Béyjing hökümiti 3 chong solchilar tor bétini taqiwetti

• Muxbirimiz méhribanning bu heqtiki melumati
• Download story audio

Taqiwirtilgen torbetlerning biri - "kommunist" toridin körünüsh.

Yéqinda xitay hökümiti béyjingda memliketlik xelq qurultiyi we siyasiy kéngesh yighini achmaqchi. Xitay hökümiti mezkur yighinlarni échishning aldida, xitaydiki "ishchilar torbéti ", "ishchi déhqan we esker bbs tor béti" we "kommunistlar tor béti" qatarliq 3 chong solchilar tor bétini taqiwetken.

Teshwiqat nishani

Xongkongda nesh r qilinidighan mingbaw gézitide bérilgen xewerdin melum bolushiche, béyjing hökümitining mezkur tor betlerni taqiwétishi, bu tor betlerde élan qilin'ghan mezmunlarning köp sandikisi siyasiy xaraktérlik bolghanliqtin iken hemde meblighi belgilimidiki 10 milyon somdin töwen bolghachqa, qanunsiz échilghan tor betler dep qaralghan.

Xongkongda neshr qilinidighan "islahat géziti" ning bash tehriri chey yangwéy xanim xitay hökümiti teripidin taqiwétilgen bu 3 chong tor béti heqqide toxtilip, "taqiwétilgen bu tor betler gerche solchi bolup markisizm idiyisini teshwiq qilsimu, kommunist xitayning hazirqi siyasitigimu intayin qarshi. Ular xitay hökümitige dawamliq tenqidiy pikir bérip, kompartiye ichidiki chiriklik qatarliq mesililerni pash qilip, hökümetning keng ishchi - déhqanlarning menpe'etini bir chetke qayrip qoyup, ular bilen kari bolmaywatqanliqigha qattiq naraziliq bildürüp kelgen " dep körsetti.

Mingbaw gézitide bérilgen xewerdin melum bolushiche, yuqirida dep ötken bu 3 chong solchil tor béti dawamliq ishchilarning menpe'etini asasiy orun'gha qoyup, ishtin boshitiwitilgen ishchilar heqqide köplep xewer we melumatlarni béridiken. Bolupmu yéqindin buyan, mezkur tor betler ishchilarning öz hoquqini qoghdash herikiti heqqide nurghun maqalilerni élan qilip, xitay hökümiti yürgüzüwatqan islahat élip bérish siyasitini qattiq tenqid qilghanliqtin, merkiziy hökümet teripidin men'iy qilin'ghan.

Her qil qarashlar

Amérika wiskonsin uniwérsitétining proféssori wang jenwéy "néme üchün bu tor betler deslepte men'iy qilinmay, emdi cheklinidu" dégen mesile heqqide toxtilip, "bundaq bolushtiki seweb, xitay hökümiti hazir peqet ongchilar teripidinla emes, solchilar teripidinmu tenqidke uchrimaqta. Hazir meyli démokratiyini teshebbus qilidighan ongchilar bolsun yaki marksizmni teshwiq qilidighan solchilar bolsun, hemmisi dégidek xitay hökümitining hazirqi siyasitige qarshi chiqmaqta. Ular otturigha qoyuwatqan mesililer asasiy jehettin oxshash bolup, köprek jem'iyettiki naheqchilik, parixorluq we chiriklik qatarliq mesililerni pash qilidu. Shunga hazir xitay hökümiti ikkila terepning jeng élan qilishigha duch kelmekte " dep analiz qildi.

Xongkongda neshr qilinidighan islahat jurnilining bash tehriri chey yungméy xanim "xitay hökümiti achmaqchi boluwatqan memliketlik xelq qurultiyi we siyasiy kéngesh yighini eslide xelqning menpe'eti bilen zich munasiwetlik bolghan mesililerni hel qilish yighini bolushi kérek idi. Chünki mezkur yighin'gha qatnashqan qurultay wekilliri xelqning iradisige wekillik qilip, xelqning dert ‏- elemlirini anglighuchilar bolushi kérek. Lékin ademni heyran qaldurudini, del mushundaq bir peytte yeni xelqning arzu -arman we tenqidiy pikirlirini anglash pursiti yétip kelgen bundaq bir peytte, xitay hökümitining bu tor betlerni taqiwétishi bekla bimene bir ish. Bu xil ehwal astida yighin échishning özi shekilwazliq qilghanliq. Chünki ular xelqning qurultay wekillirige bérip erz sunup, öz abruyigha tesir yetküzidighan ishlarning yüz bérip qilishidin bekmu qorqidu " dep xitay hökümitini qattiq tenqidlidi.

Ming baw gézitide bérilgen xewerdin melum bolushiche, gerche xitay hökümiti yuqirida körsitilgen 3 chong solchil tor bétini taqiwetken bolsimu, mezkur torbetlerning mes'uli " bizde hazir ya pul, ya hoquq bolmighachqa, taqash buyruqigha boysunmay ilaj bolmidi. Lékin purset tépip, yenila dawamliq halda ishchi - déhqanlarning awazini anglitimiz " dep bildürgen. (Méhriban)