Imin tursun indi'ana uniwérsitétida doklat berdi
2004.10.18
Amérikining indi'ana uniwérsitétida 14- öktebirdin 17- öktebirghiche üch kün ottura yawro-asiya ilmiy jem'iyitining 5- qétimliq ilmiy muhakime yighini bolup ötti. Nechche onlighan dölettin kelgen 400 din artuq alim qatnashqan bu chong yighinda 200 din artuq mutexessis 60 muhakime meydanigha bölünüp, ottura yawro-asiyaning millet, tarix, siyaset, ékologiye, xelq'ara munasiwetler we bashqa köp mezmunlarni öz ichige alghan keng témilar boyiche ilmiy doklat berdi.
Bu yighinda yene mexsus Uyghur mesilisi heqqidimu muhakime élip bérilghan bolup, Uyghurlargha a'it on nechche parche maqale oqup ötülgen bolup, Uyghur témisi yighinning tertipide muhim orun alghan.

Ottura yawro-asiya ilmiy jem'iyitining bu qétimliq yighinida ikki neper Uyghur mutexessisi Uyghurlarning tarixi we medeniyiti heqqide maqale oqup ötkendin sirt yene Uyghur éligha keng tonulghan péshqedem alim imin tursun ependimu yashinip qalghanliqigha qarimastin, yiraq musapilerni bésip, yighinning 2-künige ülgürüp keldi hemde uninggha 16-öktebir küni indi'ana uniwérsitétining ottura yawro-asiya fakultéti mexsus ilmiy muhakime uyushturup berdi.
Imin tursun ependining doklati amérikiliq Uyghurshunas mutexessisler we Uyghurshunasliq penige yéngidin qedem qoyuwatqan aspirantlar shuningdek bashqa qiziqquchilarni özige jelp qildi. Chünki, uning 80 yashliq hayat musapisi jümlidin uning Uyghur élining 30-40-yillardiki siyasiy boran-chapqunlirini we meshhur Uyghur siyasiyonlirini öz közi bilen körgenlikidek shahidliq ewzelliki shu dewrni tetqiq qiliwatqan proféssorlarning alahide qiziqishini qozghighanliqi üchün doklatning témisi imin tursun ependining hayat pa'aliyetlirini asasiy nuqta qildi.
Indi'ana uniwérsitétining ottura yawro-asiya fakultétining proféssori, Uyghurshunas doktor gardnér bowingdon ependi échilish murasimida, imin tursunning hayat-pa'aliyetlirige baha bérip, imin tursunning 40-yillardiki her qaysi Uyghur meshhur erbabliri bilen hem söhbette bolushi hemde uning shu dewr weqelirige angliq rewishte arilishishining emeliy tarixiy pakitliq rol oynaydighanliqini tekitlidi. (Ümidwar)