Uyghur élida xizmetke qobul qilish élanliri pul yighishni meqset qilmaqta


2006-06-22
Share

Yéqinda Uyghur aptonum rayonluq ma'arip nazariti, xitay iqtisad komitéti, ma'arip komitéti qatarliq on nechche orun birlikte Uyghur élining yéza - kentliridiki bashlan'ghuch hemde ottura mekteplerge jem'iyettin oqutquchi qobul qilidighanliqi heqqidiki oqturushni tarqatqandin kéyin bu élan Uyghur élidiki chong kichik tor betlerdimu qoyuldi.

Mezkur élanda "Uyghur aptonum rayonining yéza- kentlerdiki jem'iy 20 bashlan'ghuch hemde otturgha mekteplerge 1595 shtat qobul qilinidu, tallash obyékti pütün xitay boyiche aliy mektep, aliy hemde ottura téxnikom mekteplerni püttürgen, 30 yashtin töwenler hemde oqutquchiliq layaqet kinishkisige igilermu qobul qilinidu. Tizimlash waqti 23 - iyun'ghiche" dep körsitilgen.

Bar xizmet yenila puli barlar üchün

Melumatlardin Uyghur élida ishsizliq weziyitining nahayiti éghirliqi melum bolupmu Uyghur yashlirining aliy mekteplerni püttürgen teqdirdimu ishqa orunlishalmaywatqanliqi éghir bir jem'iyet mesilisi bolup qalghan. Eslide ishqa élish toghrisidiki élanlar ish kütüp turghuchilargha nisbeten bir yaxshi purset bolishi kérek idi emma tengritagh torida élan qilinishiche, oqutquchi qobul qilish élani chiqirilip hazirgha qeder tizimlatqanlar sani 8900 etrapida iken. Bezi kishilerning melum qilishiche tizimlatqan Uyghurlarning nisbitimu intayin töwen iken. Biz Uyghur yashlirining mezkur oqutquchi qobul qilish pursitige qandaq mu'amile qiliwatqanliqini igilesh üchün Uyghur éligha téléfonlar achtuq. Uyghur élidiki melum aliy mektepni püttürüp üch yilghiche ish tapalmaywatqan bir Uyghur yash ziyaritimizni qobul qilip, tizimlatqanlarning pul tölishi kéreklikini, ularning pulni yighip imtihan alghandin kéyinla yoqap kétidighanliqi, yenila puli barlarning balilirila bu ishqa érisheleydighanliqini, nöwette Uyghur yashlarning bikar telep bolup ketkenlikini éytti.

Uyghurlardiki inkas: xizmetke élish ilanliri xitaylar üchün

Bezi kishilerning bildürüshige qarighanda, bu qétim Uyghur élida jem'iyettin keng kölemlik oqutquchi qobul qilishining sewebi, bu yil Uyghur ottura we bashlan'ghuch mektepliri xitay mektepliri bilen pütünley birleshtürüwétilip xitayche ma'arip sür'iti kücheytilgenliki üchün, yézilarda xitay tilida ders béridighan oqutquchilar yétishmeslik ehwali körülüwatqan bolup, bu qétimliq oqutquchi qobul qilishmu asasen xitay tilida ders béreleydighanlarni tallashni obéykta qilghan, tizimlatqanlardin yéziq imtihani xitayche élin'ghan.

Nurghun kishilerning radi'omizgha inkas qilishiche, ish kütküchiler gerche Uyghur élida yuqiriqidek xizmetke qobul qilish élanliri arqiliq hemde ixtisasliqlar bazarliri arqiliq ishqa orunlishishqa urunuwatqan bolsimu, bu orunlarning tizimlitish hemde imtihan élish heqliri yuqiri bolghandin sirt Uyghurlarning bu xil yollar arqiliq ish pursitige érishishi asasen mumkin emes bolup, bu xil élanlar ulargha nisbeten, pul yighishni meqset qilghan aldamchiliqtek, yaki bolmisa peqetla xitaylargha chiqirilghan élandek bilinidiken.

Uyghur éli ma'arip toridin ashkarilinishiche bu qétim qobul qilinidighan oqutquchilargha 6, 7, hemde 8 derijilik xitay tili imtihanidin ötken bolishi shert qilin'ghan bolup, ular 18 asasliq penlerdin imtihan élip tallan'ghanlirini, bir mezgil mexsus terbiyileshtin ötküzgendin kéyin Uyghur élining xoten, qeshqer, ghulja, aqsu, altay qatarliq 7oblast nahiyi'e rayonliridiki bashlan'ghuch hemde ottura mekteplerning qosh tilliq ma'aripini rawajlandurush üchün ewetidiken. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet