Xitay hökümiti "11- besh yilliq pilan" da Uyghur élini yenimu téz sür'ette échishni pilanlimaqta


2005.12.21

21- Dékabir Uyghur aptonom rayonluq hökümet tor bétidin ige bolushimizche, ürümchide üch kündin buyan dawamlashqan Uyghur aptonom rayonluq iqtisadi xizmet yighini 20 - dékabir yépilghan. Mezkur yighinda xitayning Uyghur éli iqtisadi tereqqiyatida élip bériwatqan 10 - besh yilliq pilanining netijiliri yekünlinip shuning bilen birge yene 11 - besh yilliq pilan xizmetliri otturigha qoyulghan.

Xitay hökümet da'irilirining maxtinishliri

10- Besh yilliq pilan mezgilide xitay hökümiti " tarixiy ewzel shara'ittin paydilinip Uyghur élining bayliqlirini échishni kücheytish" dégen sho'ar astida siyaset yürgüzgen idi.

Yighinda aptonum rayon partkom sékrétari wang léchu'en, 10 - besh yilliq pilanning nahayiti muweppeqiyetlik bolghanliqini, Uyghur élining ishlepchiqirish, bazar igiliki, déhqanchiliq, tashqi péréwot, xelqning kishi béshigha toghra kélidighan kirimi qatarliq her jehettiki iqtisadida omumyüzlük yuqiri qimmet yaritilghanliqi, tereqqiyatlarning zor bolghanliqi qatarliqlarni yekünlep, Uyghur élide nuqtiliq namrat jaylardiki déhqanlarning kiriminingmu bu yil 1500 somdin ashqanliqini körsetken.

Mezkur yighinda yene aptonom rayon re'isi isma'il tiliwaldi, 10-besh yilliq pilan aptonom rayonimizning 50 yildin buyanqi siyasiy weziyiti eng ewzel shara'itta élip bérildi, shunga eng zor netijiler barliqqa keldi,dédi hemde bundin kéyinki iqtisadi xizmet pilanliri heqqide toxtilip, nöwettiki iqtisadi tereqqiyat sür'itining uzun muddetlikini kapaletlendürüp 11 - besh yilliq pilan xizmitide yaxshi bashlinish hasil qilimiz, shara'it ewzellikimizdin paydilinip échish bilen meblegh yétishmeslik otturisidiki ziddiyetni hel qilish üchün idiyini azat qilip, meblegh sélish da'irisini kéngeytip, meblegh salghuchilargha yol échip, bazarni qoyup bérimiz " dep xitay merkizi hökümitining 11 - besh yilliq pilan xizmetliri heqqidiki yolyoruqini yetküzgen.

Déhqanlarning zarliri

Xitay hökümiti, Uyghur élining iqtisadi tereqqiyatliri heqqide, meyli özining teshwiqatida yaki axbaratlar organlirigha bergen bayanatlirida bolsun oxshash qélipta " Uyghur éli uchqandek tereqqiyatlargha érishti, xelqning iqtisadi turmushida asman‏- zimin perqler barliqqa keldi " dégendek bayanlarni bérip kelmekte.

Gerche Uyghur élining bayliqliri köplep échilip, ishlepchiqirish qimmiti künsayin éship, Uyghur éli iqtisadi tereqqiyatining sanliq melumatlirida heqiqeten yuqiri sanliq melumatlar körün'gen bolsimu biraq yerlik xelqtin igilishimizge qarighanda, atalmish bu tereqqiyatlar yerlik Uyghur xelqige héchqanche menpe'et élip kélelmigen.

Isma'il tiliwaldi 11 - besh yilliq pilan xizmiti heqqide toxtalghanda yene Uyghur élining bayliqlirini dawamliq échishni kücheytishni asas qilidighanliqini körsitip " yene dawamliq halda gherbning bayliqini sherqte pishshiqlap ishlesh, gherbning gazini sherqqe yötkesh" ke oxshash siyasitimizni dawamlashturimiz" dep söz qilghan. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.