Kompartiye xitayda "inaq jem'iyet" quralamdu ?

• Muxbirimiz erkinning bu heqtiki toluq melumati
• Download story audio

Xitay kommunistik partiyisining charshenbe küni yépilghan 16 - nöwetlik 6 - omumi yighini xitayda "sotsiyalistik inaq jem'iyet" berpa qilish chaqirighini otturigha qoydi.

Xitay rehberliri bay – kembeghellik perqini azaytishqa wede bergen

Birleshme axbarat agéntliqining eskertishiche, xitay rehberliri yighinning yépilish murasimida künséri chongiyiwatqan we isyanlargha sewebchi boluwatqan xitay jem'iyitidiki bay -kembegheller perqini azaytish üchün tedbir qollinidighanliqini wede qilghan. Xitay metbu'atlirining eskertishiche, yighin barawer we adil jem'iyet tereqqiyati, iqtisadi- ijtima'iy tereqqiyatning izchilliqini saqlash toghrisidiki muhim istratégiyilik mesililerge da'ir bir qatar qararlarni chiqardi.

Shinxu'a axbarat agéntliqi, xitay kompartiyisi bash sékritari xu jintawning "muhim" söz qilghanliqini we 6 - omumi yighinning axbarati maqullan'ghanliqini bildürdi. Xu jintaw yighinning yépilish murasimida sözligen nutiqida kompartiye wekillirige "sotsiyalistik inaq jem'iyet qurush eng aldinqi qatardiki muhim nishanimiz " deydu. Xitay rehberliri xiyanetchilik, ishsizliq we yersiz qalghan dihqanlarning özlüksiz küchiyiwatqan naraziliqigha duch kelmekte. Xu jintaw we uning kolléktip rehberlik qatlimi buningdin 4 yil burun hakimiyet üstige chiqqanda yéza - kent qurulushigha meblegh sélish, namrat rayonlarning sehiye we ma'arip ishlirini yaxshilash heqqide wede bergen. Yighinning charshenbe künki axbaratida "sotsiyalistik inaq jem'iyet berpa qilishta tosalghu we mesililer yenila mewjüt " déyilgen.

Sidiq haji rozi: xitayning hazirqi shara'itta "inaq jem'iyet" berpa qilish mumkinchiliki mewjüt emes

Shinxu'a axbarat agéntliqi, bu qétimqi omumi yighinning ijtima'iy tereqqiyat mesilisini siyasiy we iqtisadiy mesililerdin muhim orun'gha qoyghan tunji yighin bolup qalghanliqini ilgiri sürdi. Lékin amérikidiki siyasi obzorchi sidiqhaji rozi, xitayning hazirqi shert - shara'itida "inaq jem'iyet" berpa qilish mumkinchiliki mewjüt emes, dep körsetti. ‏

Bu qétimqi yighin 2020 - yilghiche qanunni mukemelleshtürüsh, qanun bilen dölet bashqurush, xelq hoquqini kapaletke ige qilish, sheher - yéza we rayonlar arisidiki tereqqiyat perqini azaytish, muhitni özgertishni otturigha qoydi. Lékin xitay kompartiyisining mewjüt rehberlik guruhi démokratik islahatni chongqurlashturush teleplirini ret qilmaqta. Xu jintaw bu qétimqi yighinda partiye ichide démokratiyini kéngeytishni tekitligen bolsimu, lékin u démokratik islahatni chongqurlashturushni ret qildi.

Xitay kompartiyisi merkizi komitéti bu hepte ichide xu jintawning "inaq jem'iyet" neziriyisi we partiye ichi démokratiyini kéngeytish mesilisini muzakire qilidu. Partiye ichidiki tenqidchiler xu jintawning neziriyisi xitay duch kéliwatqan mesililerni bir terep qilish üchün yéterlik emes, dep qarimaqta.

Xitayda hökümet bilen puqralar, partiye bilen puqralar munasiwiti inaq emes

Shenshi ölkilik partkomning yuqiri derijilik kadiri, xu yawbangning sabiq katipi lin mu, xongkongda chiqidighan "chuqan" jurnilida maqale élan qilip, xu jintaw we wén jyabawlarni siyasi jehettiki inaqliqni tekitleshtin özini qachurdi, dep tenqidligen. U, "shübhisizki siyasi inaqliq muqerrer halda démokratiye, qanun - tüzüm we kishilik hoquq mesilisige chétilidu. Siyasi inaqliq bolmisa, kishiler bilen kishiler arisidiki inaqliqni hel qilghili bolmaydu. Chünki inaq jem'iyettiki tüp mesile ademler bilen ademler munasiwitidur. Deydu. Uning eskertishiche, xitayda "kishiler bilen kishiler munasiwiti, bolupmu hökümet bilen puqralar, partiye bilen puqralar munasiwiti inaq emes". Obzorchi sidiqhaji rozining qarishiche, xitay kompartiyisi bir partiye diktaturluqidin waz kechmigiche, xitayda "inaq jem'iyet" berpa qilish dégenlik quruq tessewurdin ibaret.

Bu qétimqi yighin shangxey sheherlik partkom sékritari chén lyangyüy xiyanetchilikke chétilip qélip wezipisidin élip tashlan'ghan mezgilde ötküzüldi. Yighin bashlinish aldida közetküchiler, yighinda chén lyangyüyning xiyanetlik dilosi bir terep qilinidighanliqini perez qilghan bolsimu, lékin yighin axbaratida chén lyangyüy dilosi we xiyanetchilikke qarshi turush tilgha élinmidi. (Erkin)