Iraq tekshürüsh guruppisining xizmiti amérika xelqi kütken netijini bermidi

Amérikining sabiq tashqi ishlar ministiri jémz béker we sabiq dölet mejlisi ezasi li hamiltonning riyasetchilikidiki iraq tekshürüsh guruppisi teripidin charshenbe küni élan qilin'ghan doklatta , iraq mesilisini bir terep qilish üchün 79 türlük teklip otturigha qoyulghan. 96 Betlik doklatta ottura sherq mesilisimu alahide tilgha ilin'ghan bolup, suriye bilen muresse qilish tekliplirini dawamliq ret qilghanliqi üchün isra'iliye hökümiti qattiq tenqid qilin'ghan. Mushu tenqid sewebidin iraq tekshürüsh guruppisining bu doklati hem amérikining sabiq hökümet xadimliri hemde bush hökümet xadimlirining birdek tenqidige uchrimaqta. Ular doklatta ottura sherq mesilisini hel qilish toghrisida otturigha qoyulghan diplomatiye tekliplirini ré'alliqqa toghra kelmeydighan xata teklipler dep qarimaqta.

2008‏- Yilighiche iraqtiki amérika urushchi qisimlirini chékindürüp chiqish qiyin

Amérikining iraqtiki quruqluq qisimlirining bash qomandani gerche iraq tekshürüsh guruppisining doklatini qarshi alidighanliqini bildürgen bolsimu, emma doklatta otturigha qoyulghan 2008‏- yilighiche iraqtiki amérika urushchi qisimlirini chékindürüp chiqish teklipini, emelge ashurush qiyin bir teklip, dep körsetti.

Washin'gton post gézitining xewer qilishiche, prézidént jurj bush amérikini ziyaret qiliwatqan en'giliye bash ministiri toni bilayér bilen birlikte ötküzgen muxbirlarni kütüwélish yéghinida, iraqtiki weziyetning tereqqiyatidin razi emeslikini, shuning üchün yéngi bir istratégiye otturigha qoyidighanliqini ipadilep, iraq tekshürüsh guruppisining pikirlirini körüp chiqishiqa erziydighan pikirler dep körsetken bolsimu, emma wastiliq halda iraq tekshürüsh guruppisining doklatida otturigha qoyulghan eng muhim tekliplerni qobul qilmaydighanliqini ipadiligen.

Doklatta, ottura sherq mesilisi bir terep qilishqa tégishlik eng muhim mesililerning biri dep körsitilgen hemde bush hökümitining erep -isra'iliye jidilini hel qilish üchün yéngi we jiddiy bir diplomatiye herikiti bashlishi kérekliki otturigha qoyulghan.

Prézidént bushning doklatqa qarashliri

Prézidént bush toni bilayér bilen birlikte ötküzgen muxbirlarni kütiwélish yéghinida, toni bilayérning yéqinda erep-isra'iliye otturisida tinchliqni qaytidin tiklesh üchün ottura sherq döletlirini ziyaret qilidighanliqini bildürüp, emma doklatta otturigha qoyulghandek özining yingi we jiddiy bir teshebbus bashlaydighanliqi toghrisida héchbir néme démigen.

Prézidént bush shundaqla iraq tekshürüsh guruppisining 2008‏- yilighiche iraqtiki amérika urushchi qisimlirini chikindürüp chiqish teklipining iraqtiki weziyetke toghra kelmeydighanliqini ipadilep, iran hökümiti uran tawlash programmisini toxtatmighiche suriye liwanning ichki ishlirigha arilishish pa'aliyitige xatime bermigiche, bu ikki dölet bilen söhbet élip barmaydighanliqini bildürgen. Halbuki iraq tekshürüsh guruppsi özining doklatida, amérika hökümitining iran we suriye qatarliq iraqqa qoshna döletler bilen söhbet élip bérishini, iraq mesilisini hel qilishning eng muhim bir wastisi süpitide otturigha qoymaqta.

Iraq tekshürüsh guruppisining xizmiti amérika xelqi kütken netijini bermidi

Amérikining sabiq tashqi ishlar ministiri jumhuriyetchi jémz béker we sabiq amérika dölet mejlisi ezasi démokrat partiyilik li hamiltonning riyasetchilikidiki iraq tekshürüsh guruppisining xizmiti amérika xelqi kütken netijini bermidi. Chünki bu tekshürüsh guruppisining peqet hökümetke teklip bérish salahiyiti bar bolup, hökümetke buyruq chüshürüsh salahiyiti yuq. Shunga gerche mezkur guruppa nurghunlighan tekliplerni otturigha qoyghan bolsimu, prézidént bush hökümiti özige yaqqan tekliplerni qobul qilip, hökümetke yaqmighan tekliplerni ret qilishi mumkin. Prézidént bush iraq tekshürüsh guruppisining bezi tekliplirini qobul qilidighanliqini bildürüp, bezi tekliplirini ret qilidighanliqini ochuq ipadiligen. U muxbirlarni kütüwélish yéghinida, bergen bayanatida, jimz bi'éker we li hamilton bizning pütün tekliplerni qobul qilishimizni kütmeydu, dédi. Halbuki jémiz béker we liy hamilton charshenbe küni doklatni tonushturush jeryanida, iraq tekshürüsh guruppsi prézidént bushtin tekliplerning bir qismini emes hemmisini birdek qobul qilishini kütidu, dep tekitligen.