Хәлқараниң бушниң қайта президентликкә сайлинишиға болған инкаси


2004-11-04
Share

Америка президенти җорҗ в буш чаршәнбә күни, омумий сайлам авазиниң 51٪ гә вә 274 сайлиғучилар белитигә еришип, риқабәтчиси демократчилар партийисиниң президент намзати җон кәррийни йәңди. Бу мунасивәт билән дунядики нурғун дөләт рәһбәрлири америка президенти җорҗ бушниң йәнә бир қарар президентликкә тәйинләнгәнликини арқа-арқидин тәбрикләшти.

Америка бирләшмә ахбарат агентлиқиниң көрситишичә, бушни тәбриклигәнләрниң арисида, америкиниң стратегийилик һәмкарлиқ шерики болған хитайниң рәиси ху җиңтавму бар болуп, у хитайниң америка билән нөвәттики " стратегийилик һәмкарлиқ" мунасивити әмәс, бәлки қурулуш характерлик һәмкарлиқ мунасивәт орнитишқа тәқәзза икәнликини билдүрди.

Урушни қоллиғанларниң инкаси

Америка билән террорчилиққа қарши урушта баштин-ахир биллә һәмкарлашқан әнглийиниң баш министири тони блер бушни тәбрикләш билән биргә, униң нөвәттики "бөлүнгән вә муқим болмиған дуня" һалқилиқ пәйттә турған мәзгилдә қайта президентликкә сайланғанлиқини билдүрди. Шундақла бушни йеқиндин қоллап кәлгән австралийә баш министири җон хаворд, бушниң қайта президентликкә сайлинишиниң террорчилиққа қарши урушниң бир қетимлиқ ғәлибиси һесаблинидиғанлиқини тәкитлиди.

Түркийә баш министири рәҗәп тайип әрдоғанму бушни тәбрикләш билән биргә, бу сайламниң инсанпәрвәрлик вә тинчлиқ ата қилишини үмид қилидиғанлиқини билдүрди.

Урушқа қарши турғанларниң инкаси

Ирақ урушиға қарши туруп кәлгән германийә, франсийә вә русийә дөләт рәһбәрлириму бушниң сайламда ғәлибә қилғанлиқини тәбриклиди. Русийә президенти виладимир путин сөзидә, " бушниң қайта сайлиниши, америка хәлқиниң террористлардин қорқуп қалмиғанлиқини намайән қилиду" деди.

Әрәп дунясидики инкаслар

Әрәп дөләтлиридә болса, бушниң қайта сайлинишиға қарита асасий җәһәттин үмидсизлик кәйпияти шәкилләнди. Чүнки, әрәп дөләтлири бушниң ираққа һуҗум қилишиға баштин-ахир нарази болуп кәлгән иди.

Америкиниң иттипақдаш дөлити болған мисирниң президенти һөсни мубарәк бушни тәбриклигәндә, оттура шәрқниң нөвәттә тинчлиқ тәрәққиятиға муһтаҗ икәнликини, һәмдә өзиниң бушниң оттура шәрқ мәсилисини алдинқи орунға қоюп, бу районниң тинчлиқини илгири сүрүштә көп тиришчанлиқ көрситидиғанлиқиға ишинидиғанлиқини билдүрди. Ирақта болса бушниң қайта сайлинишиға қарита охшимиған көз қарашлар шәкилләнди. Бәзилири бушниң қайта сайлинишиниң нөвәттики вәзийәткә пайдилиқ икәнликини билдүрсә, йәнә бәзилири униң қайта сайлинишиға нарази болуп, бушниң ираққа бала-қазадин башқа һечнимә елип кәлмәйдиғанлиқини илгири сүрди.

Ғәб мәтбуатлиридики инкаслар

Бу арида дунядики барлиқ мәтбуатлардиму буһәқтә түрлүк қарашлар оттуриға қоюлди. Әнглийәдә чиқидиған " мустәқиллиқ гезити" ниң баш бетигә "йәнә 4 йил" дегән хәт билән қолида лозонка көтүргән бушниң қоллиғучилириниң рәсими қоюлди. Лозонкида, " ахири бир хиристиан рәзиллик билән көрәш қилидиған болди. Буш сизгә рәһмәт" дегән сөзләр йезилған. Әмма әнглийидә чиқидиған " күндилик әйнәк гезити" дәп аталған бир лебирал гезит болса баш бетигә, " қандақ қилип америкидики 59 милйон киши шунчә дөт" дегән сөзни басқан.

Франсийә " дуня күндилик гезити" явропалиқларниң, бушниң уруш мәзгилидики америка сайлимида террочилиққа қарши хәлқара урушни мәркизий идийә қилғанлиқини қәти чүшәнмәйдиғанлиқини язған.

Америкидиму бушниң қайта сайлинишиға қарита инкаслар һәр хил болуп, җон кәррийниң қоллиғучилири буниңдин толиму әпсусланған иди. Әмма алдинқи күни җон кәрий телевизорда нутуқ сөзлигән чеғида, өзиниң америка хәлқиғә хизмәт қилиш ирадисиниң буниң билән тохтап қалмайдиғанлиқини, гәрчә сайламда америка хәлқи икки тәрәпкә айрилсиму, әмма сайлам күниниң әтиси һәр бир кишиниң йәнила бир америкилиқ сүпитидә ойғинидиғанлиқини тәкитлиди. Бушму телевизор нутуқида, өзиниң әмәлий һәрикити билән риқабәтчиси кәррийни қоллиған америка хәлқниң көңлини утидиғанлиқиға вәдә қилди.

Хитай мәтбуатлардики инкаслар

Хитай мәтбуатлиридиму бушниң қайта сайлинишиға қарита түрлүк инкаслар елан қилинди. "Хитай күндилик гезити" бушниң, " бөлүнгән вә тәшвишкә толған вәзийәт" тә қайта сайланғанлиқини билдүргән болса, " хәлқ гезити" , буш гәрчә сайламда утуп чиқсиму, лекин униң алдида америкилиқларни иттипақлаштуруш, ғәлибә қилишқа вәдә бәргән террорчилиққа қарши урушта утуп чиқиш қатарлиқ еғир вәзиписиниң барлиқини, әмма униң бу вәзипини орундаш-орундиялмаслиқини йәнила әмәлийәт испатлайдиғанлиқини билдүрди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт