Yawropa parlaménti xitaygha yürgüzülgen imbargoni bikar qilishqa qarshi turdi


2005-04-15
Share

Yawropa parlaménti imbargo toghrisidiki qararida, xitay - yawropa munaswitining iqtisadi saheler bilen cheklinip qalghanliqini eskertip, xitay - yawropa munasiwitining démokratiye we kishilik hoquq jehettiki tereqqiyatini ilgiri sürüshni telep qildi.

Yawropa parlaménti, yawropa ittipaqining xitaydiki démokratiye we kishilik hoquqni ilgiri sürüsh yolida héchqandaq netije alalmighanliqini we buning yawropa parlaméntini epsuslandurghanliqini tekitligen. Qararda, yawropa ittipaqidiki her qaysi döletlerni ittipaqning bashliqlar yighinida, " xitaygha qaritilghan qoral - yaraq imbargosini bikar qilishtin saqlinish, teywen boghuzidiki jiddi weziyetni peseytishning söhbet yollirini tépish, teywen boghuzida herbiy hazirliqlarni qisqartishqa heydekchilik qilish shundaqla teywenni pütün xitaydiki dimokratiyining ölgisi süpitide qollash" ni telep qildi.

Yawropa ittipaqi imbargoni bikar qilishni kéchiktüridiken

Men buninggha ( imbargoning bikar qilinishigha ) qarshi. Eger xitay hökümitige qaritilghan qoral imbargosini bikar qiliwetse, shu döletler yer sharida tarixiy gunah ötküzgen bolidu.

Yawropa parlaménti imbargo mesilisini awazgha qoyushning sel aldida, gérmaniye bash ministiri gérxard shöridir yawropa parlaméntidiki gérmaniyilik ezalargha söz qilip, imbargoni bikar qilishni qollashni telep qilghan. Shöridir, yawropa ittipaqdiki imbargoni bikar qilishni teshebbus qiliwatqan dölet bashliqlirining biri idi. Emma shöridirning tirishchanliqi yawropa parlaméntidiki gérmaniyilik ezalarni yumshitalmighan. Shöridir, imbargo mesiliside gérmaniye tashqi ishlar ministiri bilen pikirdash emes.

Shöridir hökümitining tashqi ishlar ministiri, birleshme hökümettiki gérmaniye yéshillar partiyisining rehbiri yoshka fishir, yawropa ittipaqining imbargoni bikar qilishning kéchiktüridighanliqini bildürgen. Fishirning tekitlishiche, " yawropa ittipaqi béyjingning teywen bilen bolghan munaswitini yumshatqanliqini shundaqla kishilik hoquq xatirisini yaxshilighanliqini körmigiche, imbargoni bikar qilishqa aldirmaydiken,"

Imbargoning bu yil 6 - aygha qeder bikar qilinish mümkinchiliki qalmidi

Yawropa metbu'atlirining mulahize qilishiche, xitay hökümiti 3 - ayning bashlirida maqullighan "döletni parchilashqa qarshi turush qanuni" , yawropa parlaméntining yuqiriqi qararni chiqirishigha türtke bolghan. Gerche yawropa komitéti imbargoni bikar qilish pilanidin waz kechmigenlikini tekitligen bolsimu, emma imbargoning bu yil 6 - aygha qeder bikar qilinish mümkinchiliki qalmidi.

Yawropa ittipaqdiki 25 döletning tashqi ishlar ministirlar yighini, jüme küni lyuksimburgda bashlandi. Ular ikki kün dawamlishidighan yighinda xitay - yawropa ittipaqi munaswitining istiqbali we imbargo mesilisini muzakire qilidu.

Fransiyining imbargoni bikar qilishni teshebbus qilishidiki sewebler

Imbargo mesilisi, pat arida xitayni ziyaret qilidighan fransiye prézidéntining küntertipidiki muhim témilarning biri. Fransiye, gérmaniye bilen birge imbargoni bikar qilishni qollawatidu. Fransiye metbu'atlirining ashkarilishiche, parizhning imbargoni bikar qilishni qollishidiki seweblerning biri, xitayning awi'atsiye, alem boshluqi we yadro énérgiye bazirigha kirishni közleydiken.

Rabiye qadir, "imbargoni bikar qilish jinayet," dédi

Yawropa ittipaqining imbargoni bikar qilish pilani amérika hökümiti, dölet mejlisi we xelq'ara kishilik hoquq organlirining qarshi turushigha uchrighan idi. Amérikidiki meshhur kishilik hoquqperwer zat rabiye qadir, yéqinda amérika döletlik démokratiyini ilgiri sürüsh fondi jem'iyitide söz qilip, imbargoning bikar qilinishigha qarshi turdi. U mundaq dédi:

"Men buninggha qarshi. Eger xitay hökümitige qaritilghan qoral imbargosini bikar qiliwetse, shu döletler yer sharida tarixiy gunah ötküzgen bolidu. Xitay hökümitining eskiri 30 ٪ sirtqa qaritilghan bolsimu, 70٪ öz xelqini qorqutush we basturup turup qorqitishqa qaritilghan. Men bir addiy ayal, köp bilmeymen. Biraq, yawropa birliki shunche siyasiyonlar bar yer, ular bundaq xata ishni qilmas"

Emma fransiyide chiqidighan "dunya géziti" ning körsitishiche, imbargoning ornigha dessitilidighan " qoral - yaraq sétish nizamnamisi" da, qoral sodisigha qattiq cheklimiler qoyulghan. "Dunya géziti", "xitaygha qoral sétish bu yerdiki mesilining achquchi emes, mesilining achquchi yawropa ittipaqining qandaq shertler astida xitaygha qoral - yaraq sétip bérishi kérekliki," dep körsetti.(Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet