Xitay hökümiti intérnétke bolghan kontrolluqni téximu bek kücheytishke bashlidi


2007-01-25
Share

Xitay kompartiye sékrétari xu jintaw yéqinda béyjingda échilghan dunya intérnét tereqqiyatigha, xitaydiki intérnét bashqurush xizmitini kücheytish heqqide nurghun yol -yoruqlarni otturigha qoydi. U sözide "intérnét tor betlirini tereqqi qilishta, bashqurush xizmitini kücheytish kérek, shundaqla 'tazilash -bashqurush' tedbirini qollinish kérek" dep tekitlidi. Analizchilar we kishilik hoquq xadimliri xu jintawning bu dégenlirini analiz qilip "qarighanda, xitay kompartiyisi meqsetlik halda intérnétke bolghan kontrolluqni kücheytishke bashlighan. Gerche hazirche ularning kontrol qilish nishani téxi pütünley éniq bolmighan bolsimu, ularning bundin kéyin intérnétke bolghan kontrolluqi ilgiriki herqandaq waqittin qattiq bolushi mumkin" dep körsetmekte.

Xitayning meqsiti xelqning erkinlikini kontrol qilish

Xitayda hazir intérnét ishletküchiler sani 140 milyon'gha yetken. Roytérs agéntliqining charshenbe küni bergen xewiride, xu jintawning intérnét heqqide qilghan sözige baha bérip, "xitay hökümitining bir -din bir meqsiti puqralarning intérnét tor bétini ishlitishtiki erkinlikini kontrol qilish" dep körsitilgen.

Amérikidiki xitay ishliri tetqiqatchisi gu yü'en xanim xitay hökümitining intérnétke bolghan kontrolluqining ezeldin nahayiti ching bolup kelgenlikini, xu jintaw bu qétimqi sözidin kéyin, puqralarning bu jehettiki erkinliki téximu zor tosalghulargha duch kélidighanliqini tekitlep "ular belkim bundin kéyin bir qisim muhim tor betlerni téximu alahide usullar arqiliq kontrol qilishi mumkin, ' tazilash – bashqurush’ siyasitini yolgha qoyushta, aldi bilen chet'el tor betlirini asasi nishan qilishi mumkin" dep bildürdi.

Xu jintawning intérnet tor betlirini kontrol qilish heqqide qilghan sözi bundin ilgiri xitay yuquri derijilik emeldarlarning bu heqte qilghan sözliridin köp perqlenmeydu. Gerche u "kontrol qilishtiki meqset, tor betlirini tazilash, jem'iyet muqimliqini saqlash we intérnét bashqurush tüzümini retke sélish" dep körsetken bolsimu, analizchilarning melum qilishiche, hazirgha qeder, xitayda, köp sandiki kishiler tekshürülmigen chet'el tor betlirini körüsh imkaniyitige érishelmey kelgen. Bolupmu ularning xitay hökümitige tenqidi pikir bergen torbetlerni körelishi téximu mumkin bolmighan.

Xitay hökümitining tili bilen dili bir emes

Xongkong shafir neshiryatining mes'uli yaw ependi "xitay hökümiti tor betlerni retlesh we tazilashni bahana qilip, kishilerning sözlesh erkinlikini téximu bek boghmaqchi boliwatidu. Xitay hökümiti ezeldin aghzida bir xil, emeliyette yene bir xil qilmishlarni qilip kelgen " dep bildürdi.

Bir qisim analizchilar "intérnét hazirqi zamandiki eng chong ijadiyet bolup, u dunya xelqini erkin halda cheksiz uchur bilen teminlimekte. Uning gézit, zhornal, radi'o we téléwizorlarda bériliwatqan xewerler bilen bolghan bir -din bir perqi, intérnétning bashqa teshwiqat wasitilirigha oxshash "bash tehrir" i yoq. Lékin xu jintawning dégen geplirige qarighanda, xitay hökümiti yenila intérnét tor betlirining bash tehriri bolup, atalmish retke sélish we tazilash dégendek bahaniler bilen öz puqralirini sözlesh erkinlikidin tosup, ularning tashqi dunyadin heqiqiy xewer élp, emeliy ehwalni igilesh hoqoqini yoq qilmaqta " dep eyiblimekte.

Bu heqte xitay ishliri tetqiqatchisi gu yü'en xanim "xitay hökümiti hazir türlük ilghar téxnikilarni qollinish arqiliq, intérnét tor betlirini qattiq kontrol qilip kelmekte. Lékin shundaqtimu uninggha taqabil turalaydighan amallarni yoq dégili bolmaydu. Kishiler yenila bir amallarni qilip, özi arzu qilghan chet'el tor betliridin paydilinalaydu. Xitay hökümiti bu qétim zadi qaysi jehette tazilash élip baridighanliqini éniq démigen bolsimu, puqralarning siyasiy jehettiki sözlesh erkinlikni kontrol qilmaqchi boluwatqanliqi nahayiti éniq " dep körsetti. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet