iyette héchqandaq roli yoq, mushundaq kishiler bilen échilghan ikki chong yighin peyda qilghan qatnash jiddiylikidin bi'aram bolghan xelq bu wekillerni tillawatidu, bezi ar-nomusi bar wekiller set ahanetni anglighanda özini qoyghili yer tapalmaydu. (Weli)