Хитай һөкүмити бу йилқи май байримида нурғунлиған тор бәтлирини тақивәтти


2007-05-10
Share

Бу йил 1 ‏- майдин башлап, та байрамлиқ дәм елиш ахирлашқичә, хитайдики нурғунлиған тор бәтләр тақиветилгән.

Тақиветилгән тор бәтләрниң бәзилири һәтта илмий тәтқиқатларға аит тор бәтләр икән. Анализчиларниң билдүрүшичә, бундақ болуши хитай дөләт рәиси ху җинтавниң йеқинда интернет тор бәтлири һәққидә қилған сөзи билән мунасивәтлик икән.

Ху җинтавниң сөзидин кейин тақиливатқан тор бәтләр

Хитай һөкүмити бу йилқи әмгәкчиләр байрими җәрянида " рәткә селиш " дегән баһанә билән, көп сандики тор бәтләрни тақивәткән. Буларниң арисида, бейҗиң университетиниң " йәннән" намлиқ даңлиқ илмий тәтқиқат тор бетиму тақивитилгән.

Радиомизниң игилишичә, " йәннән " намлиқ бу тор бәт бундин 5 йил илгири бир қисим кишилик һоқуқни қоғдашқа аит мәзмунларниң йезилғанлиқи түпәйлидин, һөкүмәт даирилири тәрипидин тақиветилгән, кейин мәзкур тор, башқа исим билән йәнә қайтилап ечилған. Лекин бу йил 1 ‏- май байрам мәзгилидә,мәзкур тор бәт һечқандақ уқтурушсиз, йәнә бир қетим тохтитилип қоюлған.

Зияритимизни қобул қилған мәзкур тор бәтниң мәсули гу чүнху һәқиқий сәвәбни дейиштин өзини қачурған һалда, " тор бәтниң тохтап қелиши мулазимәт әсваблиридин чатақ чиққанлиқтин болди. Қачан әслигә келиши ениқ әмәс, ишқилип алдираш ясаватимиз"дәп билдүрди.

Бейҗиң университетиниң мәзкур тор бетигә охшаш, бу қетимқи байрам мәзгилидә, хитайдики нурғун торбәтләр " ясаш, рәткә селиш" қатарлиқ баһаниләр билән арқа -арқидин тохтитиветилгән. Тохтитиветилгән тор бәтләр пәқәт сиясий характерлик тор бәтләрла болуп қалмастин, бир қисимлири һөкүмәткә аит муназирә мәйданлири вә турмушқа аит суал-җаваб тор бәтлири икән. Шуниң билән биллә, шаңхәйдики венгуаң ахбарат гуруһи тор бетиниң муназирә мәйдани, җуңго хәт-чәк техника муназирә мәйдани, ву җяңшин учур тор бети қатарлиқ 100 дин артуқ торбәтниң һәммиси дигидәк байрам җәрянида пүтүнләй тақалған.

Хитай, тор бәтләргә болған контроллуқни күчәйтмәктә

Радиомизниң зияритини қобул қилған ху бейдики кишилик һоқуқ хадими ду дав биң хитай һөкүмитиниң һәр қетим байрам пәслиниң йетип келиши билән, тор бәтләргә болған контроллуқини техиму бәк күчәйтидиғанлиқини һәмдә бу қетим өзи қуруп чиққан " һоқуқсизлар муназирә мәйдани"ниңму тақиветилгәнликини тәкитләп, мундақ деди:

" Мениң бу тор бетим бу қетимқи байрам мәзгилидә бәкму зор чәклимигә учриди, биз һәр хил амалларни қилип бақтуқ, лекин униңға кириш мумкинчилики пәқәт болмиди. Һазир болса, мәзкур тур бәтни мәнла ачалаймән, мәндин башқа тордашлар йәнила кирәлмәйватиду. Зади немә сәвәбтин икәнлики техи ениқ әмәс. Мениң пәризимчә, бундақ болуши интернет сақчилири билән мунасивәтлик. Чүнки байрам мәзгилидә, уларму чоқум дәп елиши керәк, бәлким нөвәтчилик қилидиған сақчилар сани йетишмигәнликтин техиму қаттиқ чарә қоллинип, тор бәтләрни бирақла тақивәткән гәп. Чүнки әгәр улар бундақ қилмайдикән, вақти кәлгәндә бирәр мәсилә чиқса, улар чоң балаға қилип, хизмитидин вә әмәлидин айрилип қелиши ениқ."

Олимпик йиғинидин бурун, тәнқидий пикирләрни пүтүнләй тосуш

Радиомизниң игилишичә, әслидә бу йил 4 ‏- айниң ахирлиридин башлапла, бир қисим тор бәтләр вақтинчә тохтитип қоюлуп, қачан қайта ечилиши мәлум қилинмиған. Анализчиларниң билдүрүшичә, йеқиндин буян, бир қисим тор бәтләрниң арқа ‏- арқидин тақиветилиши йеңи түрдики торбәт контрол қилиш һәрикитиниң елип бериливатқанлиқини билдүридикән.

Радиомизниң зияритини қобул қилған бейҗиңдики бир өктичи хитай, дөләт рәиси ху җинтавниң өткән айда бейҗиңда ечилған бир қетимлиқ сиясий кеңәш йиғинида, тор бәтләрни башқуруш һәққидә мәхсус сиясий буйруқ чүшүргәнликини тәкитләп, мундақ деди: "йеқинда, ху җинтав сиясий кеңәштә ечилған бир қетимлиқ йиғинда, мәмликәт ичидики тор бәтләрни контрол қилишта қандақ чара -тәдбирләрни қоллиниш мәсилиси һәққидә мәхсус сөз қилған. Демәк бу қетим бир қисим тор бәтләрниң арқа ‏- арқидин тақилип кетишини дәл мушу йиғинниң нәтиҗиси дәп қариғили болиду. Һазир мунасивәтлик орунларниң һәммиси дегидәк контрол даирисини кеңәйтмәктә. Чүнки һөкүмәт олимпик йиғини ечилиштин бурун, барлиқ тор бәтләрни өз контроллуқиға елишни мәқсәт қилған һәмдә ташқи дуняниң тәнқидий пикирлирини пүтүнләй тосушқа урунған."

Хитай даирилири 1 ‏- май байрам мәзгилидә кәйни ‏- кәйнидин тақивәткән тор бәтлириниң бир қисимлири та һазирғичә ечилмиған. Бәзи тор бәтләрниң муназирә мәйданлирида " мәзкур муназирә мәйданини техиму яхши башқуруш үчүн, яман ғәрәзлик нәрсиләрниң чаплинишиниң алдини елиш үчүн, 7 ‏- майдин башлап, йеңи түрдики тәкшүрүш тәдбирини қолланмақчи. Шуңа тордашларға вақтинчә қолайсизлиқ елип келидиған болдуқ" дегән мәзмунларда уқтуруш чиқирилған. (Меһрибан)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт