Хәлқара кәчүрүм тәшкилати яху вә гугул қатарлиқ ширкәтләрни қаттиқ әйиблиди


2006-07-21
Share

Хәлқара кәчүрүм тәшкилати пәйшәнбә күни мәхсус доклат елан қилип,яху вә гугул қатарлиқ интернет ширкәтлирини қаттиқ әйиблиди. Доклатта " яху,гугул вә вей руән қатарлиқ бу үч хәлқара ширкәтләр өз вәдисидә турмай,хитай һөкүмитигә ярдәм қилип,интернет тор бәтлирини назарәт қилиш вә контрол қилишни тохтатмай кәлмәктә. Мәзкур ширкәтләрниң бундақ қилиши уларниң хәлқара кишилик һоқуқ низамнамисиға хилаплиқ қиливатқанлиқини көрситип бериду " дәп йезилған.

Мәзкур доклатта йәнә,"яху,гугул вә вей руән қатарлиқ бу үч ширкәт охшимиған усуллар арқилиқ хитай һөкүмитиниң интернет арқилиқ кишиләрниң әркин пикир баян қилишини чәклишигә ярдәм берип кәлмәктә. Хәлқара кишилик һоқуқ низамнамисиниң 19 ‏- маддисида 'һәммә адәмниң өз алдиға пикир баян қилиш вә әркин сөзләш һоқуқи бар ' дәп көрситилгән. яху,гугул вә вей руән қатарлиқ бу үч ширкәтниң бу хил қилмишлири мәзкур бәлгилимини пүтүнләй көзгә илмиғанлиқтур" дәп тәкитләнгән.

Ширкәтләрниң учур әркинлики һәққидики принсипта чиң турушини үмид қилимиз

Зияритимизни қобул қилған хәлқара кәчүрүм тәшкилатиниң баянатчиси роберт ханим бу һәқтә тохтилип,мундақ деди:

"Биз һазир бу ширкәтләрниң хитай һөкүмити билән бирлишип,интернет тор бетини бу хил һаләттә контрол қилишидин бәкму әндишә қиливатимиз. Шуңа биз бүгүн кишиләрниң интернет тор бәтлиридә әркин пикир баян қилишини қоғдаш үчүн,хәлқаралиқ һәрикәт елип бериш қарарини чиқардуқ. Биз дуняниң һәр қайси җайлиридики кишиләрниң тор бәтләрдә имза қоюш арқилиқ,учур әркинлики һәққидики принсипта чиң турушини үмид қилимиз".

Йәнила сиясиюнларниң зор дәриҗидә күч чиқиришиға бағлиқ

Америкидики хитай интернет тор бети мутәхәссиси ли хуңкуән әпәнди яху,гугул қатарлиқ ширкәтләрниң хитай һөкүмитиниң интернет тор бәтлирини бундақ контрол қилишиға йол қойиватқанлиқини анализ қилип,мундақ деди:

"Әгәр бирләшкән дөләтләр тәшкилатиниң кишилик һоқуқ баянати бойичә сода қилишқа тоғра кәлсә,бу ширкәтләрниң хитайда сода қилалиши мумкин әмәс. Һазир хитайниң интернет тор бети һәққидә бекиткән қанун бәлгилимилири барғансери күчийип кәтти. Бу һәқтә америка дөләт мәҗлисиму мәхсус доклат елан қилған. Хитай һөкүмитиниң интернетни контрол қиливатқанлиқи һәққидә берилгән һәр хил тәнқиди пикирләр һәқиқәтән йоллуқ. Лекин һазир америкиниң бу ширкәтлири пүтүнләй амалсиз һаләттә қалған. Уларниң дейишичә,шәхси ширкәтләрниң хитайдәк бундақ чоң бир дөләткә тақабил туралиши бәкму тәскә тохтайдикән. Шуңа бу мәсилиниң бир тәрәп болуши йәнила сиясиюнларниң зор дәриҗидә күч чиқиришиға бағлиқ".

Хитайдики интернет тор бетиниң қаттиқ контрол қилиниватқанлиқи һәққидә,хәлқара кишилик һоқуқ тәшкилати,хәлқара кәчүрүм тәшкилати вә шундақла хәлқара мухбирларни қоғдаш тәшкилати қатарлиқлар көп қетим доклат елан қилип,хитай һөкүмитини қаттиқ әйибләп кәлмәктә. Лекин хитай һөкүмити бу һәқтә өз хаталиқини тонуш бир яқта турсун,әксичә түрлүк баһаниләрни көрситип,өзигә йол ечишқа урунмақта.

Мәсилән,хитай ташқи ишлар министерлиқиниң баянатчиси чин гаң хитай һөкүмитиниң интернет тор бәтлирини ишлитиштә зор чәклимиләрни қоюватқанлиқиға нурғун баһанә- сәвәбләрни көрситип," хитайдики интернет тор бәтлири наһайити нормал вә сағлам һалда тәрәққий қиливатиду " дәп тәкитлигән.

Америкида турушлуқ уйғур зиялийси сидиқ һаҗи әпәнди хитай һөкүмитиниң интернет тор бәтлирини чәкләш үчүн көрситиватқан баһанилири вә гугул қатарлиқ чәтәл ширкәтлириниң амалсиз һаләттә қалғанлиқи һәққидә тохтилип, қарашлирини оттуриға қойди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт