Xelq'araning bushning qayta prézidéntlikke saylinishigha bolghan inkasi


2004.11.04
Share on WhatsApp
Share on WhatsApp

Amérika prézidénti jorj w bush charshenbe küni, omumiy saylam awazining 51٪ ge we 274 saylighuchilar bélitige ériship, riqabetchisi démokratchilar partiyisining prézidént namzati jon kerriyni yengdi. Bu munasiwet bilen dunyadiki nurghun dölet rehberliri amérika prézidénti jorj bushning yene bir qarar prézidéntlikke teyinlen'genlikini arqa-arqidin tebrikleshti.

Amérika birleshme axbarat agéntliqining körsitishiche, bushni tebrikligenlerning arisida, amérikining stratégiyilik hemkarliq shériki bolghan xitayning re'isi xu jingtawmu bar bolup, u xitayning amérika bilen nöwettiki " stratégiyilik hemkarliq" munasiwiti emes, belki qurulush xaraktérlik hemkarliq munasiwet ornitishqa teqezza ikenlikini bildürdi.

Urushni qollighanlarning inkasi

Amérika bilen térrorchiliqqa qarshi urushta bashtin-axir bille hemkarlashqan en'gliyining bash ministiri toni blér bushni tebriklesh bilen birge, uning nöwettiki "bölün'gen we muqim bolmighan dunya" halqiliq peytte turghan mezgilde qayta prézidéntlikke saylan'ghanliqini bildürdi. Shundaqla bushni yéqindin qollap kelgen awstraliye bash ministiri jon xaword, bushning qayta prézidéntlikke saylinishining térrorchiliqqa qarshi urushning bir qétimliq ghelibisi hésablinidighanliqini tekitlidi.

Türkiye bash ministiri rejep tayip erdoghanmu bushni tebriklesh bilen birge, bu saylamning insanperwerlik we tinchliq ata qilishini ümid qilidighanliqini bildürdi.

Urushqa qarshi turghanlarning inkasi

Iraq urushigha qarshi turup kelgen gérmaniye, fransiye we rusiye dölet rehberlirimu bushning saylamda ghelibe qilghanliqini tebriklidi. Rusiye prézidénti wiladimir putin sözide, " bushning qayta saylinishi, amérika xelqining térroristlardin qorqup qalmighanliqini namayen qilidu" dédi.

Erep dunyasidiki inkaslar

Erep döletliride bolsa, bushning qayta saylinishigha qarita asasiy jehettin ümidsizlik keypiyati shekillendi. Chünki, erep döletliri bushning iraqqa hujum qilishigha bashtin-axir narazi bolup kelgen idi.

Amérikining ittipaqdash döliti bolghan misirning prézidénti hösni mubarek bushni tebrikligende, ottura sherqning nöwette tinchliq tereqqiyatigha muhtaj ikenlikini, hemde özining bushning ottura sherq mesilisini aldinqi orun'gha qoyup, bu rayonning tinchliqini ilgiri sürüshte köp tirishchanliq körsitidighanliqigha ishinidighanliqini bildürdi. Iraqta bolsa bushning qayta saylinishigha qarita oxshimighan köz qarashlar shekillendi. Beziliri bushning qayta saylinishining nöwettiki weziyetke paydiliq ikenlikini bildürse, yene beziliri uning qayta saylinishigha narazi bolup, bushning iraqqa bala-qazadin bashqa héchnime élip kelmeydighanliqini ilgiri sürdi.

Gheb metbu'atliridiki inkaslar

Bu arida dunyadiki barliq metbu'atlardimu buheqte türlük qarashlar otturigha qoyuldi. En'gliyede chiqidighan " musteqilliq géziti" ning bash bétige "yene 4 yil" dégen xet bilen qolida lozonka kötürgen bushning qollighuchilirining resimi qoyuldi. Lozonkida, " axiri bir xiristi'an rezillik bilen köresh qilidighan boldi. Bush sizge rehmet" dégen sözler yézilghan. Emma en'gliyide chiqidighan " kündilik eynek géziti" dep atalghan bir lébiral gézit bolsa bash bétige, " qandaq qilip amérikidiki 59 milyon kishi shunche döt" dégen sözni basqan.

Fransiye " dunya kündilik géziti" yawropaliqlarning, bushning urush mezgilidiki amérika saylimida térrochiliqqa qarshi xelq'ara urushni merkiziy idiye qilghanliqini qet'i chüshenmeydighanliqini yazghan.

Amérikidimu bushning qayta saylinishigha qarita inkaslar her xil bolup, jon kerriyning qollighuchiliri buningdin tolimu epsuslan'ghan idi. Emma aldinqi küni jon keriy téléwizorda nutuq sözligen chéghida, özining amérika xelqighe xizmet qilish iradisining buning bilen toxtap qalmaydighanliqini, gerche saylamda amérika xelqi ikki terepke ayrilsimu, emma saylam künining etisi her bir kishining yenila bir amérikiliq süpitide oyghinidighanliqini tekitlidi. Bushmu téléwizor nutuqida, özining emeliy herikiti bilen riqabetchisi kerriyni qollighan amérika xelqning könglini utidighanliqigha wede qildi.

Xitay metbu'atlardiki inkaslar

Xitay metbu'atliridimu bushning qayta saylinishigha qarita türlük inkaslar élan qilindi. "Xitay kündilik géziti" bushning, " bölün'gen we teshwishke tolghan weziyet" te qayta saylan'ghanliqini bildürgen bolsa, " xelq géziti" , bush gerche saylamda utup chiqsimu, lékin uning aldida amérikiliqlarni ittipaqlashturush, ghelibe qilishqa wede bergen térrorchiliqqa qarshi urushta utup chiqish qatarliq éghir wezipisining barliqini, emma uning bu wezipini orundash-orundiyalmasliqini yenila emeliyet ispatlaydighanliqini bildürdi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet