Intérnét erkinliki - xelq'ara kishilik hoquq teshkilatliri bilen xitay hökümiti otturisidiki yéngi aldinqi sep


2007-05-04
Share

Xitayda 2006 ‏- yilining axirigha qeder intérnétke kiridighan adem sani yüz milyon'gha yetken idi. 'Merkizi agéntliqi'ning bayan qilishiche, yéqinda bundaq weziyetke qarita, xitay azadliq armiyisining yuqiri derijilik générali shung gu'angkey 'xelq'arada meslihet élish-uchur tarqitish erkinliki buyiche yéngi tertip tiklesh' dégne teshebbusni otturigha qoyghan.

'Asiya waqit géziti'de mulahize qilinishiche, eger buningdin kéyin, xitay hökümiti mushu teshebbus buyiche ish körse, inténét erkinliki mesilisi xelq'ara kishilik hoquq teshkilatliri bilen xitay hökümiti otturisida yéngi aldinqi sep bolup qélishi mumkin.

Xitayda intérnétke kiridighan adem sani yüz milyon'gha yetkendin kéyin, xu jintaw ....

Xitay hökümiti dunya buyiche ikki xelq'araliq intérnét alaqisi ehdinamisigha qatnashqan 60 döletning biri. Bu ikki xelq'araliq ehdiname pütün dunyada eqliy mülük hoquqi we neshr hoquqini qoghdaydighan ehdiname idi.

Xitayning 'xelq géziti' mu, xitayning 'dunya eqliy mülük hoquqi teshkilatning neshr hoquqini qoghdash ehdinamisi" bilen " dunya eqliy mülük hoquqi teshkilatining ün-sin mehsulatlirini qoyush we köchürüp köpeytish heqqidiki ehdiname' din ibaret ikki xelq'araliq ehdinamigha qatnishishi heqqidiki layihe eng aliy qanun tiklesh orgini teripidin alliqachan testiqlinip bolghanliqini 2006 ‏- yili 12 ‏-ayning 24 ‏- küni yene bir qétim xewer qilghan idi.

Xitayda 2006 ‏- yilining axirigha qeder intérnétke kiridighan adem sani yüz milyon'gha yetkenliki melum bolghandin kéyin, 'merkiz agénétliqi'ning bayan qilishiche, xu jintaw buyil 1 ‏- ayning 23 ‏- küni, kommunistik partiye merkizi komitétining yighinida, intérnétte tor betler alaqisini bashquridighan qurulushni chuqum yaxshi ishlesh, torlarni yaxshi bashqurush we torladin yaxshi paydilinish kérek' dep tekitligen idi.

Emdi yéqinda, xitay azadliq armiyisining yuqiri derijilik générali shung gu'angkey bu heqte 'xelq'arada meslihet élish-uchur tarqitish erkinliki buyiche yéngi tertip tiklesh' dégen teshebbusni otturigha qoyghan. 'Asiya waqit géziti'ning tehlil qilishiche bu, buningdin kéyin xitay azadliq armiyisimu xelqning intérnétke kirish mesilisige arilishidighanliqidin, intérnétte 'yéngi tertip tiklesh' arqiliq 'xéridarlar'gha qarshi 'bixeterlik herikiti' qollinidighanliqidin dérek béridu.

Xitay hökümiti belgiligen intérnét heqqi bek yuqiri

Dunya bankisining 'xitayda uchur alaqe yéngiliqi jem'iyetni özgertmekte' dégen doklatida xitayda hökümet teripidin élinidighan intérnét heqqi dölet puqralirining shexsiy kirimige sélishturghanda bek yuqiri ikenliki otturigha qoyulghan idi .

'Jenubiy xitay paytext géziti'de bayan qilinishiche, xitayda her ayliq intérnét heqqi 83 yu'en 50 sént. Bu, tereqqi qilghan döletlerde élinidighan heq nésbitige qarighanda 10 hesse yuqiri. Pütün sherqi asiya we tinch okyan rayoni buyiche éytqandimu bek yuqiri. Xitaydiki intérnét ehli hazir , hökümet alidighan intérnét heqqini töwenlitinishni jiddiy telep qilmaqta.

Xitay hökümiti intérnét arqiliq bolidighan tijaretnimu 'sezgür sahe' dep qarap manapol qilmaqta

Amérikining washin'gton shitatidiki amérika - xitay munasiwetliri jem'iyitining bashliqi josép ependining erkin asiya radi'osining ziyaritini qobul qilghanda bayan qilishiche, xitay hökümiti bultur 'manapol qilishqa qarshi turush qanuni' maqullighan idi. U asasen bu qanun arqiliq siyasiy we istratégiye jehettiki sezgür mesililerni bir terep qilishni közligen.

Emma xitay hökümiti intérnét we uchur -alaqisinimu sezgür mesile, dégen da'irige kirgüziwélip, intérnét arqiliq élip bérilidighan tijaretlernimu, bashtin -axir hökümet özi manapol qilip kelmekte. Bundaq tijarette xitay hökümiti bashqilarni haman 'baha' arqiliq kemsitidu.

Xitay hökümiti olimpik musabiqisidin burun oxshimighan köz qarash we awazlarni pütünley yoqatmaqchimu?

Xitayda kishilik hoquqni qoghdash pa'aliyetchilirining tor béti bolghan 'hoquq hémayichisi' dégen tor bétide 5 ‏- ayning 4 ‏- küni bayan qilinishiche, xitayda kishilik hoquqni qoghdash pa'aliyetchiliri hazir barghanséri éghir derijide nezerbent astigha élinishqa, tehditke, parakenchidilik sélishqa, töhmet bilen eyiblinshke we tutqun qilinishqa uchrimaqta.

Bu tor bétidiki bayanlarda éytilishiche yene, 'xitay hökümiti 2008 ‏- yilidiki olimpik musabiqisidin burun, xitayni dunyagha 'muqim we inaq jem'iyet' qilip körsitish üchün, dölet ichidiki oxshimighan köz qarash we oxshimighan awazlarni pütünley yoq qilishqa bel baghlighan ' .

Dunya kechürüm teshkilatimu, 5 ‏- ayning 1 ‏- küni xitayni 'olimpik tenheriket musabiqisidin burun kishilik hoquq weziyitini yaxshlash heqqide dunyagha bergen wedisini emelge ashurmidi' dep tenqid qilghan idi. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet