Имин турсун индиана университетида доклат бәрди

Америкиниң индиана университетида 14- өктәбирдин 17- өктәбирғичә үч күн оттура явро-асия илмий җәмийитиниң 5- қетимлиқ илмий муһакимә йиғини болуп өтти. Нәччә онлиған дөләттин кәлгән 400 дин артуқ алим қатнашқан бу чоң йиғинда 200 дин артуқ мутәхәссис 60 муһакимә мәйданиға бөлүнүп, оттура явро-асияниң милләт, тарих, сиясәт, екологийә, хәлқара мунасивәтләр вә башқа көп мәзмунларни өз ичигә алған кәң темилар бойичә илмий доклат бәрди.

• Мухбиримиз үмидварниң бу һәқтики программиси
• Download story audio

Бу йиғинда йәнә мәхсус уйғур мәсилиси һәққидиму муһакимә елип берилған болуп, уйғурларға аит он нәччә парчә мақалә оқуп өтүлгән болуп, уйғур темиси йиғинниң тәртипидә муһим орун алған.

Оттура явро-асия илмий җәмийитиниң бу қетимлиқ йиғинида икки нәпәр уйғур мутәхәссиси уйғурларниң тарихи вә мәдәнийити һәққидә мақалә оқуп өткәндин сирт йәнә уйғур елиға кәң тонулған пешқәдәм алим имин турсун әпәндиму яшинип қалғанлиқиға қаримастин, йирақ мусапиләрни бесип, йиғинниң 2-күнигә үлгүрүп кәлди һәмдә униңға 16-өктәбир күни индиана университетиниң оттура явро-асия факултети мәхсус илмий муһакимә уюштуруп бәрди.

Имин турсун әпәндиниң доклати америкилиқ уйғуршунас мутәхәссисләр вә уйғуршунаслиқ пәнигә йеңидин қәдәм қоюватқан аспирантлар шуниңдәк башқа қизиққучиларни өзигә җәлп қилди. Чүнки, униң 80 яшлиқ һаят мусаписи җүмлидин униң уйғур елиниң 30-40-йиллардики сиясий боран-чапқунлирини вә мәшһур уйғур сиясийонлирини өз көзи билән көргәнликидәк шаһидлиқ әвзәллики шу дәврни тәтқиқ қиливатқан профессорларниң алаһидә қизиқишини қозғиғанлиқи үчүн доклатниң темиси имин турсун әпәндиниң һаят паалийәтлирини асасий нуқта қилди.

Индиана университетиниң оттура явро-асия факултетиниң профессори, уйғуршунас доктор гарднер бовиңдон әпәнди ечилиш мурасимида, имин турсунниң һаят-паалийәтлиригә баһа берип, имин турсунниң 40-йиллардики һәр қайси уйғур мәшһур әрбаблири билән һәм сөһбәттә болуши һәмдә униң шу дәвр вәқәлиригә аңлиқ рәвиштә арилишишиниң әмәлий тарихий пакитлиқ рол ойнайдиғанлиқини тәкитлиди. (Үмидвар)