Iraqta saylam ghelibilik ayaghlashti
2005.12.16

Tinchliqni töt közi bilen kütüp turiwatqan iraq xelqining saylimi ghelibilik ayaghlashti. Saylam komitéti bayanatchisining bildürüshiche, saylamgha qatnashqan saylam ehlining sani 11 milyon'gha yetken bolup, bu iraq omumiy nopusning 70 % ini igileydiken .
Amérika prézidénti jorj bush, iraq xelqining, térrorchilarning tehditige qarimastin, saylamning ghelibilik ayaghlishigha awaz qoshqanliqidin xursen bolghanliqini bildürdi.
Zorawanliq az körülgen
Prézidént bush mundaq dédi: " iraq xelqining démokratiyige qarap mangghan birinchi qedimining netijilik ayaghlashturghanliqini körüsh, méning üchün éytqanda intayin xushallinarliq bir ish, nechche on minglighan iraq xelqi saylamgha qatnashti, men bu qétimqi saylamda chüshken bélet sanidin téxi xewerdar bolmidim, biraq biz ishinimizki , bélet tashlash nisbitidin qarighanda saylam awazi intayin yuqiri boldi, kishini tolimu xoshal qilidighan yene bir ish, saylam jeryanida zorawanliq heriketliri az körüldi" .
Amérika dölet mudapi'e ministiri ramisféld, iraqta ötküzülgen saylamgha baha bérip "bu qétimqi saylam, iraq xelqining düshmini üchün bir meghlubiyet hésablinidu " dédi.
Bu arida aq sarayning bayanatchisi meklélun , saylamgha sünniy musulmanlirining intayin köp bélet tashlighanliqini bildürdi, prézidént bush bolsa "sünniy musulmanlirining saylamgha köp awaz qoshushi, bir tereptin iraqning daghdam siyasiy istiqbalidin , yene bir tereptin sunniylerdin teshkillen'gen qoralliq küchlerning ajizlashqanliqidin dérek béridu" dédi.
Bush: meqsitimiz démokratik iraq berpa qilish
Prézidént bush sözide yene, bizning nishanimiz, démokratiyini qollaydighan, qoghdaydighan , térrorchiliqqa ortaq qarshi turidighan iraq dölitini berpa qilish shuningdek meyli iran yaki süriyige oxshash, etraptiki döletlerge ülge yaritishini qolgha keltürüsh" dédi. Aq sarayning bayanatchisi mékililan saylam heqqide yene " iraqtiki erkin saylam, térrorchilargha ejellik zerbe boldi, amérika térrorchilarning iraqni waste qilip turup, amérika we uning ittipaqdashlirigha hujum qilishigha hergiz yol qoymaydu" dédi.
Amérika prézidénti jorj bush yene bir qétim amérika qoshunlirining dawamliq iraqta turush iradisini bildürüp, wezipe ayaghlashqan'gha qeder bu zémindin hergiz qoshun yötkimeydighanliqini, eger qoshun yötkelse bir tereptin düshmen'ge jasaret bérish, amérika qoshunigha xata signal bérip qoyush aqiwitining meydan'gha kélidighanliqini tekitlidi.
Saylam xelq'ara ölchemlerge uyghun élip bérilghan
Iraqta saylam béletlirini sanash xizmiti élip bériliwatqan bolup, saylamgha hujum qilish heriketliri, saylam pa'aliyetlirining dawamlishishigha tosqunluq qilalmighan. Saylam xadimlirining doklatlirigha qarighanda , iraqta saylam intayin qizghinliq ichide ötküzülgendin sirt, memliket boyiche saylamgha qatnashqanlarning nisbiti intayin yuqiri bolghan. Xelq'ara közetküchilerning bildürüshiche, iraq saylimi xelqara ölchemlerge uyghun yosunda élip bérilghan.
Xewerlerdin melum bolushiche, saylam ehlining sanining köplükidin bir qisim rayonlarda , saylam waqti bir sa'ettin artuq uzartilghan .
Saylam komitéti , saylam netijisining ikki heptidin kéyin melum bolidighanliqini bildürüsh bilen birge, saylam jeryanida yüz bergen xataliq we inkaslar üstidin tekshürüsh élip baridighanliqini bildürdi. Sünniy ereblerning saylamgha bélet tashlash nisbiti intayin yuqiri bolup, qarshiliq körsetküchi küchler eng köp pa'aliyet élip bériwatqan iraqning gherbidiki rayonlarda saylam béletliri kemchil bolush hadisisini keltürüp chiqarghan.
Iraq prézidénti talabani " bügün , iraq xelqi üchün bayram, iraq xelqi saylap chiqqan her bir wekil pütün iraq xelqining kelgüsi hökümitige wekillik qilidu" dep körsetti. (Eqide)
Munasiwetlik maqalilar
- Iraq parlamént saylimining bélet tashlash ishliri axirlashti
- Amérika prézidénti bush iraqta hazirghiche 30 ming kishining ölgenlikini bildürdi
- Amérika qoshuni iraqning gherbide zor yoqitishqa uchridi
- Iraq sünni musulmanliri xelq'aradin türme weqesini tekshürüshni telep qildi
- Iraqning yéngi asasiy qanunini maqulluqtin ötti
- Baghdatta élip bérilghan özini öltürüwélish xaraktérlik hujumda 4 kishi öldi
- Iraqtiki asasiy qanun saylimi ayaqlashti