Uyghur diyaridiki namrat ishsiz yashlar shénjén'gha apirilidiken

• Ixtiyari muxbirimiz erkin tarimning bu heqtiki toluq melumati
• Download story audio

Ürümchi kechlik gézitidin igilishimizche, namrat, ishsiz yashlarni shénjénda ishleshke tizimlitish xizmiti bashlan'ghan iken. Bu xizmet Uyghur aptonom rayonluq ittipaq komitéti yashlarni ishqa orunlashturush mulazimet merkizi teripidin élip bériliwatqan bolup, tunji türkümde sheher bazarlardiki artuq namrat yash emgek küchliri ichkiri ölkilerde ishqa orunlashturilidiken. Igilinishiche bu kishiler shénjén'gha bérip amanliq saqlash xizmitini qilidiken, ayliq ma'ashi 1400 yüen iken. Shénjén'gha bérishqa tizimlitidighan yashlar choqum 18 – 28 - yashqiche bolushi, toluqsiz ottura mektep oqush tarixidin yuqiri medeniyet sewiyisige ige bolushi kérek iken. Biz bu xewerni ürümchi kechlik gézitidin igiligendin kéyin, shinjang Uyghur aptonom rayonluq ittipaq komitéti yashlarni ishqa orunlashturush mulazimet merkizige téléfon qilip tepsili ehwal igiliduq. Téléfonni alghan kishi bizge bu heqte melumat berdi:

- Men erkin asiya radi'osining muxbiri, ürümchi kechlik gézitide shénjén'gha yashlarni apirip ishqa orunlashturush heqqide xewer bérilgen iken. Biz bu heqte melumat élish üchün téléfon qilghan idim. Hazirghiche bu ishqa iltimas qilghanlar barmu? -bar. Hazir ehwal igilep téléfon qiliwatqanlar jiq. Hazirghiche 10 nechche kishi tizimlatti. Shinjangning herqaysi yerliridin iltimas qilsa bolidu. Her wilayetke san bar. Bu iltimas mudditi 11-ayning 15-kunigiche dawam qilidu. - U yerde ish bolmighanliqi üchün ichkirige bérip ish tapamdu Uyghurlar? - bu yerde ish yoq dégenlik emes. Biz peqet kembeghel yashlargha yardem qilish üchün, ularning a'ile iqtisadining yaxshilinishi üchün bu ishni qiliwatimiz.

- Uyghurlar u yerde til bilmise qandaq qilisiler? -til ötkilidin choqum ötishi kérek, xitayche bilmise u yerge baralmaydu. Uning üstige peqetla Uyghurlarlar emes, sherti toshsila qaysi millettin bolsa bolsun tizimlatsa bolidu. - Bu xizmetke orunlishishning sherti nime ? -salametliki yaxshi bolushi, a'ilisining iqtisadi ehwali yaxshi bolmighan bolushi kérek. Namratliqigha da'ir ispat xéti bolushi kérek. Bizning asasi meqsitimiz kembeghellerge yardem bérish - 1400 koy bérilidu depsiler, bu shénjénda az emesmu? - bu biz shinji'angliqlargha nisbeten bu yuqiri ma'ash hésablinidu. Oxshash xizmetni shinjangda qilsa bundaq ma'ashni alghili bolmaydu. - Shinji'angdiki yashlarni ichkirige ewetkiche, ichkiridin kéliwatqan aqqunlarning sanini azaytsanglarla bolmidimu? - yaq, bizning meqsitimiz kembeghellerge yardem bérish. Qolida hüniri yoq, puli yoq yashlarni biz ittipaq komitéti bolush süpitimiz bilen iqtisadini yaxshiliwalsun dep qilimiz. Shinjangda orunlashturayli dések, bu yerde ma'ash bek towen.

Biz ürümchidiki melum bir yashqa téléfon qilip bu xizmetke qandaq qaraydighanliqini soriduq. U yash bu heqte öz qarashlirini otturigha qoydi.