Динсиз хитай билән христиан америкилиқниң илаһ һәққидики деалоги нәшрдин чиқти

• Мухбиримиз вәлиниң бу һәқтики толуқ мәлумати
• Download story audio

Бирләшмә агентлиқиниң бейҗиңдин хәвәр қилишичә, коммунист хитай һөкүмитиниң сабиқ дөләт кабинети баянатчиси, һазир хитай мәслиһәтчиләр комитетиниң әзаси җавчиҗең әпәнди билән америкилиқ инҗил вәзчиси луйс палав әпәнди йеқинда 'илаһ' ниң бар яки йоқлиқи һәққидә икки күн муназирә қилған. Динсиз җав әпәнди инҗил вәзчиси палав әпәндидин 'илаһ' ниң мәвҗут икәнликини тәҗрибиханида испатлап көрсүтүп беришини тәләп қилған. Инҗил вәзчиси палав әпәндиму динсиз җав әпәндин 'илаһ'ниң мәвҗут әмәсликини испатлап көрсүтүп беришни тәләп қилған. Улар һәр иккиси шундақ қилидиғанлиқини билдүргән.

"Өстәң бойидики сөһбәт: динсиз билән христианниң достанә деалоги"

Хәвәрдә баян қилинишичә, бу икки әрбаб өз ара сөзлишип муназирә қиливатқили 18 ай болған болсиму, пәқәт уларниң йеқинда өткүзгән икки күнлүк муназирисила хитайда рәтлинип "өстәң бойидики сөһбәт: динсиз билән христианниң достанә деалоги" дегән 140 бәтлик бир китап болуп нәшрдин чиқти. Бу китабиниң хитайчиси 10 миң нусха, ингилизчиси 2000 нусха бесилған. 'Йеңи дуня нәшрияти'ниң башлиқи җавҗун әпәндиниң баян қилишичә, бу китаблар дуканға селинған һаман сетилип түгигән.

Җав билән палав әпәндиләр өз ара қошулидиған нуқтилар бар, қошулмайдиған ноқтиларму бар хәвәрдә баян қилинишичә, һазир җав билән палав әпәндиләр өз ара қошулидиған ноқтиларму бар, қошулмайдиған ноқтиларму бар. Дуня қарши бир -биригә түптин охшимайдиған бу икки кишиниң растчиллиқ билән, бир-бирини һүрмәт қилишқан һалда, өз көз қарашлирини ениқ баян қилип муназирә қилғанлиқиниң өзила бир ғәлибә, ‏-‏-‏- дәйду америкиниң оригин штатидики портләнди шәһиридин кәлгән инҗил вәзчиси палав әпәнди 28 ‏- авғуст күни ечилған ахбарат йиғинида. Хитайдики динсиз җав әпәндиму буни қуввәтләйду. Униң баян қилишичә, диний затлар билән динсиз затлар арисида диалог арқилиқ бири - бирини чүшүнүш диний етиқади охшимайдиған хәлқләр үчүн бир йеңи йол. Бу қетимқи сөһбәттә оттуриға қоюлған ноқтилар диний җәһәттә бир- бирини чүшәнмәйдиған хәлқниң өз ара чүшәнчә һасил қилишини илгири сүриду. Әмма һазир бу икки киши бирликкә келәлмәйватқан әң мурәккәп мәсилә ‏-‏- аләмниң қандақ пәйда болғанлиқи вә 'илаһ' ниң нәдә икәнликини билиш мәсилисидин ибарәт.

Бир уйғурниң баяни җав әпәндиниң сөзини рәт қилиду

Хәвәрдә баян қилинишичә, америкилиқ християн палав әпәнди 'хитайдики һөкүмәт динсизлар һөкүмити, бу һөкүмәт хитайда диний ибадәтләрни чәкләйду' дегәндә, хитайдики динсиз җав әпәнди болса 'хитай һөкүмити диний етиқадни бастурмайду ' дегән. Радиомизниң һәқсиз линийиси арқилиқ телефон қилған бир уйғурниң баяни җав әпәндиниң бу сөзини рәт қилиду. (Вәли)